4. sept - 11. sept - Tbl 36
Hrútaþukl tekið hátíðlega á Húsavík
Það er hverjum fjáreiganda heilög stund þegar hrútur hans er þuklaður. Aðalsteinn lengst til hægri. Mynd/Aðsend.
Mærudagar á Húsavík verða haldnir um komandi helgi en hátíðin er 30 ára að þessu sinni. Í tilefni tímamótanna má eiga von á sérlega fjölbreyttri dagskrá sem ætti að henta fólki á öllum aldri.
Einn af stórviðburðum Mærudaga er án efa Hrútasýningin eða Hrútaþukl eins og það er jafnan kallað.
Fjáreigendafélag Húsavíkur stendur að viðburðinum en Aðalsteinn Árni Baldursson hefur haldið utan um keppnina frá upphafi. Aðspurður þorði hann ekki að fullyrða að hrútasýningin hafi verið hluti af Mærudögum hvert einasta ár frá upphafi hátíðarinnar en það fari nærri.
Sjarmerandi keppni
Það er að minnsta kosti ekki ofsögum sagt að Hrútasýningin sé orðin ómissandi þáttur í þessari bæjarhátíð Húsavíkinga sem er orðin ein sú stærsta á landinu. „Það er svo mikill sjarmi í kringum þetta og ómissandi þáttur í Mærudögum. Þú sérð að þetta er klukkan 21 á föstudagskvöldi þannig að þetta er besti tíminn,“ segir Aðalsteinn.
Hvað er hrútaþukl?
En fyrir þá sem ekki hafa orðið vitni að hrútasýningunni þá er ekki úr vegi að Aðalsteinn útskýri hvað felist í keppni af þessu tagi. „Fjáreigendur á Húsavík koma saman með sína fallegustu hrúta og Hrútasýningin felst í því að það er keppt um það hver á fallegasta hrútinn. Það eru fengnir tveir dómarar sem eru þekktir fyrir að dæma og þeir velja fallegasta hrútinn til undaneldis,“ útskýrir Aðalsteinn og bætir við að ekkert megi klikka. „Framparturinn þarf að vera góður og það þurfa að vera auka kótilettur í hryggnum og lærasneiðarnar þurfa að vera þykkar og góðar.“
En það er ekki bara læri og hryggur sem er þuklaður og grandskoðaður, það þarf líka að athuga hvað leynist undir skepnunni, því allt snýst um þetta hæfni hrútsins til undaneldis.
„Síðast en ekki síst þá þarfa að vera pungur undir hrútnum, því það eru alveg dæmi um það að hrútar hafa verið punglausir eða með eitt eista. Það er að mörgu að hyggja þegar á að meta hvaða gripur er bestur til undaneldis,“ segir Aðalsteinn léttur í bragði.
Dómgæslan er heldur ekki háð tilviljunum heldur þarf að fylgja kúnstarinnar reglum við þuklið og þá er mikilvægt að hrúturinn sé klaufsnyrtur og almennt vel hirtur.
Aðalsteinn segir engum vafa undirorpið um það að Hrútasýningin sé einn af aðalviðburðum Mærudaga og vekur ætíð mikla athygli. Það hafi meira að segja verið sjónvarpað frá sýningunni.
Það eru tilfinningar í þessu
Innan fjáreigendafélags Húsavíkur er keppninni ekki tekið með léttúð enda gríðalega mikið sem liggur undir.
„Sá sem að sigrar fær eignabikar og montrétt að sjálfsögðu,“ segir Aðalsteinn og leggur áherslu á að montrétturinn skuli ekki vanmetinn og keppnin geti tekið á taugarnar.
„Það eru alveg dæmi um það að fjáreigendur hafa ekki þorað niður fyrir bakka á meðan á keppni stendur en hafa verið í símasambandi til að fá upplýsingar um gang mála. Þetta er alveg gríðarlega mikilvægt fólki. Stundum hefur líka komið fyrir að keppendur hafi hraunað yfir dómara á meðan á keppni stendur en það skal tekið fram að það er ekkert VAR í þessu. Það er bara augnablikið sem gildir,“ segir Aðalsteinn að lokum.
Hrútasýningin fer fram fyrir framan Þekkingarnet Þingeyinga klukkan 21 á föstudagskvöld.
