Verkefni við nýja aðveituæð milli Akureyrar og Hjalteyrar lokið
„Þetta er stór áfangi og gleðilegur,“ segir Hörður Hafliði Tryggvason fagstjóri hita- og vatnsveitu hjá Norðurorku en stóru verkefni sem staðið hefur yfir undanfarin ár við gerð Hjalteyrarlagnar, aðveituæðar milli Akureyrar og Hjalteyrar, er að ljúka nú í vikunni. Kostnaður við verkið nemur ríflega tveimur milljörðum króna.
Það er fimmti og jafnframt síðasti áfangi lagnarinnar sem nú er að klárast, en hafist var handa við fyrsta áfanga árið 2018 þegar lögð var lögn innanbæjar á Akureyri, en aðrir áfangar voru frá Hjalteyri að Ósi og þaðan til Skjaldarvíkur. Fimmti og síðasti áfangi við lagningu nýrrar aðveituæðar var ríflega 5 kílómetra langur og er frá Skjaldarvík að Hlíðarbraut á Akureyri. „Við erum nú í vikunni að tengja lagnir sitt hvoru megin við Síðubraut og þá á eftir að fylla upp í nokkra skurði, en lokafrágangur vegna jarðvinnu verður í vor,“ segir Hörður.
Hann segir að sú lögn sem fyrir var hafi verið of grönn og flutningsgeta aðveitunnar því verið orðin takmarkandi þátt í að nýta nægilega vel vinnslusvæðið á Hjalteyri. „Eldri lögnin bar ekki allt það heita vatn sem bærinn þurfti á að halda á álagstímum og það var kveikjan að því að leggja nýja og stærri lögn. Þessi nýja lögn er hrein viðbót við þá sem fyrir er, en við nýtum þá eldri áfram líka,“ segir Hörður. Á Skjaldarvík var dælustöð sem sett var upp til að auka öryggi og skapa nægan þrýsting á vatnið í lögninni. Umtalsverður kostnaður fylgdi rekstri dælustöðvarinnar en Hörður segir að nú gefist færi á að slökkva á henni.
Rannsóknarholur við Ytri Haga
Jarðhitasvæðið á Hjalteyri hefur staðið undir allri aukningu á hitaveitunni frá árinu 2003 en útlit er fyrir að ekki sé hægt að auka frekar vinnslu þar og er því horft lengra til norðurs eftir meira magni af heitu vatni. Fyrr í vikunni hófst borun á tveimur 500 metra djúpum rannsóknarholum i landi Ytri-Haga sem Norðurorka hefur umráð yfir. Verktaki við þá borun er Ræktunarfélag Flóa og Skeiða og segir Hörður að á bilinu 6 til 7 vikur taki að vinna verkið, en gera megi ráð fyrir töfum vegna veðurs um hávetur. „Við höfum góðar væntingar um að á þessum slóðum sé nægt vatn sem dugar eitthvað áfram, en það kemur auðvitað ekki í ljós fyrr en holurnar hafa verið boraðar,“ segir Hörður.
Heitavatnsnotkun hefur aukist umtalsvert á Akureyri á liðnum árum, raunar tvöfaldast frá árinu 2002. Vissulega hefur íbúðum fjölgað á tímabilinu og íbúum einnig en alls ekki í takt við notkun á heitu vatni. Hörður segir að kerfið sé að eldast og gera megi ráð fyrir að hér og hvar séu lekar, en mestu skiptir eflaust að hver og einn notar meira af heitu vatni nú en var fyrir tveimur áratugum. „Nú erum við að leita eftir vatni talsvert langt frá Akureyri, það fylgir því meiri kostnaður að sækja vatnið æ lengra.“
Þess má geta að nú er Norðurorka farin af stað með vitundarvakningu um stöðu hitaveitu á Akureyri og í nágrenni. Síðustu daga hefur t.d. staðið yfir sýning á Glerártorgi þar sem gestir og gangandi geta kynnt sér leiðir til ábyrgrar orkunotkunar. Á sömu nótum var í liðinni viku frumsýnt nýtt myndband um heita vatnið þar sem notendur eru hvattir til að sóa því ekki. Myndbandið má sjá á heimasíðu Norðurorku og á Facebook-síðu fyrirtækisins.
