Gleði hversdagsleikans í Freyvangi
Elsa María Guðmundsdóttir skrifar
Freyvangsleikhúsið frumsýndi fyrir skemmstu „Fólkið í blokkinni” eftir Ólaf Hauk Símonarson en verkið á uppruna sinn sem smásagnasafn sem fyrst kom út árið 2001. Síðan þá hafa einnig verið gerðir sjónvarpsþættir byggðir á sögu fólksins í blokkinni og sýndir við talsverðar vinsældir árið 2013.
Leikstjóri verksins er Kolbrún Lilja Guðnadóttir og hefur hún greinilega skilað hér góðri vinnu.
Leikritið fjallar um hversdagslíf íbúa í blokk, þar sem skemmtilegar og litríkar persónur á öllum aldri lifa sínu lífi. Í raun er söguþráðurinn tiltölulegar einfaldur og laus við tilgerð og stórvirki. En sagan er falleg og persónur hjartnæmar.
Í blokkinni æfir hljómsveit sem byggir á fornri frægð og hyggur á uppsetningu á söngleik, unglingaástir koma við sögu, fordómar gagnvart útlendingum, þunglyndi, spádómsgáfa, áfengissýki, yfirnáttúrulegir kraftar og skarpskyggn strákur sem setur nýtt sjónarhorn á ýmislegt. Tónlist og söngur spila einnig stórt hlutverk í söguþræðinum. Texti og persónusköpun Ólafs Hauks Símonarsonar er bara þvílík dásemd og gerir verkið að þeim gimsteini sem það er.
Freyvangsleikhúsið gerir hér margt mjög vel, allir leikararnir skila sínum hlutverkum með miklum sóma og má þar helsta nefna Jón Friðrik Benónýsson sem leikur fúllynda húsvörðinn Róbert, Badda Ingimarsson sem leikur strákinn Óla og Kareni Ósk Kristjánsdóttur sem leikur unglinginn Söru systur hans, en þau skila trúverðugum og einlægum persónum mjög vel. Fínn stígandi er í verkinu og eftir hlé var eins og færðist aukinn kraftur bæði í leikara og verkið sjálft.
Tónlistin skipar stóran sess í sýningunni og ferst hljómsveitinni og söngvurum það vel úr hendi.
Leikmyndin er lífleg og litsterk. Hún studdi vel við verkið, en talsverð áskorun er að ná að túlka tilfinninguna fyrir blokk og efri hæð, en það er lipurlega útfært í sýningunni. Búningar eru jafnframt litríkir og falla vel að persónum verksins, lýsing var oftast mjög fín en stundum kom þó fyrir að vantaði aðeins meiri lýsingu á sviðinu. Einnig er vert að minnast á mjög flotta hönnun á auglýsingum og myndefni í sýningaskrá, sem er vel gert og vekur athygli.
Sýningin er mjög skemmtileg og auðvelt að hlæja hjartanlega og hrífast með spaugilegum hversdags atburðum fólksins í blokkinni. Hins vegar eru í sýningunni á nokkrum stöðum ýmislegt sem gefur í skyn að lífið er jú ekki alltaf dans á rósum. Þessu öllu er vel og einlæglega skilað af fínum leikarahópi Freyvangsleikhússins.
Mæli með því að fólk eyði huggulegri kvöldstund með fólkinu í blokkinni og hlæji hjartanlega að hinu smáa og hversdagslega, sem Freyvangsleikhúsið fer hér fallegum höndum um.
Að lokum er vert að minna á það stóra menningarlega hlutverk sem áhugamannaleikhús á borð við Freyvangsleikhúsið gegnir, en það er með elstu áhugamannaleikhúsum landsins. Það kostar listrænan áhuga, elju og vinnusemi rúmlega 50 einstaklinga til þess að sýning sem þessi verði að veruleika og íbúar njóta afrakstursins. Það er ekki sjálfgefið.
Miða á sýninguna má nálgast á tix.is.
Til hamingju með sýninguna, vel gert og áfram Freyvangsleikhúsið!
Elsa María Guðmundsdóttir
Höfundur er með M.A í menningarstjórnun.
