KA - Þór: Grannaslagurinn er að hefjast
Í dag, laugardag mætast á Akureyrarvelli stórliðin KA og Þór í grannaslag í Inkassodeildinni. Um sannkallaðann toppbaráttuslag er að ræða og má búast við að hart verði barist. Aðeins fjögur stig skilja liðin að þegar 10 umferðir eru spilaðar.
Fyrir mót var KA spáð sigri í deildinni og enn sem komið er hafa þeir staðist pressuna og tróna einir á toppi deildarinnar með fjögurra stiga forystu á næstu lið sem eru Leiknir R. og Þór. Grindavík er fylgir fast á hæla þeirra í 4. sæti með 18 stig. KA sótti sterkt stig til Grindavíkur á þriðjudag, en eru líklega svekktir að hafa ekki tekið öll þrjú stigin eftir að hafa verið 2-0 yfir í hálfleik. Grindvíkingar komu sterkir inn í síðari hálfleik og náðu að jafna 2-2.
„Það er náttúrlega svekkjandi þegar maður er kominn í 2-0 að missa það niður, en þetta er erfiður útivöllur og við tökum stigið,“ sagði Davíð Rúnar Bjarnason fyrirliði KA í samtali við Vikudag.
KA-menn eru á mikilli siglingu og hafa fengið 13 stig út úr síðustu fimm leikjum, þeir hafa raunar ekki tapað í deildinni síðan þeir fengu skell á Ásvöllum í 4-1 ósigri gegn Haukum í annari umferð. Það er jafnframt eini tapleikur liðsins sem af er tímabilsins. Með sigri á laugardag geta KA tryggt stöðu sína á toppi deildarinnar enn frekar.
Vikudagur spurði fyrirliðann hvort menn væru ekki farnir að finna fyrir pressu: „Við setjum pressu á okkur sjálfir og viljum vera í toppbaráttu, við finnum ekki fyrir neinni pressu umfram það. Við ætlum okkur að fara upp, það er okkar markmið, við höfum alltaf sagt það.“ Aðspurður hvernig leikurinn á laugardag færi svaraði hann: „Þetta er náttúrlega leikur sem maður leitar uppi þegar leikjaplanið kemur og bíður spenntur eftir allt sumarið. Hann er extra spennandi í ár þar sem bæði lið eru í toppbaráttu. Þetta verður allavega sigur fyrir brekkuna.“
Þórsarar þurfa nauðsynlega á sigri að halda ef þeir ætla ekki að dragast aftur úr í toppbaráttunni. Liðið tapaði á þriðjudag fyrir Keflavík á heimavelli 1-2. „Stemmningin er bara ágæt í liðinu, það er svekkelsi að tapa en enginn heimsendir,“ segir Sveinn Elías Jónsson fyrirliði Þórs. Þórsarar virðast vera komnir í einhverja lægð eftir annars gott gengi en um síðustu helgi var liðið kjöldregið af Grindvíkingum 5-0 í Grindavík. Í síðustu fimm leikjum hefur Þór náð 9 stigum.
Hefur þetta áhrif á sjálfstraustið? „Það gerir það alltaf þegar maður tapar. Ég hugsa að lið sem vinnur leiki hafi meira sjáfstraust en lið sem tapar það helst alveg í hendur en hinsvegar er þetta svo jöfn deild að yfirleitt eru þessir leikir jafnir hvort sem það eru lið í 12. sæti eða toppbaráttu sem maður er að spila gegn, þesssi Grindavíkurleikur held ég að hafi verið undantekning,“ segir
Sveinn Elías sem er orðinn spenntur fyrir grannaslagnum um helgina. „Það er snilld að fá þennan leik núna, tímasetningin gæti ekki verið betri,“ sagði hann og bætti við: „Ég hef trú á að við vinnum þennan leik, þó það sé alltaf ómögulegt spá fyrir um svona leiki. Þetta eru vanalega x-faktor leikir. Staða liðanna í deildinni skiptir ekki máli eða hvort liðið hefur verið að sigurbraut eða verið að tapa, það hefur það ekki áhrif inn í þennan leik. Það er svona önnur stemmning og allir tilbúnir að gefa allt fyrir málstaðinn.“
Leikurinn fer fram á Akureyrarvelli í dag laugardag klukkan fjögur. -epe
-Vikudagur, 14. júní.
