20. nóvember - 27. nóvember - Tbl 47
Ísland allt og mikilvægi Eyjafjarðarsvæðisins
Sigmundur Davíð Gunnlaugsson
„Ísland allt“ er áætlun Miðflokksins um að gera landið að einni samvirkandi heild með stórsókn í byggðamálum. Liður í því er að Akureyri og Eyjafjarðarsvæðið verði í auknum mæli mótvægi við höfuðborgarsvæðið.
Áætlunin byggir á loforði sem ég og fyrrverandi ríkisstjórn gáfum um að þegar við værum búin að ná þeim árangri sem við boðuðum í efnahagsmálum myndum við skila árangrinum áfram til íslensks almennings og fjárfesta í framtíðinni. Mikilvægur liður í því var boðuð stórsókn í byggðamálum. Hún er bæði nauðsynleg og aðkallandi. Ef ekki verður gripið inn í núna verður sífellt erfiðara og dýrara að snúa öfugþróun við og sækja fram. Ef við hins vegar nýtum það stóra tækifæri sem nú gefst og ráðumst í umfangsmiklar fjárfestingar samkvæmt heildaráætlun fyrir landið mun sú auðlind sem liggur í landinu og fólkinu sem það byggir nýtast betur en nokkru sinni áður. Við munum fara úr dýrri vörn í arðbæra sókn.
Við höfum leitað fyrirmynda víða, og metið hvað hefur reynst best, meðal annars í Bretlandi þar sem stjórnvöld réðust fyrir nokkrum árum í verkefnið Northern Powerhouse. Þar í landi komust stjórnvöld að þeirri niðurstöðu að sú skekkja sem stöðugt ágerðist milli höfuðborgarsvæðisins (London) og Norður-Englands kallaði á umfangsmikil inngrip af hálfu stjórnvalda. Fyrir vikið hefur fjárfestingu verið beint norður, sérstök áhersla verði lögð á að efla heilbrigðis- og menntakerfið á Norður-Englandi, framlög til menningarmála aukin, sérstakir styrkir veittir til rannsókna og þróunarstarfs og svo framvegis.
Í breska verkefninu gegndi þéttbýlið og sveitin á milli Liverpool og Manchester sérstöku hlutverki sem mótvægi við Lundúnasvæðið. Á sama hátt munu Akureyri og Eyjafjörður gegna mikilvægu hlutverki í áformum okkar.
Ísland allt lítur til þess sem vel hefur gefist annars staðar en einnig til aðstæðna á Íslandi og bætir inn lausnum sem henta sérstaklega hér á landi. Það mætti því kalla það íslensku leiðina, þetta er leið sem er sérstaklega til þess hönnuð að skila árangri á Íslandi.
Ástæður þess að ég er sannfærður um að verkefnið muni gefast vel liggja annars vegar í þeim fjölmörgu aðgerðum sem ráðist verður í um allt land og eiga að virka saman sem ein heild og í því hvernig staðið verður að framkvæmdinni.
Verkefninu verður stýrt frá einum stað, helst úr forsætisráðuneytinu, af ráðherra sem mun ásamt ríkisstjórninni hafa heildaryfirsýn, vald til að stýra framkvæmdinni allri og fyrir vikið bera ábyrgð á því að árangur náist. Horfið verður frá smáskammtalækningum og því að láta landshluta takast á um sömu fjárveitingarnar. Tugum milljarða verður varið í verkefnið á næstu árum og hver króna nýtt með þeim hætti að hún gagnist heildarplaninu um að gera landið að einni heild. Rétt eins og í Bretlandi munu stjórnvöld hafa samráð við sveitarfélög, landshlutasamtök, stofnanir, fyrirtæki, samtök á vinnumarkaði, ráðgjafafyrirtæki ofl. og fá alla til að vinna saman að heildarmarkmiðinu.
Verkefnin verða fjölþætt en öll til þess ætluð að ná sama markmiðinu. Enda þarf margt að fara saman svo byggð sé efld um allt land og tækifæri Íslands nýtt. Saman munu fara hlutir eins og sérstök efling heilbrigðisþjónustu og menntakerfis, tengingar með framkvæmdum á sviði samgöngumála og fjarskipta, fjárfesting ríkis og einkaaðila, fjölgun opinberra starfa, flugsamgöngur, bæði niðurgreiðsla þeirra (sem almenningssamgangna) og uppbygging innviða, skattlegir hvatar og ákvörðun um að allir landsmenn skuli eiga rétt á tiltekinni þjónustu af hálfu ríkisins.
Allt eru þetta liðir sem munu spila saman og verða til þess að Ísland allt fari að virka sem ein heild.
Til þess að þessi framtíðarsýn verði að veruleika þarf stjórnmálaafl sem hefur vilja og getu til að ryðjast í gegn um þær hindranir sem á veginum verða. Miðflokkurinn er það afl. Komdu með okkur í verkefnið með því að setja X við M á kjördag.
