Geirneglt – bók um Tréverk á Dalvík
Sextíu ára saga byggingarfyrirtækisins Tréverks á Dalvík er komin út í bókinni Geirneglt sem Óskar Þór Halldórsson hefur skrifað. Útgefandi er Svardælasýsl forlag. Þetta er mikil bók að vöxtum, um 300 síður í stóru broti og ríkulega myndskreytt af gömlum og nýjum myndum.
Þetta rótgróna byggingarfyrirtæki var stofnað á Dalvík 1. október 1962. Fyrstu áratugina var áherslan á að sinna heimamarkaði á Dalvík og í nærsveitum en síðustu áratugina hefur fyrirtækið einnig haslað sér völl í fjölbreyttum og stórum sem minni verkum utan byggðarlagsins, fyrst og fremst á Akureyri.
Félagið stofnuðu Dalvíkingarnir Aðalberg Pétursson, Bragi Jónsson, Hallgrímur Antonsson og Ingólfur Jónsson og Sveinn Jónsson í Kálfsskinni á Árskógsströnd. Ingólfur var fyrsti framkvæmdastjóri Tréverks og gegndi starfinu til ársins 1981 en þá tók Bragi Jónsson við og var framkvæmdastjóri í átta ár, til ársins 1989 er Björn Friðþjófsson, núverandi framkvæmdastjóri, tók við. Auk Björns eru núverandi eigendur félagsins Guðmundur Ingvason, Hafþór Gunnarsson, Ívar Örn Vignisson, Kristján Elí Örnólfsson og Rögnvaldur Skíði Friðbjörnsson.
„Ég leitaði víða ritaðra heimilda og auk þeirra ræddi ég við fjölmarga sem lögðu grunninn að fyrirtækinu og hafa starfað lengi hjá því og einnig núverandi starfsmenn. Þetta hefur verið bráðskemmtilegt ferðalag og ég er mjög ánægður með hvernig til hefur tekist. Mér finnst þetta vera falleg og stílhrein bók og ég er ánægður með það. Í þeim bókum og ritum sem ég hef sent frá mér legg ég áherslu á að gefa myndunum gott rými því staðreyndin er sú að myndir segja svo miklu meira en mörg orð. Og það á ekki síst við um byggingarlist. Það eru margar gamlar myndir í bókinni sem sumar hafa aldrei áður sést og einnig eru flottar drónamyndir af mörgum af stærri byggingum Tréverks sem Hilmar Friðjónsson tók fyrir bókina,“ segir Óskar Þór Halldórsson.
Geirneglt verður hvorki seld í bókaverslunum né annars staðar. Í tilefni af 60 ára afmælinu fyrir rösku ári síðan vill Tréverk gefa bókina öllum sem áhuga hafa á þessari sögu, á meðan birgðir endast. Þeim sem áhuga hafa að eignast bókina er bent á að hafa samband við Tréverk á Dalvík og einnig verður hægt að nálgast bókina í versluninni Víkurkaup á Dalvík frá og með næsta mánudegi, 27. nóvember. Óskar Þór og stjórnendur Tréverks verða á mánudaginn í Víkurkaup kl. 15-17 og árita og afhenda bókina.
Óskar Þór Halldórsson skráði.
Bygging orlofshúsanna á Illugastöðum undir lok sjöunda áratugarins var fyrsta stóra verkefni Tréverks.
Tréverk byggði bæði Sundlaug Dalvíkur og áfast íþróttahús.
Stærsta verkefni Tréverks á Akureyri var bygging fjölbýlis- og raðhúsa á Búsetareitnum í Naustahverfi.
Tréverk byggði bróðurpart skólahúsa Dalvíkurskóla.
