Vilja draga úr slysahættu á háannatíma
Sveitarstjórn Norðurþings staðfesti á dögunum samþykktir vegna Bílastæðasjóðs Norðurþings en til stendur að hefja gjaldtöku á bílastæðum á miðhafnarsvæðinu á Húsavík í vor. Bílastæðin sem um ræðir verða gjaldskyld frá 08:00-20:00 alla daga vikunnar frá 1. maí n.k. til 30. september. Ráðið telur að með gjaldtöku á bílastæðum sé hægt að stýra umferð um hafnasvæðið á Húsavík á valin gjaldfrjáls bílastæði annarsstaðar í bænum yfir mesta ferðamannatímann.
Eitt gjaldsvæði er við hafnasvæði og miðbæ Húsavíkur, P1. Gjald fyrir fyrstu 60 mínúturnar er 220 kr. Eftir það hækkar gjaldið í 500 kr. á hverja klst. Einungis er rukkað fyrir rauntíma sem bíl er lagt í stæði. Gjaldskyldutími er frá kl. 08:00 – 20:00 alla daga vikunnar frá 1. maí til 30. september ár hvert. Október-apríl eru gjaldfrjálsir mánuðir.
Búið er að gera samning við PARKA um innheimtu á gjaldi fyrir gjaldskyld stæði skv. gjaldskrá með rafrænni greiðslulausn. Hægt verður að greiða fyrir viðveru í gjaldskyldum stæðum í snjallforriti PARKA eða með greiðslu á vefsíðunni www.parka.is
Beina umferð ofar í bæinn
Eiður Pétursson, formaður stjórnar Hafnarsjóðs Norðurþings segir að verkefnið sé á tilraunastigi og muni eflaust taka einhverjum breytingum með tímanum. Hann segir jafnframt að heimafólk þurfi ekki að óttast það geta ekki lagt bílum sínum án þess að greiða fyrir það. Nóg verði af gjaldfrjálsum svæðum.
„Fyrst og fremst er er verið að horfa á hafnarsvæðið á Húsavík og nokkur stæði upp af því sem gjaldskyld stæði. Það hafa ýmsar tilraunir verið gerðar á síðustu árum með umferðarstýringu á miðhafnarsvæðinu á þessum háanna tímum. Það hafa verið auglýst gjaldfrjáls svæði bæði á suðurfyllingu og ofar í bænum. Þetta hefur gefist ágætlega en þrátt fyrir það þarf meiri stýringu á hafnasvæðinu,“ segir Eiður og bendir á að á hverju ári komi um 110 þúsund manns til Húsavíkur til að fara í hvalaskoðun og flestir á bílaleigubílum.
Vilja minnka slysahættu
„Einhversstaðar verða þessir bílar að standa á meðan fólkið fer í hvalaskoðun. Þetta verkefni með gjaldskyld stæði er fyrst og fremst á tilraunastigi. Tilgangurinn er sá að freista ferðamenn til að nota bílastæði ofar í bænum á þessum háannatíma. Með þessu erum við að reyna minnka álag á hafnasvæðinu og draga úr slysahættu enda er ýmis önnur starfsemi í gangi á hafnarsvæðinu,“ útskýrir Eiður og bætir við að heimafólk þurfi ekki að óttast sektarglaða bílastæðaverði.
„Þetta er ekki gert til að vera sekta fólk sem ferðast um bæinn við hefðbundnar athafnir eins og að ganga til kirkju og annað. Það eru gjaldfrjáls svæði við Húsavíkurkirkju eins og aðrar stofnanir bæjarins. Við prófum að sjósetja þetta verkefni núna í vor og svo sjáum við til hvernig það þróast. Eflaust mun það taka einhverjum breytingum þegar fram líða stundir,“ segir Eiður að lokum.
Sett verða upp skilti við innkeyrslu í bæinn til upplýsinga fyrir ferðafólk og einnig við gjaldskyld svæði.
