Vinnu við nýjar kirkjutröppur lýkur senn
Miklar og ófyrirséðar tafir hafa orðið á vinnu við nýjar kirkjutröppur á Akureyri en nú er fátt sem getur komið í veg fyrir að framkvæmdum ljúki fyrir árslok.
Það sem helst hefur tafið fyrir verkinu eru miklar lekaskemmdir sem komu í ljós í veggjum og þaki undir gömlu tröppunum þar sem áður voru almenningssalerni. Þannig hafa tímamörk hjá ýmsum sem að verkinu komu riðlast og víxlverkun einstakra verkþátta leitt til enn frekari tafa.
Til að tryggja framgang verksins hefur nú verið tjaldað yfir þann hluta þar sem framkvæmdir standa yfir hverju sinni og er sá hluti upphitaður. Iðnaðarmenn munu á næstu dögum og vikum fikra sig smám saman upp að kirkjunni sjálfri þar til verkinu lýkur.
Nú þegar eru þrír neðstu hlutar kirkjutrappanna tilbúnir að mestu, búið að líma granítskífur á þrepin, og að því búnu verða hellur lagðar á stigapallana, komið upp lýsingu í handriðum og stallarnir þökulagðir. Verið er að undirbúa gangsetningu á snjóbræðslukerfi og fljótlega verður skýlið sem er yfir þremur neðstu stigunum tekið í burtu og gengið frá svæðinu umhverfis tröppurnar. Skýlið verður síðan fært ofar og þannig unnið áfram koll af kolli þar til efsta þrepi er náð.
Meðfram þessum framkvæmdum við kirkjuströppurnar hefur stígur frá þeim til suðurs að Sigurhæðum verið endurgerður og búið er að setja upp trausta girðingu með lýsingu við austurbakka gönguleiðarinnar sem gat verið varasöm í hálku og bleytu.
Á sama tíma hafa einnig verið miklar framkvæmdir við Safnaðarheimili Akureyrarkirkju og tengist sú framkvæmd að hluta framkvæmdum við kirkjutröppur þar sem gönguleið upp að Eyrarlandsvegi verður endurgerð og sett handrið við hluta hennar.
Kirkjutröppurnar eru stór hluti af bæjarmynd Akureyrar og Akureyrarkirkja eitt helsta kennileiti bæjarins. Það er því til mikils að vinna að þetta svæði fái notið sín sem best.
Bæjarbúum er þökkuð sú biðlund og sá skilningur sem þeir hafa sýnt framkvæmdaaðilum sem mætt hafa ófyrirséðum hindrunum við að ljúka endurbótum á kirkjutröppunum samkvæmt upphaflegri tímaáætlun. Telja má víst að þegar upp verður staðið verði nýjar kirkjutröppur hin mesta bæjarprýði og stolt fólksins sem bæinn byggir.
Frá þessu segir á heimasíðu Akureyrarbæjar i morgun.
Nýjast
-
Mikil ásókn í íbúðir á vegum Bjargs á Húsavík
Óhætt er að segja að mikill áhugi sé á íbúðum sem Bjarg íbúðafélag er að byggja á Húsavík í samstarfi við Norðurþing, en þetta kemur fram á heimasíðu Framsýnar í dag. -
Litlu jólin á sjó!
Áralöng hefð er fyrir því að áhafnir fiskiskipa Samherja haldi litlu jól í aðdraganda jólanna. Kokkarnir töfra þá fram hverja kræsinguna af annarri. Litlu jól áhafna Kaldbaks og Snæfells voru haldin hátíðleg á dögunum. -
Boðað verkfall lækna mun hafa áhrif á þjónustu SAk.
Félagsmenn í Læknafélagi Íslands hafa samþykkt verkfallsboðun og hafi ekki samist skellur boðað verkfall lækna á eftir nokkra daga eða um miðnætti aðfaranótt mánudagsins 25. nóvember n.k. -
Hvítasunnukirkjan styrkir Hollvinasamtök
Hollvinasamtök Sjúkrahússins á Akureyri fengu afhentan rausnarlegan peningastyrk frá Hvítasunnusöfnuðinum, alls 800 þúsund krónur nýverið. -
Ætla Íslendingar að standa vörð um orkuauðlindir sínar?
Einhver myndi segja að sá bóndi er seldi frá sér allar bestu mjólkurkýrnar væri vitlaus maður. Utan ef tilgangurinn væri að pakka saman, hætta rekstri og selja hæstbjóðanda. -
Norðurorka lækkar samfélagsstyrki á næsta ári
Stjórn Norðurorku hefur samþykkt að lækka styrki en fyrirtækið hefur undanfarin ár veitt styrki til margvíslegra verkefna og málefna. -
Norðurþing Rauði krossinn hættir fatasöfnun
Heimasíða Norðurþings segir frá þvi að Rauði Krossinn í Þingeyjarsýslum hættir allri fatasöfnun þann 26. nóvember 2024. Eftir sem áður geta íbúar í Norðurþingi losað sig við textíl (fatnaður, lök og handklæði, skór, dúkar og gardínur, tuskur og viskastykki) í grenndargáma fyrir textíl sem eru staðsettir á Húsavík, Kópaskeri og Raufarhöfn. -
Stefna flokksins í utanríkismálum
Grunnstef Lýðræðisflokksins er gott samstarf við Nato sem er varnarbandalag og hefur verið hornsteinn í utanríkisstefnu Íslands -
FVSA kannar áhuga stéttarfélaga á Norðurlandi til sameiningar
„Þetta er hugmynd sem vert er að skoða og fróðlegt að sjá hver viðbrögð félaganna verða,“ segir Eiður Stefánsson, formaður Félags verslunar- og skrifstofufólks á Akureyri og nágrenni (FVSA). Nýlega sendi hann erindi til tíu stéttarfélaga á Norðurlandi til að kanna vilja þeirra til samtals um útfærslu á öflugu deildarskiptu stéttarfélagi á svæðinu.
