6. nóvember - 13. nóvember - Tbl 45
Sjúkrahúsið á Akureyri
Logi Már Einarsson formaður þingflokks Samfylkingarinnar
Ísland er fámennt en stórt land. Íbúaþróun síðustu áratugi hefur á margan hátt verið óskynsamleg. Samkvæmt gögnum frá Hagstofunni búa nú nálægt 80% landsmanna á stórhöfuðborgarsvæðinu en 20% landsmanna á gríðarlega víðfeðmu landsvæði utan þess. Fá dæmi eru um slíka samþjöppun búsetu í nokkru landi og fyrir vikið er það flókið verkefni að tryggja öllum landsmönnum fyrsta flokks lögbundna þjónustu, þótt sannarlega sé það bráð nauðsynlegt. Það á ekki síst við um réttinn til heilbrigðisþjónustu.
Sjúkrahúsið á Akureyri, SAk, er eina sjúkrahúsið utan höfuðborgarsvæðisins og
í lögum um heilbrigðisþjónustu nr. 40/2007, kemur skýrt fram mikilvægi þess, m.a. sem vara sjúkrahús fyrir Landspítala háskólasjúkrahús í Reykjavík.
Því miður hefur þjónusta á ýmsum sviðum verið að dragast saman á undanförnum misserum, þrátt fyrir lofsverða útsjónasemi starfsfólks við að verja stöðuna. Ýmis sérfræðiþjónusta sem var áður í boði, er það ekki lengur. Þar má nefna lungnalækningar, augnlækningar, húðlækningar, innkirtlalækningar, inngrip myndgreiningadeildar og lýtalækningar. Auk þess eru aðrar sérgreinar s.s. geðlækningar, barna- og unglingageðlækningar, skurðlækningar, endurhæfingarlækningar og öldrunarlækningar í verulegri hættu vegna skorts á fjármagni og sérhæfðum læknum.
SAk leikur gríðarlega mikilvægt hlutverk fyrir íbúa á risastóru landsvæði norðan og austan lands. Árlega þurfa þó rúmlega 22.000 manns af upptökusvæði þess að leita sér lækninga til Reykjavíkur þar sem þjónusta er einungis í boði á höfuðborgarsvæðinu, hvort sem er á Landspítalanum eða hjá sérfræðilæknum með samninga við Sjúkratryggingar Íslands.
Það er vel hægt að breyta þessu. Sem dæmi setti SAk fyrir nokkrum árum upp þjónustulíkan í krabbameinslækningum sem hefur reynst vel, þar sem SAk hefur fengið einn krabbmeinslækni norður í tvo til þrjá daga í viku til að sinna sjúklingum í samvinnu við vel samhæft hjúkrunarteymi SAk. Ef ekki væri fyrir þessa þjónustu þyrftu um 50 sjúklingar ásamt fylgdarmanni að fara suður til Reykjavíkur í hverri viku. Þá er nauðsynlegt að efla þjónustu dag- og göngudeilda, hægt væri t.d. að hefja hjartarþræðingar fyrir norðan og ýmislegt fleira.
Styrking SAk er mannréttindamál fyrir íbúa landsbyggðanna en einnig skynsamlegt efnahagslega; það minnkaði bruðl ríkisins en sparaði um leið sjúklingunum sjálfum himinháar fjárhæðir vegna ferða, gistingar, uppihalds og vinnutaps. Og rétt er að nefna að oft þurfa sjúklingar að hafa með sér fylgdarmann. En einungis til að viðhalda núverandi þjónustu vantar ríflega milljarð inn í rekstrargrunninn, sem er þó hverfandi lítil upphæð í stóra samhenginu.
Það er vissulega mjög ánægjulegt að verið sé að hefja byggingu á nýrri og löngu tímabærri legudeild við Sjúkrahúsið á Akureyri. Með henni verða skurðstofur endurnýjaðar auk þess sem rými losna í eldri byggingum fyrir aðþrengda þjónustu eins og dag- og göngudeildarstarfsemi. En það er hins vegar til lítils af stað farið ef ekki á að tryggja nægjanlegt fé til rekstursins líka: Þannig að íbúar landsbyggðanna njóti þeirra réttinda sem mælt er fyrir um í lögum. Og þannig að SAk geti sótt fram og eflst í stað þess að berjast í bökkum ár eftir ár.
