20. nóvember - 27. nóvember - Tbl 47
„Lofið mér að klára áður en þið klárið allt frá mér.”
Þuríður Bjarnadóttir á mynd frá árinu 1897 Það var Bretinn W.C. Collingwood sem tók myndina
Ingólfur Sverrisson skrifar
Flest eigum við góðar minningar um ömmur okkar og afa. Sjálfur var ég svo heppinn að kynnast langömmu minni í föðurætt, Þuríði Bjarnadóttur, sem ég er sannfærður um að hafi verið með merkilegri konum. Meira að segja veitti hinn frægi Breti W.C. Collingwood henni athygli árið 1897 og tók mynd af henni sem enn lifir með þjóðinni og fylgir þessum þönkum. Myndin sú arna hefur víða birst og var eitt sinn lögð fram í samræmdum prófum og nemendum falið að skrifa hugleiðingar um konuna. Þarna hafði Úllí amma – eins og við kölluðum hana jafnan – þegar eignast tvö börn með langafa, Gunnlaugi Sigurðssyni, og bætti síðan við sex. En örlögin voru miskunnarlaus þegar fjórar dætur þeirra létust á sex árum úr berklum á aldrinum fimmtán til tuttugu og sex ára. Allar voru þær gjörvilegar og miklar efniskonur. Svona gríðarlegt áfall hefði brotið niður margar mæðurnar en Úllí amma bar harm sinn í hljóði og nýtti mannkosti sína og góða lund til að vinna sig og sína út úr sorginni og horfa fram á veginn.
Hún bjó lengst af á Svalbarðseyri en síðustu árin á Ólafsfirði og Akureyri hjá dóttur og tengdasyni. Þar lífgaði hún upp á tilveruna sem náði nýjum hæðum þegar hún bakaði sínar frægu pönnukökur. Var þá gjarnan safnast saman í kringum hana og hver reyndi að ná í eina og eina en þá sagði hún brosandi „Lofið mér að klára áður en þið klárið allt frá mér.” Svo settist hún á stól, krækti í pilsið niður við ökkla, vafði það upp í nára og seildist undir sokkafaldinn og dró upp neftópaksglas sem þar var í vasaklút innanlærs; tók síðan hraustlega í nefið með nautnasvip. Allt eins eðlilegt og verið gat enda tilgerð ekki til í hennar orðabók.
Þegar nýir tímar runnu upp og unga fólkið fór að tileinka sér ýmsa siði sem eldri kynslóðin var lítið hrifin af, sló Úllí amma sér á lær og sagði stundarhátt: „Ja, svei mér þá - ef ég væri ung núna myndi ég áreiðanlega bæði drekka og reykja.” Þannig var hún jákvæð gagnvart nýjum siðum og straumum enda þótt hún gerði sér mæta vel grein fyrir að þeim fylgdu ókostir sem síðar komu betur í ljós að sumir gætu verið lífshættulegir. En Úllí amma lagði meiri áherslu á hið jákvæða og uppbyggilega í lífinu enda þótt hún þyrfti ekkert að spyrja aðra að því hvað það væri að mæta mótlæti; hún hafði fengið stærri skammt af því en flestir aðrir en ekki brotnað.
Og þarna er hún á 125 ára gamalli mynd Collingwoods með dularfulla ásjónu rétt eins og bros Monu Lísu. Hvað býr að baki þessum svip rösklega tvítugrar konu á Stóru Borg í Húnavatnssýslu? Hún átti eftir að eignast sex börn í viðbót við þau tvö sem þegar voru fædd. Ákveðnin sem þarna birtist í svipnum skýrir að einhverju leyti hvernig hún gat staðist þau ægilegu áföll að missa fjögur þeirra í blóma lífsins. Þá sýndi hún fádæma styrk og æðruleysi sem staðfesti að þar fór sannkölluð afburðakona.
