Menntaskólinn á Akureyri - Gamalt bollastell hluti af langri jólahefð
Jólakaffi starfsfólks MA á aðventu er tæplega 70 ára gömul hefð. Hér áður fyrr var opinber dagur jólakaffiboðsins 19. desember, fæðingardagur Þórarins Björnssonar (1905-1968) fyrrverandi skólameistara. Boðið var upp á fyrsta jólakaffið árið 1955 á 50 ára afmælisdegi Þórarins. Nú sem fyrr kemur núverandi og fyrrverandi starfsfólk skólans saman ásamt mökum að kvöldlagi á aðventu í Gamla skóla til að skrafa og njóta hátíðlegra veitinga.
Ilmurinn af flatbrauði með hangikjöti og kaffiangan, klæðin fín og kaffistellið skapa hátíðlega stemningu fyrir þau sem boðið sækja. Stellið er sjaldan dregið fram og því um sannkallað sparistell að ræða. Það er eitthvað notalegt við það að súpa heitt súkkulaði af bolla sem dreginn hefur verið fram af sama hátíðlega tilefninu áratugum saman. Drekka í sig söguna. Stellið er pólskt af gerðinni Chodziez, ljósdrapplitað með ljósrauðum rósagreinum og gyllingu. Chodziez á sér langa sögu en rekja má hana aftur til ársins 1852. En hversu gamalt er sparistellið í Menntaskólanum á Akureyri? Mögulega leynist svarið í gamalli fundargerð frá kennarafundi Gagnfræðaskólans þann 4. febrúar árið 1926. Þáverandi skólameistari Sigurður Guðmundsson lagði fram tillögu á fundinum þess efnis að skólinn hætti að bjóða til kaffisamsætis nema fjárfest yrði í „bollapörum og öðrum glervarningi“. Skólinn væri hættur að fá bollastell að láni í bænum eins og tíðkast hefði og kaffiboðum í skólanum væri því sjálfhætt. „Lagði skólameistari til, að varið væri úr skólasjóði kr. 180,00 til kaupa á 120 bollapörum og kökudiskum, til þess að nota í kaffisamsætum heimavistar og skólans.“ Tillagan var samþykkt af öllum viðstöddum. Undir fundargerðina skrifa auk Sigurðar þeir Árni Þorvaldsson, Brynleifur Tobíasson og Guðmundur G. Bárðarson.
Fundargerðin rímar við stöðuna í dag því stellið samanstendur af bollapörum og kökudiskum. Þá hefur nýleg talning á diskunum leitt í ljós að þeir eru 130 talsins sem er ekki fjarri fjöldanum sem tilgreindur er í fundargerðinni. Á hinn bóginn virðast heimildir á veraldarvefnum gefa til kynna að Chodziez hafi tekið vörumerkið sem brennt er á sparistellið í notkun árið 1947. Velta má fyrir sér hvort það hafi verið tekið í notkun á aðventu árið 1955 þegar hefðin hófst. Þó nákvæmur aldur liggi ekki fyrir er ljóst að sparistellið í MA er órjúfanlegur hluti af langri hefð í aðdraganda jóla.
Nýjast
-
Bernskuminningar Hrefnu Hjálmarsdóttur
Á björtum og fallegum sunnudegi fór ég í heimsókn til Hrefnu Hjálmarsdóttur og ræddi við hana um hátíðar bernskuminningar hennar. Hrefna, sem fædd er árið 1943, ólst upp í Vesturbænum í Reykjavík. -
Jólahugvekja - Máttur trausts, einlægni og kærleika.
Það er komið að því. Undanfarnar vikur höfum við leyft okkur að undirbúa jólin, og undirbúa okkur sjálf undir jólin. Einhver okkar hafa látið jólalögin koma sér í rétta skapið, eða lagt sig fram um að umbera þau. Ég og fleiri tókum þátt í Whamageddon, reyndum að lifa aðventuna af án þess að heyra Last Christmas með gæðadrengjunum í Wham. Ég tórði ekki lengi en það er í lagi, þeir eru ágætir. -
Gleðileg jól!
Með þessum skemmtilegu myndum sem teknar voru á jólatrésskemmtun Skógræktarfélags Eyjafjarðar um liðna helgi sendir starfsfólk Vikublaðsins sínar bestu óskir til lesenda um gleðileg jól! -
Tónninn í þögninni.
Fyrir nokkrum árum kom fram hugtakið núvitund. Líkt og Íslendinga er siður helltum við okkur á kaf í málið og núvitund varð nýjasti plásturinn. Bjargráðið við óhófinu sem við höfum tileinkað okkur og kapphlaupinu um allt og ekkert. Óhóf kostar mikla peninga sem kalla á óhóflega vinnu og óhóf leiðir af sér heilsubrest, ekki síst andlega. Núvitund var lausnin við vanlíðan okkar svo við skelltum henni ofaná allt hitt. Skárum ekkert niður og héldum keppninni áfram. -
Hátíðarhefðir hjá prestum -Munur á helgihaldspresti og sjúkrahússpresti á jólunum
Jólin er hátíð sem margir þekkja og margir hafa sínar hefðir um jólin. Í guðspjöllunum kemur fram að María og Jósef fæddu barn sem var talið barn Guðs. -
Gul viðvörun í veðrinu
Lögreglan á Norðurlandi eystra sendi út tilkynningu fyrir skömmu og varar þar við veðri sem skella mun á okkur seinna í dag og standa fram á nótt. -
Aftur heim í búðina
Ungur og framsækinn rekstrarstjóri Hríseyjarbúðarinnar er Gabríel Ingimarsson, 25 ára Hríseyingur sem fluttist aftur á bernskustöðvarnar til þess að taka við rekstri verslunarinnar, -
Það á að gefa börnum brauð að bíta í á jólunum -Laufabrauð hátíðarmatur Íslendinga
Laufabrauð hefur verið hátíðarmatur íslendinga í áranna raðir. Talið er að elsta heimildin um laufabrauð sé frá 1772. Þá hélt Bjarni Pálsson landlæknir veislu heima hjá sér þar sem meðal annars var borið fram laufabrauð. -
SUNNA BJÖRGVINSDÓTTIR ÍSHOKKÍKONA ÁRSINS 2024
Sunna Björgvinsdóttir hefur verið valin íshokkíkona ársins 2024 af stjórn Íshokkísambands Íslands