Nýjast
-
„Amaróhúsið“ sett í sölu
Framkvæmdasýslan - Ríkiseignir (FSRE) hefur sett gömlu heilsugæslustöðina á Akureyri, Hafnarstræti 99-101, í sölu ásamt öllu því sem eigninni fylgir. Óskað er eftir tilboði í eignina. Fasteignamat er tæplega 340 milljónir króna og brunabótamat 860 milljónir. -
Dreifingu Dagskrár seinkar í dag
Vegna vandræða i samgöngum milli Reykjavíkur og Akureyrar í nótt seinkar dreifingu á Dagskránni verulega i dag. Blaðið er hinsvegar komið á vefinn og geta þvi áhugasamir skoðað það með þvi að smella á slóðina hér fyrir neðan. https://issuu.com/dagskrain/docs/0225_dagskrain_vefur -
Nýr samningur Akureyrarbæjar og Skákfélags Akureyrar undirritaður
Í gær var undirritaður nýr samningur Akureyrarbæjar við Skákfélag Akureyrar sem hefur það að meginmarkmiði styðja við starf barna og ungmenna og gefa þeim kost á heilbrigðu og metnaðarfullu félags- og æskulýðsstarfi. -
Ferðaþjónustufólk kemur saman
Í upphafi hvers árs er mikið um að vera hjá ferðaþjónustufólki sem kemur saman til að ráðfæra sig við hvert annað, finna nýjar hugmyndir og skapa verðmæti. Mannamót Markaðsstofa landshlutanna er haldið í Kópavogi og samhliða því er heil vika af spennandi viðburðum með mismunandi áherslum. Þar er meðal annars rætt um tækniþróun, ráðstefnur, sjálfbærni og auðvitað markaðssetningu. Nú eru liðin 11 ár frá því að hugmyndin um Mannamót varð til í einu af mörgum samtölum Markaðsstofanna um hvernig mætti efla íslenska ferðaþjónustu og vinna að dreifingu ferðafólks um landið. Þessi hugmynd um að skapa vettvang fyrir landsbyggðarfyrirtækin til að koma saman í höfuðborginni og eiga þar fundi með ferðaþjónustunni er nú orðin að stærsta kynningarviðburði ferðaþjónustunnar og farin að vekja áhuga erlendra ferðaskrifstofa. -
Tunnuskipti í síðustu hverfum bæjarins framundan
Sem kunnugt er standa yfir breytingar á sorphirðukerfi og framundan eru tunnuskipti í síðustu hverfum bæjarins. Til að tryggja sem hraðasta framkvæmd verða núverandi tunnur fyrir almennan úrgang nýttar, og ílátum bætt við eftir þörfum fyrir lífrænan úrgang, pappír og plast. Í sumum tilfellum gætu heimili tímabundið fengið fleiri tunnur en nauðsynlegt er. Mikilvægt er að tryggja að allar tunnur séu staðsettar eða festar þannig að þær fjúki ekki. -
Amtsbókasafnið ,,Wrapped" 2024 - Gestir safnsins voru 88.562 árið 2024 sem er aukning um 6.000 gesti milli ára
,,Þó að margir haldi að bókasöfn sé lítið notuð og lestur sé að minnka sjáum við þetta ekki svo svart og erum bara bjartsýn fyrir framtíðinni. Til dæmis fjölgaði útlánum og heimsóknum frá því árið 2023. Skemmtilegt þótti okkur að sjá að kökuformin lánuðust 270 sinnum, enda er heimsókn á bókasafnið orðinn hefðbundinn liður í kringum veislur hjá mörgum. Mikil stemning að velja form fyrir afmælið sitt." -
Slökkvilið Akureyrar kallað út 4.171 sinni árið 2024
Varðliðið sinnti 3.066 sjúkraflutningum á landi árið 2024, en af þeim voru 29% útkalla í forgangi F1 og F2. Farið var í 282 flutninga út fyrir starfssvæði liðsins, og er það aukning um 38% frá árinu 2023. Fækkun var á erlendum ferðamönnum milli ára um 14%. -
Meistarar strengjanna á sinfóníutónleikum í Hofi
Sunnudaginn 26. janúar flytur Sinfóníuhljómsveit Norðurlands undir stjórn Ross Collins verk eftir þrjá meistara frá ólíkum tímum sem lagt hafa mikið af mörkum til tónlistar fyrir strengjasveit. -
HVAÐ GAMALL NEMUR......
Allt frá því ég man fyrst eftir mér hef ég verið brennandi áhugamaður um bíla og farartæki sem gengu fyrir sprengihreyfli. Mér þóttu stærri vélar alltaf eftirsóknarverðari og dreymdi um að eignast amerískan bíl með hestöflum sem telja mætti í hundruðum.