Ingólfur Sverrisson
Nýjast
-
Eignarhald bænda á jörðum tryggir hag þeirra best
Umræða um jarðir, jarðaviðskipti og kynslóðaskipti í landbúnaði er og á að vera fyrirferðarmikil í umræðu um stöðu sveitanna. Enda var málefnið eitt helsta umræðuefni á haustfundum Bændasamtaka Íslands. Uppkaup og jarðasöfnun fjárfesta og samkeppnisstöðu landbúnaðar. Um stöðu ungra bænda og eldri bænda sem væru að afhenda bú sín til yngri kynslóða. -
Orkumál
Alþingiskosningar ber brátt að garði. Þar skipar undirrituð 2. sætið á lista VG í norðausturkjördæmi. Ég bý á Björgum í Kinn í Þingeyjarsýslu þar sem systir mín og ég tókum við búi 2017 af foreldrum okkar. Þar er mjólkurframleiðsla, umfangsmikil jarðrækt, kornrækt og örfáar kindur.Meðal starfa minna í félagsmálum má nefna formennsku í Samtökum ungra bænda og þá hef ég setið í sveitarstjórn Þingeyjarsveitar frá árinu 2018 og er nú formaður byggðarráðs -
Þakklæti er varla nægilega sterkt lýsingarorð
„Ég þurfti að gera hlé á máli mínu því tárin bara runnu niður kinnarnar,“ segir Marta Kristín Rósudóttir verkefnastjóri hjá Krabbameinsfélagi Akureyrar og nágrennis. Dekurdagar afhentu félaginu alls 6, 7 milljónir króna og hefur upphæðin aldrei verið hærri en nú. Frá árinu 2012 hafa Dekurdagar safnað 37.850.000 kr. fyrir Krabbameinsfélag Akureyrar -
Fjórtándi jólasveinninn hjá Freyvangsleikhúsinu
Fjórtándi jólasveinninn er frumsamið jólaverk eftir Ásgeir Ólafsson Lie sem segir sögu af hinum hefðbundnu jólasveinunum 13 sem og Grýlu, Leppalúða og jólakettinum. Nema í þessu leikverki eru jólasveinarnir ekki bara þrettán heldur er þarna sá fjórtándi sem enginn átti von á. Leikritið verður frumsýnt hjá Freyvangsleikhúsinu á laugardag, 23. nóvember og verður sýnt á aðventunni. -
Dásamlegt og gefandi að starfa í kvenfélagi
„Það er dásamlegt að starfa í kvenfélagi. Þetta er yndislegur félagsskapur, gefandi á allan hátt. Við skemmtum okkur vel, látum gott af okkur leiða en vinnum okkar verk yfirleitt í hljóði og erum ekki að auglýsa það sérstaklega þó við gerum góðverk,“ segir Auður Thorberg formaður Kvenfélagsins Hjálparinnar í Eyjafjarðarsveit. -
Mikil ásókn í íbúðir á vegum Bjargs á Húsavík
Óhætt er að segja að mikill áhugi sé á íbúðum sem Bjarg íbúðafélag er að byggja á Húsavík í samstarfi við Norðurþing, en þetta kemur fram á heimasíðu Framsýnar í dag. -
Litlu jólin á sjó!
Áralöng hefð er fyrir því að áhafnir fiskiskipa Samherja haldi litlu jól í aðdraganda jólanna. Kokkarnir töfra þá fram hverja kræsinguna af annarri. Litlu jól áhafna Kaldbaks og Snæfells voru haldin hátíðleg á dögunum. -
Boðað verkfall lækna mun hafa áhrif á þjónustu SAk.
Félagsmenn í Læknafélagi Íslands hafa samþykkt verkfallsboðun og hafi ekki samist skellur boðað verkfall lækna á eftir nokkra daga eða um miðnætti aðfaranótt mánudagsins 25. nóvember n.k. -
Hvítasunnukirkjan styrkir Hollvinasamtök
Hollvinasamtök Sjúkrahússins á Akureyri fengu afhentan rausnarlegan peningastyrk frá Hvítasunnusöfnuðinum, alls 800 þúsund krónur nýverið.
