20. nóvember - 27. nóvember - Tbl 47
Þankar gamals Eyrarpúka
Amaro-stjarnan hefur í áratugi verið tákn fyrir komu jólanna fyrir fjölmarga Akureyringa. Mynd: akureyri.is
Um miðja síðustu öld var einn barnaskóli á Akureyri, einn gagnfræðaskóli, tvö kaupfélög, þrjár leigubílastöðvar enda fátt um einkabíla og svo tveir barir: Diddabar og Litlibar sem báðir gerðu út á bindindi og fagurt líferni í hvívetna enda þótt einhverjir þættust merkja þar óreglu endrum og sinnum – einkum þegar togarar voru í höfn. Þá var oft gott að læðast inn á barina og kaupa Valash, Lindubuff og bolsíur, allt eftir kaupgetu hvers dags sem venjulega var í beinum tengslum við hvað tókst að selja mörg eintök af Degi þá vikuna á kaupfélagshorninu við brunahanann stóra.
Sumarið leið, haustið tók við og stutt í jólin. Fyrstu teikn þeirra birtust þegar kaupfélagsstjarnan var fest upp milli Hótel KEA og aðalstöðva KEA. Í kjölfarið kom svo Amaróstjarnan góða þvert yfir Hafnarstræti. Þarna stóðum við krakkarnir og dáðumst að þessum ljósum prýddu stjörnum sem boðuðu komu jólanna. Snjór hafði kyngt niður og mjólkurbílar komust því hvergi en bændur tóku það ráð að brjótast sjálfir í fannferginu með mjólkina í Samlagið á sleðum sem hestar drógu héðan og þaðan úr fjósum Eyjafjarðar. Hrossin bruddu mélin ákaft þegar þau streittust með sleðana í eftirdragi inn í bæinn því þau vissu að fimm stjörnu hestahótel beið þeirra - hótel sem átti engan sinn líka með tilheyrandi viðurgjörningi og atlæti. Þá var gaman að koma við á hestahóteli Carolínu Rest við hliðina á kirkjutröppunum á leiðinni í skólann og virða fyrir sér sveitt hrossin sem dampaði af þar sem þau hámuðu í sig ilmandi töðuna af áfergju. Fyrir utan voru húsbændur þeirra að taka út í kaupfélaginu eitt og annað til heimabrúks og spjalla við aðra bændur og innanbúðarfólk um lífið, tilveruna og aðra Framsóknarpólitík!
Í endurminningunni er þetta allt vafið upphafinni draumsýn þar sem fátt var skemmtilegra en að ráfa í snjónum í fólksmergðinni fyrir jólin milli búða sunnan frá Verslun Eyjafirði, fram hjá kaupfélagsbúðunum, Vöruhúsinu í París, Bókabúð Rikku, Amaró, Braunsverslun og norður til Pöntunarfélagsins fyrir vestan hið ráðhúslausa Ráðhústorg. Á miðju torginu var tréð mikla, sem í mínum huga var sjálft skilningstré góðs og ills enda vitni að hinni fjölbreyttu flóru mannlífsins sem blasti við til allra átta í miðbænum. Tréð atarna bjó yfir mörgum rómantískum leyndarmálum þegar vel fór á með fólkinu sem kom af böllunum á Hótel Norðurlandi og Alþýðuhúsinu. Einnig sá það ýmislegt misjafnt og jafnvel hroðalega atburði sem nauðsyn bar til að halda leyndum því annars var hætta á upplausn í þessu litla samfélagi með ófyrirsjáanlegum afleiðingum. Þess vegna gekk sú flökkusaga fjöllum hærra að þeir sem óttuðust lausmælgi trésins hafi beitt sér fyrir því að það var hoggið niður og kastað upp á hauga. Sagt er að mörgum hafi létt ákaflega þegar það var fjarlægt og þeir hinir sömu fengið aftur lífslöngunina sem skertist jafnan þegar þeir litu tréð sem geymdi leyndarmálin óbærilegu. Ekki er vitað um sannindi þessarar kenningar en miðað við öll ævintýrin, sem gerðust í minni æsku á Akureyri er þessi söguskýring ekkert ótrúlegri en margt af því sem þar gerðist í raunveruleikanum.