Nýjast
-
Listasafnið á Akureyri: Opnun, fimmtudagskvöldið 28. nóvember
Fimmtudagskvöldið 28. nóvember kl. 20-22 verða opnaðar tvær sýningar í Listasafninu á Akureyri: Sólveig Baldursdóttir – Augnablik-til baka og Átthagamálverkið: Á ferð um Norðausturland liðinnar aldar. Boðið verður upp á sýningarstjóraspjall með Markúsi Þór Andréssyni, sýningarstjóra Átthagamálverksins, kl. 20.40 og listamannaspjall með Sólveigu kl. 21. -
Íslandsþari með ný áform um þaravinnslu á Húsavík
Íslandsþari óskar eftir að fá úthlutað lóðinni að Búðarfjöru 1 á Húsavík til uppbyggingar húsnæðis til úrvinnslu stórþara. -
Betra veður fyrir íþróttakrakkana okkar!
Á ferð minni um okkar víðfema og fallega kjördæmi hef ég lent í allskyns vandræðum í öllum veðrum nú í nóvember. Ég er sannarlega ekki einn um það enda vegir landsins uppfullir af spennandi frambjóðendum í leit að sem flestum samtölum við fólkið í landinu. Frambjóðendur keppast nú við að birta myndir og myndbönd af skafrenningi, snjókomu, blindbyljum og fleira til. Allt til þess gert að sýna fólki hversu vandasamt það getur verið að ferðast um landið í nóvember. Sem betur fer er bara kosið á fjögurra ára fresti og oftast á vorin. Þess vegna er þetta nú frekar undantekning en hitt að frambjóðendur þurfi að vaða út í þetta veður og þessa færð í atkvæðaleit. -
Nærsamfélagið tekur höndum saman
Jólatónleikar til styrktar Sigrúnu Björgu Aðalgeirsdóttur og fjölskyldu -
Jólamatur fátæka mannsins
Einn af mínum allra uppáhalds fuglum er rjúpan. Rjúpan nam hér land við lok ísaldar fyrir um 10.000 árum og kom upprunalega frá Grænlandi. Hún á sér lengri forsögu hér en við. Mér finnst hún ekki bara falleg, hún er brögðótt, á 3 alklæðnaði og þegar hún ver unga sína, þá sýnir hún vanmetna vitsmuni. -
Hver grípur þig?
„Við vildum að fólk gerði sér grein fyrir hvaða þjónusta er í boði og hvert er hægt að sækja hana þegar aðstoðar er þörf, fólki að kostnaðarlausu. Einnig langar okkur með málþinginu að styrkja samstarfið á milli félaganna, að fulltrúar þeirra séu upplýst um aðra kosti sem eru í boði fyrir fólk og geti bent málum í réttan farveg eða til viðeigandi félagasamtaka,“ segir Erla Lind Friðriksdóttir um málþing sem hún stendur fyrir ásamt frænku sinni Birnu Guðrúnu Árnadóttur. -
Sérútbúinn lögreglubíll til landamæraeftirlits
Embætti Lögreglunnar á Norðurlandi eystra hefur fengið til eignar sérútbúinn lögreglubíl til afnota við landamæraeftirlit. Segja má að þar sé á ferðinni fullbúin landamærastöð á hjólum. Landamæra- og áritunarsjóður Evrópusambandsins greiddi 75% kostnaðar og Dómsmálaráðuneytið 25% og skiptu einnig með sér kostnaði við einn starfsmann í þrjá mánuði síðastliðið sumar. -
Klúbbar styrkja Frú Ragnheiði
Klúbbarnir Ladies Circle 7 og Round Table 15 afhentu Frú Ragnheiði rausnarlegar styrk í vikunni, ómetnalegur styrkur . „Við erum svo innilega þakklát og mun þetta nýtast skjólstæðingum okkar vel segir í tilkynningu, en styrkurinn er að upphæð um 630 þúsund krónur. -
Gjaldfrjáls leikskóli dregur úr álagi og bætir líðan barna
Gjaldfrjáls leikskóli hefur reynst áhrifarík leið til að draga úr álagi í leikskólum, á skólastjórnendur og starfsfólk og hefur jákvæð áhrif á börnin.