Nýjast
-
Eignarhald bænda á jörðum tryggir hag þeirra best
Umræða um jarðir, jarðaviðskipti og kynslóðaskipti í landbúnaði er og á að vera fyrirferðarmikil í umræðu um stöðu sveitanna. Enda var málefnið eitt helsta umræðuefni á haustfundum Bændasamtaka Íslands. Uppkaup og jarðasöfnun fjárfesta og samkeppnisstöðu landbúnaðar. Um stöðu ungra bænda og eldri bænda sem væru að afhenda bú sín til yngri kynslóða. -
Orkumál
Alþingiskosningar ber brátt að garði. Þar skipar undirrituð 2. sætið á lista VG í norðausturkjördæmi. Ég bý á Björgum í Kinn í Þingeyjarsýslu þar sem systir mín og ég tókum við búi 2017 af foreldrum okkar. Þar er mjólkurframleiðsla, umfangsmikil jarðrækt, kornrækt og örfáar kindur.Meðal starfa minna í félagsmálum má nefna formennsku í Samtökum ungra bænda og þá hef ég setið í sveitarstjórn Þingeyjarsveitar frá árinu 2018 og er nú formaður byggðarráðs -
Þakklæti er varla nægilega sterkt lýsingarorð
„Ég þurfti að gera hlé á máli mínu því tárin bara runnu niður kinnarnar,“ segir Marta Kristín Rósudóttir verkefnastjóri hjá Krabbameinsfélagi Akureyrar og nágrennis. Dekurdagar afhentu félaginu alls 6, 7 milljónir króna og hefur upphæðin aldrei verið hærri en nú. Frá árinu 2012 hafa Dekurdagar safnað 37.850.000 kr. fyrir Krabbameinsfélag Akureyrar -
Fjórtándi jólasveinninn hjá Freyvangsleikhúsinu
Fjórtándi jólasveinninn er frumsamið jólaverk eftir Ásgeir Ólafsson Lie sem segir sögu af hinum hefðbundnu jólasveinunum 13 sem og Grýlu, Leppalúða og jólakettinum. Nema í þessu leikverki eru jólasveinarnir ekki bara þrettán heldur er þarna sá fjórtándi sem enginn átti von á. Leikritið verður frumsýnt hjá Freyvangsleikhúsinu á laugardag, 23. nóvember og verður sýnt á aðventunni. -
Dásamlegt og gefandi að starfa í kvenfélagi
„Það er dásamlegt að starfa í kvenfélagi. Þetta er yndislegur félagsskapur, gefandi á allan hátt. Við skemmtum okkur vel, látum gott af okkur leiða en vinnum okkar verk yfirleitt í hljóði og erum ekki að auglýsa það sérstaklega þó við gerum góðverk,“ segir Auður Thorberg formaður Kvenfélagsins Hjálparinnar í Eyjafjarðarsveit. -
Mikil ásókn í íbúðir á vegum Bjargs á Húsavík
Óhætt er að segja að mikill áhugi sé á íbúðum sem Bjarg íbúðafélag er að byggja á Húsavík í samstarfi við Norðurþing, en þetta kemur fram á heimasíðu Framsýnar í dag. -
Litlu jólin á sjó!
Áralöng hefð er fyrir því að áhafnir fiskiskipa Samherja haldi litlu jól í aðdraganda jólanna. Kokkarnir töfra þá fram hverja kræsinguna af annarri. Litlu jól áhafna Kaldbaks og Snæfells voru haldin hátíðleg á dögunum. -
Boðað verkfall lækna mun hafa áhrif á þjónustu SAk.
Félagsmenn í Læknafélagi Íslands hafa samþykkt verkfallsboðun og hafi ekki samist skellur boðað verkfall lækna á eftir nokkra daga eða um miðnætti aðfaranótt mánudagsins 25. nóvember n.k. -
Hvítasunnukirkjan styrkir Hollvinasamtök
Hollvinasamtök Sjúkrahússins á Akureyri fengu afhentan rausnarlegan peningastyrk frá Hvítasunnusöfnuðinum, alls 800 þúsund krónur nýverið.