Logi Már Einarsson formaður þingflokks Samfylkingarinnar
Nýjast
-
Umgengni á athafnasvæði Skútabergs á Moldhaugnahálsi
Umgengni á athafnasvæði Skútabergs á Moldhaugnahálsi hefur verið til umræðu hjá Heilbrigðisnefnd Norðurlands eystra um skeið, en nefndin lýsti fyrir nokkru yfir vonbrigðum með að áform um tiltekt á svæðinu hefðu ekki gengið eftir. -
Sjúkrahúsið á Akureyri
Ísland er fámennt en stórt land. Íbúaþróun síðustu áratugi hefur á margan hátt verið óskynsamleg. Samkvæmt gögnum frá Hagstofunni búa nú nálægt 80% landsmanna á stórhöfuðborgarsvæðinu en 20% landsmanna á gríðarlega víðfeðmu landsvæði utan þess. Fá dæmi eru um slíka samþjöppun búsetu í nokkru landi og fyrir vikið er það flókið verkefni að tryggja öllum landsmönnum fyrsta flokks lögbundna þjónustu, þótt sannarlega sé það bráð nauðsynlegt. Það á ekki síst við um réttinn til heilbrigðisþjónustu. -
Hvar er fjárveitingin í Húsavíkurflugið?
Þingeyingar hafa lengi barist fyrir því að áætlunarflugi milli Húsavíkur og Reykjavíkur verði viðhaldið enda um mikilvæga samgöngubót að ræða, ekki síst fyrir heimamenn, ferðamenn og blómlegt atvinnulíf í Þingeyjarsýslum. -
Kosningaloforð og hvað svo?
Landssamband eldri borgara LEB eru samtök 56 aðildarfélaga sem eru dreifð um allt land með um 36.000 félaga. Þeir sem eru orðnir 60 ára geta gengið í félögin. -
Uppskeruhátíð ferðaþjónustunnar á Norðurlandi
Þrjár viðurkenningar voru veittar á Uppskeruhátíð ferðaþjónustunnar á Norðurlandi sem að þessu sinni var haldin í Eyjafirði, í Eyjafjarðarsveit, Svalbarðsstrandarhreppi og Grýtubakkahreppi. Þær voru fyrirtæki ársins, hvatningarverðlaun ársins og fyrir störf í þágu ferðaþjónustu. Á uppskeruhátíðinni var farið í heimsóknir til ýmissa ferðaþjónustufyrirtækja á svæðinu, sem bjóða bæði afþreyingu, mat og gistingu ásamt ýmsu öðru. Hátíðin tókst afar vel og lauk með hátíðarkvöldverði á Laugaborg í Hrafnagilshverfi, kvöldskemmtun, dansi og mikilli gleði. -
Harðbakur málaður og yfirfarinn í Slippnum á Akureyri
Togarinn Harðbakur EA 3 heldur senn til veiða eftir ýmsar endurbætur og uppfærslur í Slippnum á Akureyri, auk þess sem skipið var heilmálað. Harðbakur er fimm ára gamalt skip, smíðað í Vard-Aukra skipasmíðastöðinni í Noregi. Skipið kom til Akureyrar 9. nóvember 2019 og strax í kjölfarið tók Slippurinn við því, þar sem settur var vinnslubúnaður um borð. Harðbakur er 29 metra langur og 12 metra breiður. Skipið er gott í alla staði, bæði hvað varðar vinnslubúnað og aðbúnað áhafnar. -
Tónlistarskóli Eyjafjarðar sá fyrsti sem fer í Græn skref
Tónlistarskóli Eyjarfjarðar hefur náð þeim einstaka áfanga að vera fyrsti tónlistarskólinn á Íslandi til að fara í Græn skref „og mega þau vera stolt af því,“ segir á vefsíðu Samtaka sveitarfélaga á Norðurlandi eystra, SSNE. -
Atkvæðagreiðsla utan kjörfundar hefst 7 nóvember
Atkvæðagreiðsla utan kjörfundar við embætti sýslumannsins á Norðurlandi eystra hefst 7. nóvember n.k. Alls hafa 31.039 atkvæðarétt í kjördæminu, flestir þeirra og það kemur ekki á óvart frá Akureyri eða 15.057 manns. -
Pólarhestar eru fyrirtæki ársins
Markaðsstofa Norðurlands veitir viðurkenninguna Fyrirtæki ársins til fyrirtækis sem er búið að slíta barnsskónum og hefur skapað sér sterka stöðu á markaði. Fyrirtækið hefur unnið að stöðugri uppbyggingu, vöruþróun og nýsköpun og er með höfuðstöðvar á Norðurlandi.
