Vel heppnað filippseyskt matar- og skemmtikvöld hjá starfsmannafélagi Útgerðarfélags Akureyringa
Hátt í þrjátíu starfsmenn ÚA rekja ættir sínar til Filippseyja / myndir samherji.is
Starfsfólk Útgerðarfélags Akureyringa og gestir skemmtu sér konunglega sl. laugardagskvöld í matsal félagsins. Starfsmannafélag Útgerðarfélags Akureyringa ( STÚA) efndi til filippseysks matar- og skemmtikvölds en hjá ÚA starfa nærri þrjátíu manns sem rekja uppruna sinn til Filippseyja.
Bethsaida Rún Arnarson hefur starfað hjá ÚA í um þrjátíu ár og er trúnaðarmaður starfsfólks sem er í Einingu-Iðju, auk þess sem hún er í stjórn stéttarfélagsins. Bethsaida segir að undirbúningur matar- og skemmtikvöldsins hafi gengið sérlega vel.
Bethsaida Rún Arnarson
Mikill undirbúningur
„Við hjálpuðumst öll að og skiptum með okkur verkum. Undirbúningurinn hefur staðið yfir í nokkrar vikur, svo sem að æfa þjóðdansa, skipuleggja matarhlaðborðið og fleira. Við hófumst handa við að skreyta salinn eftir vinnu á föstudaginn og markmiðið var að gera hann sem glæsilegastan, þannig að gestirnir hefðu það á tilfinningunni að vera komnir til Filippseyja. Snemma á laugardagsmorgninum var svo byrjað á eldamennskunni og öðrum undirbúningi fyrir veisluna. Þetta tókst allt saman vel og allt var orðið klárt þegar fyrstu gestirnir komu.“
Gestrisni annáluð
Filippseyjar eru annálaðar fyrir ríka matarmenningu, með áhrifum frá öllum heimshornum. Hvert hérað er með sinn stíl í matargerð og gestrisni íbúanna er annáluð. Hrísgrjón eru algeng í matargerð sem grunnur, mikið er um fisk, kjöt og baunir að ótöldum miklu úrvali af alls kyns kryddtegundum. Íbúar Filippseyja eru rúmlega 90 milljónir og eyjarnar eru samtals 7.100 en 880 þeirra eru í byggð.
Þjóðlegur matur og dans
„Við buðum gesti velkomna í anddyri matsalarins klædd þjóðbúningum, sem eru mismunandi eftir sýslum. Við höfðum líka æft þjóðdansa frá nokkrum héruðum, sem var mjög skemmtilegt að sýna. Við vorum með samtals tíu mismunandi rétti á hlaðborðinu og fimm eftirrétti. Við erum öll alsæl með viðtökurnar, margir gestir þökkuðu okkur fyrir góðan mat og skemmtiatriði. Aðstaðan í eldhúsi ÚA er frábær, þannig að allur undirbúningur gekk vel og kvöldið var stanslaus gleði.“
Hvað vita Íslendingar helst um Filippseyjar ?
„ Í sannleika sagt vita þeir almennt ekki mikið en ég er viss um að einhverjir fara að kynna sér Filippseyjar eftir þetta matar- og skemmtikvöld. Við sýndum líka myndbönd, þar sem nokkrir vinsælir ferðamannastaðir voru kynntir og ég vil bara hvetja sem flesta Íslendinga til að kynna sér Filippseyjar.“
Virkilega ánægjuleg kvöldstund
Óskar Ægir Benediktsson formaður STÚA segir að matar- og skemmtikvöldið hafi tekist vonum framar.
„Þetta var virkilega ánægjuleg kvöldstund. Ég átti þess kost að fylgjast með undirbúningnum og hve samheldnin og gestrisnin var einstök. Svona þjóðarkvöld þjappa starfsfólkinu enn betur saman, sem er mikils virði. Ég held að allir gestir kvöldsins hafi fundið vel fyrir hinni annáluðu gestrisni sem ríkir á Filippseyjum.“
Fleiri myndir frá matar- og skemmtikvöldinu má sjá hér fyrir neðan.
Gestum var vel fagnað.