Ingólfur Sverrisson
Nýjast
-
Eignarhald bænda á jörðum tryggir hag þeirra best
Umræða um jarðir, jarðaviðskipti og kynslóðaskipti í landbúnaði er og á að vera fyrirferðarmikil í umræðu um stöðu sveitanna. Enda var málefnið eitt helsta umræðuefni á haustfundum Bændasamtaka Íslands. Uppkaup og jarðasöfnun fjárfesta og samkeppnisstöðu landbúnaðar. Um stöðu ungra bænda og eldri bænda sem væru að afhenda bú sín til yngri kynslóða. -
Orkumál
Alþingiskosningar ber brátt að garði. Þar skipar undirrituð 2. sætið á lista VG í norðausturkjördæmi. Ég bý á Björgum í Kinn í Þingeyjarsýslu þar sem systir mín og ég tókum við búi 2017 af foreldrum okkar. Þar er mjólkurframleiðsla, umfangsmikil jarðrækt, kornrækt og örfáar kindur.Meðal starfa minna í félagsmálum má nefna formennsku í Samtökum ungra bænda og þá hef ég setið í sveitarstjórn Þingeyjarsveitar frá árinu 2018 og er nú formaður byggðarráðs -
Þakklæti er varla nægilega sterkt lýsingarorð
„Ég þurfti að gera hlé á máli mínu því tárin bara runnu niður kinnarnar,“ segir Marta Kristín Rósudóttir verkefnastjóri hjá Krabbameinsfélagi Akureyrar og nágrennis. Dekurdagar afhentu félaginu alls 6, 7 milljónir króna og hefur upphæðin aldrei verið hærri en nú. Frá árinu 2012 hafa Dekurdagar safnað 37.850.000 kr. fyrir Krabbameinsfélag Akureyrar -
Fjórtándi jólasveinninn hjá Freyvangsleikhúsinu
Fjórtándi jólasveinninn er frumsamið jólaverk eftir Ásgeir Ólafsson Lie sem segir sögu af hinum hefðbundnu jólasveinunum 13 sem og Grýlu, Leppalúða og jólakettinum. Nema í þessu leikverki eru jólasveinarnir ekki bara þrettán heldur er þarna sá fjórtándi sem enginn átti von á. Leikritið verður frumsýnt hjá Freyvangsleikhúsinu á laugardag, 23. nóvember og verður sýnt á aðventunni. -
Dásamlegt og gefandi að starfa í kvenfélagi
„Það er dásamlegt að starfa í kvenfélagi. Þetta er yndislegur félagsskapur, gefandi á allan hátt. Við skemmtum okkur vel, látum gott af okkur leiða en vinnum okkar verk yfirleitt í hljóði og erum ekki að auglýsa það sérstaklega þó við gerum góðverk,“ segir Auður Thorberg formaður Kvenfélagsins Hjálparinnar í Eyjafjarðarsveit. -
Mikil ásókn í íbúðir á vegum Bjargs á Húsavík
Óhætt er að segja að mikill áhugi sé á íbúðum sem Bjarg íbúðafélag er að byggja á Húsavík í samstarfi við Norðurþing, en þetta kemur fram á heimasíðu Framsýnar í dag. -
Litlu jólin á sjó!
Áralöng hefð er fyrir því að áhafnir fiskiskipa Samherja haldi litlu jól í aðdraganda jólanna. Kokkarnir töfra þá fram hverja kræsinguna af annarri. Litlu jól áhafna Kaldbaks og Snæfells voru haldin hátíðleg á dögunum. -
Boðað verkfall lækna mun hafa áhrif á þjónustu SAk.
Félagsmenn í Læknafélagi Íslands hafa samþykkt verkfallsboðun og hafi ekki samist skellur boðað verkfall lækna á eftir nokkra daga eða um miðnætti aðfaranótt mánudagsins 25. nóvember n.k. -
Hvítasunnukirkjan styrkir Hollvinasamtök
Hollvinasamtök Sjúkrahússins á Akureyri fengu afhentan rausnarlegan peningastyrk frá Hvítasunnusöfnuðinum, alls 800 þúsund krónur nýverið.
