Hermannsbúð tekin í notkun við Útgerðarminjasafnið á Grenivík
Hermannsbúð var tekin í notkun við Útgerðarminjasafnið á Grenivík í tengslum við Grenivíkurgleði fyrir skemmstu. Þar með er Hermann TH 34, hundrað ára súðbyrðingur á heimsminjaskrá kominn í eigið húsnæði.
Útgerðarminjasafnið á Grenivík, sjálfseignarfélag, var opnað 16. júlí árið 2009. Það er í beitingaskúr sem heitir Hlíðarendi og var byggður 1920 fyrir Stefán Stefánsson á Miðgörðum. Safnið hefur að geyma áhöld og muni sem tilheyrðu línuútgerð eins og hún var á fyrri hluta síðustu aldar. „Verkmenningu sem nú er horfin,“ segir Björn Ingólfsson sem sæti í stjórn safnsins.
Metaðsókn í júlí
Safnið er opið yfir sumarmánuðina þrjá, júní, júlí og ágúst frá 13 til 17 og segir Björn aðsókn fara eftir veðri. Sumarið 2022 sóttu um 1.200 manns safnið en gestir voru aðeins færri í fyrrasumar. Nú í júlí síðastliðnum komu 693 gestir á Útgerðarminjasafnið og er það met.
„Gestum sem muna ekki þessa tíma og þekkja ekki störfin finnst þetta áhugavert safn. En ekki síður þeim sem sjá þarna gamla kunningja eins og línubala og stokktré, gogg og skelplóg, sjóhatt og sjóstakk. Það sem mest er myndað er þó fiskurinn sem hangir til þurrkunar á vesturgaflinum. Útlendum ferðamönnum finnst það afar merkilegt,“ segir Björn.
Ekki um annað að ræða en byggja yfir bátinn
Einn af þeim safngripum sem merkastir eru í safninu er sexæringurinn Hermann TH 34 sem Sigfús Þorsteinsson í Kálfsskinni byggði inni í Hlíðarenda 1921. Hann hafði staðið úti nær þrjá áratugi og var farinn að fúna og láta mjög á sjá. Kristján Ben Eggertsson á Húsavík tók hann undir sinn verndarvæng og gerði eins og nýjan að sjá.
Um það leyti voru norrænir súðbyrðingar teknir á heimsminjaskrá og þarna var einn úr þeirra hópi, hundrað ára gamall. Björn segir hvergi hafa verið pláss fyrir bátinn inni þannig að ekki hafi verið um annað að ræða en byggja yfir hann. „Það var tekin ákvörðun um að byggja Hermannsbúð í maí árið 2021 þó kassi safnsins væri tómur,“ segir Björn, en þremur árum síðar var húsið tilbúið og Hermann komin inn. Það segir hann fyrst og fremst megi þakka gjafmildum styrkendum verksins.
Sýningin á Hermanni var formlega opnuð á Grenivíkurgleði 9. ágúst. Guðný Sverrisdóttir formaður stjórnar Útgerðarminjasafnsins flutti stutta tölu, það gerði líka séra Pálmi Matthíasson standandi um borð í þessum bát langafa síns sem hann hafði sjálfur róið á um tíma. Gestum, sem voru kringum sjötíu, var boðið upp á harðfisk með smjöri og drykki til að renna honum niður.
Fanney Hauksdóttir arkitekt teiknaði húsið, Trégrip ehf byggði, Jóhann Einarsson sá um raflagnir.
Nýjast
-
Eignarhald bænda á jörðum tryggir hag þeirra best
Umræða um jarðir, jarðaviðskipti og kynslóðaskipti í landbúnaði er og á að vera fyrirferðarmikil í umræðu um stöðu sveitanna. Enda var málefnið eitt helsta umræðuefni á haustfundum Bændasamtaka Íslands. Uppkaup og jarðasöfnun fjárfesta og samkeppnisstöðu landbúnaðar. Um stöðu ungra bænda og eldri bænda sem væru að afhenda bú sín til yngri kynslóða. -
Orkumál
Alþingiskosningar ber brátt að garði. Þar skipar undirrituð 2. sætið á lista VG í norðausturkjördæmi. Ég bý á Björgum í Kinn í Þingeyjarsýslu þar sem systir mín og ég tókum við búi 2017 af foreldrum okkar. Þar er mjólkurframleiðsla, umfangsmikil jarðrækt, kornrækt og örfáar kindur.Meðal starfa minna í félagsmálum má nefna formennsku í Samtökum ungra bænda og þá hef ég setið í sveitarstjórn Þingeyjarsveitar frá árinu 2018 og er nú formaður byggðarráðs -
Þakklæti er varla nægilega sterkt lýsingarorð
„Ég þurfti að gera hlé á máli mínu því tárin bara runnu niður kinnarnar,“ segir Marta Kristín Rósudóttir verkefnastjóri hjá Krabbameinsfélagi Akureyrar og nágrennis. Dekurdagar afhentu félaginu alls 6, 7 milljónir króna og hefur upphæðin aldrei verið hærri en nú. Frá árinu 2012 hafa Dekurdagar safnað 37.850.000 kr. fyrir Krabbameinsfélag Akureyrar -
Fjórtándi jólasveinninn hjá Freyvangsleikhúsinu
Fjórtándi jólasveinninn er frumsamið jólaverk eftir Ásgeir Ólafsson Lie sem segir sögu af hinum hefðbundnu jólasveinunum 13 sem og Grýlu, Leppalúða og jólakettinum. Nema í þessu leikverki eru jólasveinarnir ekki bara þrettán heldur er þarna sá fjórtándi sem enginn átti von á. Leikritið verður frumsýnt hjá Freyvangsleikhúsinu á laugardag, 23. nóvember og verður sýnt á aðventunni. -
Dásamlegt og gefandi að starfa í kvenfélagi
„Það er dásamlegt að starfa í kvenfélagi. Þetta er yndislegur félagsskapur, gefandi á allan hátt. Við skemmtum okkur vel, látum gott af okkur leiða en vinnum okkar verk yfirleitt í hljóði og erum ekki að auglýsa það sérstaklega þó við gerum góðverk,“ segir Auður Thorberg formaður Kvenfélagsins Hjálparinnar í Eyjafjarðarsveit. -
Mikil ásókn í íbúðir á vegum Bjargs á Húsavík
Óhætt er að segja að mikill áhugi sé á íbúðum sem Bjarg íbúðafélag er að byggja á Húsavík í samstarfi við Norðurþing, en þetta kemur fram á heimasíðu Framsýnar í dag. -
Litlu jólin á sjó!
Áralöng hefð er fyrir því að áhafnir fiskiskipa Samherja haldi litlu jól í aðdraganda jólanna. Kokkarnir töfra þá fram hverja kræsinguna af annarri. Litlu jól áhafna Kaldbaks og Snæfells voru haldin hátíðleg á dögunum. -
Boðað verkfall lækna mun hafa áhrif á þjónustu SAk.
Félagsmenn í Læknafélagi Íslands hafa samþykkt verkfallsboðun og hafi ekki samist skellur boðað verkfall lækna á eftir nokkra daga eða um miðnætti aðfaranótt mánudagsins 25. nóvember n.k. -
Hvítasunnukirkjan styrkir Hollvinasamtök
Hollvinasamtök Sjúkrahússins á Akureyri fengu afhentan rausnarlegan peningastyrk frá Hvítasunnusöfnuðinum, alls 800 þúsund krónur nýverið.