Nýjast
-
Miklar endurbætur á gömlu heimavist Þelamerkurskóla í gangi
Miklar framkvæmdir hafa verið í gangi í Hörgársveit undanfarin misseri sem miða að því að styrkja innviði sveitarfélags þar sem íbúafjölgun hefur verið mikil hin síðari ár. Gagngerar endurbætur standa yfir á gamla heimavistarhúsnæði Þelamerkurskóla og var nú við upphaf skólaárs tekið í notkun nýtt rými þar fyrir unglingadeild skólans. Áður eða í fyrrahaust var enn ein nýja byggingin tekin í notkun við Heilsuleikskólann Álfastein. Þar var horft til framtíðar, pláss er fyrir 90 börn en þau eru kringum 70 um þessar mundir. Stærstu vinnustaðir sveitarfélagsins eru í leik- og grunnskólanum, en þar eru starfsmenn nú samtals 51. Í Hörgársveit búa nú 866 íbúar og er að því stefnt að þeir verði 1001 í það minnsta um mitt ár 2026. -
Umhverfisvænni kostir fundust ekki fyrir nýjan ferlibíl
Leitað verður eftir nýjum ferlibíl fyrir Strætisvagna Akureyrar sem gengur fyrir dísel orkjugjafa og uppfyllir að lágmarki Euro 6 mengunarstaðal. Ekki fundust aðrir umhverfisvænni kostir segir í bókun umhverfis- og mannvirkjaráðs. -
Fataslá sett upp í MA - Kaupum sjaldnar, kaupum notað
Nú má finna fataskiptislá framan við bókasafn Menntaskólans á Akureyri. Fólki er frjálst að koma með fatnað og/eða taka af sláni eftir því hvað hentar hverju sinni. Í tilkynningu frá umhverfisnefnd skólas segir að textíliðnaðurinn sé einn sá umfangsmesti í heimi og að honum fylgi gríðarleg mengun og umhverfisspjöll. -
Nýtt stjórnsýsluhús á Laugum tilbúið
Í dag var merkilegur áfangi í sögu Þingeyjarsveitar þegar nýtt stjórnsýsluhús á Laugum var formlega tilbúið. Ragnheiður Jóna Ingimarsdóttir, sveitarstjóri fékk lyklana afhenta við óformlega athöfn í haust blíðunni. Húsið mun hýsa skrifstofu sveitarfélagsins og þar verða einnig rými sem fyrirtæki, stofnanir og einyrkjar geta nýtt sér. Vonast er til þess að húsið verði iðandi af lífi, suðupottur hugmynda og verkefna þar sem allir eru velkomnir -
Grýtubakkahreppur, Norðurþing og Þingeyjarsveit - Ekki innheimt gjald fyrir ávexti
Ekki verður innheimt gjald fyrir þjónustu mötuneytis Grenivíkurskóla við nemendur skólans fá og með haustinu 2024. Allur matur sem börnin fá í skólanum, morgunmatur, hádegisverður, ávextir eða annað er gjaldfrjáls. Áður var innheimt eitt gjald fyrir allan mat. -
Síðuskóli 40 ára
Eins og fram hefur komið var því fagnað í gær að þá voru 40 liðin frá þvi að Síðuskóli á Akureyri tók til starfa. -
Áætlað að slátra um 88 þúsund fjár á Húsavík
Sláturtíð hófst hjá Kjarnafæði Norðlenska á Húsavík í fyrradag. Áætlað er að hún standi yfir til loka október, ljúki 31. þess mánaðar og á þeim tíma er gert ráð fyrir að slátra á bilinu 87.500 til 88.000 fjár. -
Ekkert ferðaveður á Mývatnsöræfum
Lögreglan á Norðurlandi eystra segir á Facebooksíðu embættisins frá illviðri á Mývatnsöræfum og er færslan svohljóðandi: ,,Lögreglunni á Norðurlandi Eystra voru að berast upplýsingar um mjög slæmt verður á Mývatnsöræfum. Sandstormur og ofsarok. Malbik er að flettast af veginum vestan við Jökulsá á Fjöllum við Grímsstaði. Ökumenn hafa leitað vars með bíla sína á aðeins skjólsælli stöðum. Lögreglumenn sem fóru um svæðið fyrir skammri stundu óskuðu þess að vegfarendur yrðu upplýstir með þessar aðstæður ef nokkur kostur væri. Vegagerðin er einnig að setja inn viðvörun um hættulegar aðstæður á veginum vegna veðurs, á sinn vef í þessum töluðu orðum. Látið endilega vini og kunningja vita ef þið vitið af ferðum fólks þarna efra. Bíðið af ykkur veðrið og fylgist með veðurspá og færð.” -
Sólin skín og vindur blæs
Það er óhætt að segja sem svo að það blási ansi hressilega hér i bæ enda hefur samkvæmt mælum Veðurstofu Íslands vindhraðinn slegið í 27 metra hér í kviðum og þó aðeins hafi lægt s.l. klukkustundina eru enn 10 metrar á klst og fer i 20 metra í kviðum.
Athugasemdir