-Sigmundur Davíð Gunnlaugsson formaður Miðflokksins skipar 1. sæti Miðflokksins í Norðausturkjördæmi
Nýjast
-
Eignarhald bænda á jörðum tryggir hag þeirra best
Umræða um jarðir, jarðaviðskipti og kynslóðaskipti í landbúnaði er og á að vera fyrirferðarmikil í umræðu um stöðu sveitanna. Enda var málefnið eitt helsta umræðuefni á haustfundum Bændasamtaka Íslands. Uppkaup og jarðasöfnun fjárfesta og samkeppnisstöðu landbúnaðar. Um stöðu ungra bænda og eldri bænda sem væru að afhenda bú sín til yngri kynslóða. -
Orkumál
Alþingiskosningar ber brátt að garði. Þar skipar undirrituð 2. sætið á lista VG í norðausturkjördæmi. Ég bý á Björgum í Kinn í Þingeyjarsýslu þar sem systir mín og ég tókum við búi 2017 af foreldrum okkar. Þar er mjólkurframleiðsla, umfangsmikil jarðrækt, kornrækt og örfáar kindur.Meðal starfa minna í félagsmálum má nefna formennsku í Samtökum ungra bænda og þá hef ég setið í sveitarstjórn Þingeyjarsveitar frá árinu 2018 og er nú formaður byggðarráðs -
Ætla Íslendingar að standa vörð um orkuauðlindir sínar?
Einhver myndi segja að sá bóndi er seldi frá sér allar bestu mjólkurkýrnar væri vitlaus maður. Utan ef tilgangurinn væri að pakka saman, hætta rekstri og selja hæstbjóðanda. -
Stefna flokksins í utanríkismálum
Grunnstef Lýðræðisflokksins er gott samstarf við Nato sem er varnarbandalag og hefur verið hornsteinn í utanríkisstefnu Íslands -
Reynsla mín af smíðakennslu á Akureyri. Aldarfjórðungur í baksýn.
Í Menntastefnu Akureyrarbæjar segir: „Verkviti er gert hátt undir höfði til þess að börn nái í síauknum mæli að tengja saman hug og hönd í skapandi umhverfi. Akureyrarbær hefur ríkan metnað til þess að í hverjum skóla starfi hæft og öflugt fólk og að eftirsóknarvert sé að starfa þar. Stuðningur skólayfirvalda við starfsþróun leikur þar stórt hlutverk“. Skipulag skóla gerir ráð fyrir samvinnu starfsfólks, sveigjanleika í skipulagi, teymiskennslu og samþættingu námsgreina“ (Menntastefna Akureyrarbæjar, 2020-2025). -
Örugg skref um allt land.
Heilbrigðiskerfið okkar er hjartað í því velferðarsamfélagi sem tekist hefur að byggja upp á Íslandi. Á yfir 40 fundum sem Samfylkingin bauð til um allt land til að ræða heilbrigðis- og öldrunarmál var ljóst að sinnuleysi og fyrirhyggjuskortur undanfarinna ríkisstjórna er að hola innan öryggistilfinningu fólks. Ekki síst í okkar kjördæmi þar sem vegalengdir eru langar, veður viðsjál og langt til Reykjavíkur. Að heilsugæslan neyðist til að reiða sig á íhlaupalækna til að bjarga vandanum tímabundið stoðar lítt. Það byggir ekki upp það traust og samfellu sem þarf til að fólk njóti þess margháttaða ávinnings sem rannsóknir hafa sýnt að fylgi því að hafa fastan heimilislækni. Enda settum við það sem okkar fyrsta heit í nýju framkvæmdaplani heilbrigðismála til tveggja kjörtímabila. Við erum tilbúin. -
Búsetutengd mismunun í heilbrigðisþjónustu, í boði einkavæðingar og heilbrigðisráðherra Framsóknar.
Búsetutengdur munur á notkun þjónustu sérgreinalækna er mjög mikill. Íbúar dreifbýlis nota þjónustuna mun minna en höfuðborgarbúar og íbúar Vestfjarða og Austfjarða minnst allra, nefnilega þrisvar sinnum minna en höfuðborgarbúar. Lýðheilsuvísar benda ekki til þess að íbúar í dreifbýli séu heilsubetri en höfuðborgarbúar. Nærtæk skýring á þessum mun er að kaupandi þjónustunnar, ríkið, lætur sig engu varða hvar þjónustan er veitt og hún hefur nær öll byggst upp í Reykjavík. Í versta falli er afleiðingin sú að þau sem búa næst þjónustunni nýta hana umfram þörf og hin sem fjær búa minna en æskilegt væri. Hvoru tveggja er hættulegt og brýnt að rýna lög og hvort þeim er fylgt. -
Lítið að frétta í lífi án frétta á landsbyggðunum
Af þeim 27 fjölmiðlum sem hlutu rekstrarstuðning til einkarekinna fjölmiðla 2024 voru 13 staðbundnir fjölmiðlar og af þeim 10 staðsettir utan höfuðborgarsvæðisins. Hver og einn af þessum staðbundnu miðlum þjónar gríðarlega mikilvægu hlutverki í sinni heimabyggð og styrkveitingin því sannarlega fagnaðarefni. -
Íþróttir fyrir alla!
Hver króna sem fer til íþróttafélaga er króna sem skilar sér margfalt til baka í samfélagið. Um kosti íþróttastarfs á Íslandi verður ekki deilt. Starfið er faglegt, fjölbreytt og gott. Það sem hefur breyst á undanförnum árum er að íþróttir eru gríðarlega atvinnuskapandi. Félögin á Íslandi í dag eru orðin stærri og komin með fleiri starfsmenn í full störf. Ásamt því að afleidd störf tengd íþróttum á Íslandi, t.d. í ferðaþjónustu, eru orðin ansi mörg og drjúg.