Nýjast
-
Fjármagn í hugmyndavinnu við 50 metra innilaug áætluð árið 2028
Ellert Örn Erlingsson forstöðumaður íþróttamála hjá Akureyrarbæ segir að í framkvæmdaáætlun Akureyrarbæjar sé gert ráð fyrir fjármagni árið 2028 til að fara í formlega vinnu við að skoða möguleika og hugmyndir um 50 metra innisundlaug á Akureyri. „Það verður spennandi og skemmtilegt verkefni,“ segir hann. Um tíðina hafi af og til verið umræður við og innan Akureyrarbæjar um hugmyndir um nýja 50 metra innisundlaug. -
Sálfræðingur með merkan feril í Fantasy Premier League að baki
Vísindafólkið okkar — Árni Gunnar Ásgeirsson Vísindafólkið okkar er mánaðarleg kynning á vísindafólkinu okkar. Árni Gunnar Ásgeirsson, deildarforseti Sálfræðideildar, er vísindamanneskjan í október. -
Gleðilega töfrandi kosningabaráttu
Snörp og spennandi kosningabarátta er að hefjast og eru stjórnmálaflokkar í óðaönn að draga fram helstu stefnur og forgangsmál. Ýmislegt bendir til þess, eins og oft áður, að komandi kosningar muni að þónokkru leyti snúast um efnahagsmál og fjármál heimila og fyrirtækja. Verðbólga og vextir bíta fast og fólk vill svör um framtíðina. Eðlilega. -
Geðverndarfélag Akureyrar fagnar 50 ára afmæli
„Geðverndarfélag Akureyrar hefur ekki verið mjög áberandi undanfarin ár, en á sér engu að síður merka sögu og hefur staðið fyrir mikilvægum framförum í geðheilbrigðismálum í bænum og ýmislegt sem til bóta er í þessum viðkvæma málaflokki,“ segir Valdís Eyja Pálsdóttir formaður Geðverndarfélags Akureyrar. Félagið var stofnað 15. desember árið 1974 og verður því 50 ára gamalt innan tíðar. Haldið verður upp á tímamótin næstkomandi laugardag. -
Verðandi sjávarútvegsfræðingar kynna sér starfsemi Samherja til sjós og lands
Hátt í fjörutíu nemendur í sjávarútvegsfræðum við Háskólann á Akureyri hafa á undanförnum dögum heimsótt skip og landvinnslu Samherja. Nemendur auðlindadeildar skólans hafa um langt árabil átt þess kost að skoða og kynnast starfsemi félagsins, sem hluta námsins. Magnús Víðisson brautarstjóri segir afar mikilvægt að öflug sjávarútvegsfyrirtæki séu starfandi í námunda við skólann, sem geri nemendum kleift að kynnast betur sjávarútvegi og haftengdri starfsemi. -
Aðeins fleira fé slátrað þetta haustið miðað við í fyrra
„Heilt yfir hefur gengið mjög vel, auðvitað hafa rafmagnstruflanir, nettruflanir, veðurtruflanir og ýmislegt af því tagi, stungið sér niður hjá okkur, en sem betur fer gekk allt upp að lokum,“ segir Sigmundur Hreiðarsson framleiðslustjóri Kjarnafæði Norðlenska á sláturhúsinu á Húsavík. -
Að þora að vera hræddur
Nú haustar og í haustmyrkrinu leynast oft myrkraverur og alls konar furðuleg fyrirbæri sem skjóta okkur stundum skelk í bringu. Flest tengjast þau reyndar hrekkjavöku og ýmiskonar skálduðum hryllingi þannig að það er lítið mál að sýna hugrekki og láta sem ekkert sé. Eða hvað, erum við kannski hræddari en við sýnumst, og hvenær erum við annars hugrökk? -
Ferðast landa á milli til að taka þátt í lotu Viðskiptadeildar
Í þarsíðustu viku var lota hjá Viðskiptadeild og þá gafst stúdentum tækifæri á að hitta kennara, samstúdenta og annað starfsfólk Háskólans. Þannig tengjast þeir betur innbyrðis og í lotum er horfið frá hefðbundinni kennslu, til dæmis með því að bjóða gestum úr atvinnulífinu að vera með innlegg í námskeiðum. -
Gefur lífinu aukalit og við hefðum alls ekki viljað missa af honum
„Rúben hefur verið okkur dýrmætur kennari í lífinu og gefið því fallegan auka lit. Við hefðum alls ekki vilja missa af honum,“ segir Arnheiður Gísladóttir móðir Rúbens Þeys, sem fæddist í janúar árið 2020, með Downs heilkenni. Október er mánuður vitundarvakningar um Downs heilkenni á alþjóðavísu. Einstaklingar sem fæðst hafa með heilkennið hafa fylgt mannkyni frá upphafi vega. Þeim fer fækkandi og um tíma hélt Arnheiður að Rúben Þeyr yrði með þeim síðustu hér á landi sem fæddist með heilkennið. Sú hafi þó ekki orðið raunin. Faðir Rúbens er Vífill Már Viktorsson smiður og átti Arnheiður fyrir Karítas Von sem verður 11 ára gömul í nóvember. Fjölskyldan býr á Akureyri.