Allir skemmtu sér konunglega
Á góðum skemmtikvöldum er nauðsynlegt að taka myndir
Matsalur ÚA var þétt setinn
Kjötið skorið á diskana
Það er heimasíða Samherja sem fyrst segir frá þessu
Nýjast
-
Frá sjómennskunni á Raufarhöfn í sjávarútvegsfræði
Háskólinn á Akureyri er kominn á fullt og aldrei hafa fleiri stúdentar verið við nám í skólanum. Það sést glögglega á göngum HA þar sem ekki er þverfótað fyrir fólki að vinna, bæði í hóp- og einstaklingsverkefnum. Staðreyndin er sú að margir stúdentar kjósa að stunda nám sitt á staðnum, mæta í kennslustundir og nýta sér aðstöðu háskólans. Þá mæta enn fleiri í lotur sem haldnar eru á staðnum reglulega yfir skólaárið. -
SSNE um Fljótagöng Brýnt þörf á að flýta undirbúningi
Stjórn SSNE hefur skorað á stjórnvöld að bregðast umsvifalaust við þeirri stöðu sem komin er upp á Tröllaskaga vegna nýafstaðinna atburða í kjölfar mikillar úrkomu. Brýn þörf er á að flýta undirbúningi Fljótaganga og tryggja þannig öryggi vegfarenda fyrir Tröllaskaga. -
Þingeyjarsveit Tækifæri á að fjölga óstaðbundnum störfum
Mikil tækifæri í fjölgun óstaðbundinna starfa eru fyrir hendi í Þingeyjarsveit. Góð aðstaða er til staðar í Gíg í Mývatnssveit og nýju stjórnsýsluhúsi á Laugum. Einnig er aðstaða fyrir óstaðbundin störf á Stórutjörnum. -
Vel heppnað filippseyskt matar- og skemmtikvöld hjá starfsmannafélagi Útgerðarfélags Akureyringa
Starfsfólk Útgerðarfélags Akureyringa og gestir skemmtu sér konunglega sl. laugardagskvöld í matsal félagsins. Starfsmannafélag Útgerðarfélags Akureyringa ( STÚA) efndi til filippseysks matar- og skemmtikvölds en hjá ÚA starfa nærri þrjátíu manns sem rekja uppruna sinn til Filippseyja. -
Landssöfnun á birkifræi hófst í Reykhúsaskógi
Átakið Söfnum og sáum birkifræi hófst á degi íslenskrar náttúru 16. september með því að Lionsklúbburinn Sif í Eyjafjarðarsveit stóð fyrir söfnun í Reykhúsaskógi í Eyjafjarðarsveit. Þetta var í fjórða sinn sem klúbburinn efnir til slíks viðburðar og leggur sitt af mörkum til átaksins. Fræsöfnunarfólkið gat svo gætt sér á veitingum í Hælinu í Kristnesi sem hafði sérstaklega opið að þessu tilefni. -
Listasafnið á Akureyri: Fyrsti Þriðjudagsfyrirlestur vetrarins
Þriðjudaginn 24. september kl. 17-17.40 heldur þýski myndlistarmaðurinn og verkefnastjórinn Michael Merkel fyrsta Þriðjudagsfyrirlestur vetrarins undir yfirskriftinni Nobody Has the Intention to Green a Wall. Fyrirlesturinn fer fram á ensku og aðgangur er ókeypis. -
Að kafna úr frekju.
Eitt sinn gekk ég fram á leiði ókunnugs manns. Á steininum hans stóð „menn eiga að hafa vit á því að vera í góðu skapi.” Mér fannst þetta svo gott að ég lagði það á minnið og rifja það gjarnan upp með sjálfri mér þegar ég er ljót í hugsun, sjálfhverf og leiðinleg. Það gerist því miður of oft. Ef auðmýkt er fyrir hendi er hægt að rækta með sér gleði og háttprýði og verða skárri manneskja í dag en í gær. Það er ef til vill ágætis áskorun til okkar allra nú um stundir. -
Hugleiðingar að loknum sigri
Sævar Pétursson framkvæmdastjóri KA skrifaði á Facebook vegg sinn vangaveltur sínar í lok gærdagsins. Vefurinn fékk leyfi Sævars til þess að birta skrif hans. -
Strákarnir héldu draumi mínum lifandi
Völsungur spilar í Lengjudeildinni næsta sumar