Nýjast
-
Rekstrarhagnaður samstæðu Norðurorku var 782 milljónir króna eftir skatta
„Á árinu 2024 var, líkt og síðustu ár þar á undan, mikið lagt í jarðhitaleit og rannsóknir með það að markmiði að mæta aukinni og hratt vaxandi þörf fyrir heitt vatn á starfssvæði Norðurorku. Á undanförnum árum hefur Norðurorka aukið umtalsvert við fjármagn til rannsókna, þróunar og nýsköpunar og er ekki vanþörf á. Rannsóknarholur voru boraðar á Ytri Haga á árinu og lokið við að staðsetja vinnsluholu. Boranir munu hefjast þar sumarið 2025 og stefnt að því að ný hola verði tekin í notkun 2026,“ sagði Eyþór Björnsson forstjóri Norðurorku í ávarpi sínu á ársfundinum. -
Almenningssamgangnadeild Vegagerðar skoða nýja útfærslu á upphringigjaldi
„Við erum með til skoðunar nýja úrfærslu á gjaldi fyrir upphringiferðir,“ segir Hilmar Stefánsson forstöðumaður hjá Almenningssamgangnadeild Vegagerðarinnar. Mikil óánægja varð í Hrísey með fyrirhugaða hækkun á því gjaldi nýverið en hún var umtalsverð. -
Verðlaun afhent á afmæli Völsungs
Íþróttafélagið Völsungur varð 98 ára laugardaginn 12. apríl. Af því tilefni ver slegið til veislu sem fram fór í Hlyn, sal eldri borgara -
Ökumenn í vandræðum á Fljótsheiði
Hjálparsveit skáta Reykjadal var kölluð út rétt upp úr klukkan 22 á sunnudagskvöldið vegna ferðafólks sem lent hafði utan vegar á Fljótsheiðinni austanverðri. -
Lokaorðið - Samtalshegðun Íslendinga.
Þegar ég fylgist með samtölum manna á meðal og umfjöllun fjölmiðla um málefni samfélagsins get ég ekki varist þeirri hugsun að við Íslendingar höfum umtalsvert svigrúm til framfara hvað hvað varðar samskipti siðaðra manna. -
Lundinn er kominn í Grímsey
Fyrstu lundarnir settust upp í Grímsey fyrir viku. Sjómenn höfðu séð til þeirra á sjó við eyjuna um mánaðamótin en mögulega hefur einstaklega fallegt veður síðustu daga orðið til þess að lundarnir hafi freistast til að hefja vorstörfin fyrr en ella segir á vefsíðu Akureyrarbæjar. -
Hugsandi börn í samfélagi samræðunnar
„Í stuttu máli geta börn stundað heimspeki en það fer vissulega eftir því hvernig hugtakið heimspeki er skilgreint,“ segir Ingi Jóhann Friðjónsson aðstoðarleikskólastjóri, sem rannsakar notkun heimspeki í leikskólum. -
Hæfileikakeppni Akureyrar Brynja Dís sigraði
Brynja Dís sigraði keppnina með frábæru atriði þar sem hún flutti frumsamið ljóð. Dansatriðið Skólarapp hlaut verðskuldað 2. sæti en danshópinn mynda þær Alexandra, Eva Elísabet, Hrafntinna Rún, Karítas Hekla, Karítas Von, Margrét Varða og Sóldögg Jökla. Kristín Bára Gautsdóttir landaði þriðja sætinu fyrir frábært söngatriði þar sem hún söng lagið from The start með Laufey. Hæfileikakeppni Akureyrar er fyrir börn í 5. - 10. bekk. Stemmningin var góð. Atriðin voru tæplega 20 og tóku 40 krakkar þátt. -
Vilja draga úr slysahættu á háannatíma
Bílastæðasjóður Norðurþings hefur gjaldtöku á hafnarsvæðinu
