„Aldrei hafði ég séð slíka dýrð, mig svimaði hreinlega – þvílíkt hús, þvílíkur geimur“
Ingólfur Sverrisson skrifar
Bak sláturtíðar á því herrans ári 1950, og ykkar einlægur orðinn fullra sjö ára, ákváðu foreldrar mínir eftir talsverðar umræður sín á milli að fjármagna fyrstu bíóferð mína. Þegar ekki var úr miklu að moða var það stór ákvörðun á okkar heimili að kasta fjármunum í slíkan óþarfa. En Höddi bróðir, sem var þremur árum eldri, hafði lagt til að við bræður færum saman í bíó enda væri hann öllu vanur á bíóslóðum og treysti sér til að leiðbeina mér og tryggja að ég færi mér ekki að voða fyrir æsku sakir. Þarna var teningnum kastað og við bræður lögðum af stað í hátíðraskapi úr Ránargötunni, suður Norðurgötu og að Strandgötu þar sem Pollurinn blasti við spegilsléttur. Sem við stóðum þarna á horninu heyrðust miklar drunur austar á Pollinum. Við nánari athugun kom í ljós að Grumman Goose-flugvél sigldi í áttina að flugplaninu sem var sunnan við Strandgötuna. Þegar vélin nálgaðist jókst hávaðinn frá henni sem náði hámarki þegar hún erfiðaði með ærandi óhljóðum eftir sliskjunni úr sjónum og upp á planið. Þegar þangað kom þagnaði hún skyndilega og farþegar gengu út úr þessu hávaðaskrímsli. Mér til furðu virtist allt í stakasta lagi og fólkið komst óskaddað frá þessari raun.
Við héldum áfram göngunni og þegar við fórum framhjá Halldóri söðlasmið blasti Nýja bíó við. Þangað fikruðum við okkur eins og í leiðslu enda mikilla tíðinda að vænta. Eftir að Höddi hafði keypt miða og Stjáni í bíó rifið af þeim gengum við í bíósalinn og settumst á fremsta bekk. Aldrei hafði ég séð slíka dýrð, mig svimaði hreinlega – þvílíkt hús, þvílíkur geimur. Höddi hnippti í mig og sagði: „Þú átt að horfa á þetta hvíta” og benti á sýningartjaldið. Mér þótti nú fátt markvert vera gerast þar en fyrr en varði tóku ljósin að dofna. Ég óttaðist að nú væri Laxá enn að svíkja okkur um rafmagn. En þá gerðist undrið mikla. Lifandi myndir birtust á hvíta tjaldinu og Tarzan apabróðir sveif milli trjánna af slíkri fimi að ekkert slíkt hafði áður sést norðan heiða! Með honum var svo Jane, sem Höddi sagði að væri konan hans, en þau töluðu saman á útlensku svo ég var engu nær enda kom mér hjal þeirra ekkert við. Nóg var að fylgjast með afrekum hans og ævintýrum.
Svo kom hlé og allir fóru fram, sumir drukku Valash og Jollykóla og þeir stöndugustu splæstu á sig Lindu-buffi. Þá tók ég eftir því að næsta dag var mynd með kúrekanum Roy Rogers og uppáhaldshesti hans sem hét Trigger og kunnugir sögðu að væri mikill undra færleikur sem gat hlaupið og svifið með húsbónda sinn á bakinu í gegnum ótrúlegustu raunir.
Svo leið þessi fyrsta bíóferð í Nýja bíó eins og í draumi. Þegar heim kom varð ég óðamála við foreldra mína um þennan merkisviðburð í lífi mínu og hafði litla matarlyst um kvöldið af geðshræringu einni saman. Um nóttina dreymdi mig að við Tarzan apabróðir svifum saman milli trjánna í frumskógum Afríku og Jane hrópaði sífellt til okkar hvatningarorð í einlægri aðdáun.
Ingólfur Sverrisson
Nýjast
-
Eignarhald bænda á jörðum tryggir hag þeirra best
Umræða um jarðir, jarðaviðskipti og kynslóðaskipti í landbúnaði er og á að vera fyrirferðarmikil í umræðu um stöðu sveitanna. Enda var málefnið eitt helsta umræðuefni á haustfundum Bændasamtaka Íslands. Uppkaup og jarðasöfnun fjárfesta og samkeppnisstöðu landbúnaðar. Um stöðu ungra bænda og eldri bænda sem væru að afhenda bú sín til yngri kynslóða. -
Orkumál
Alþingiskosningar ber brátt að garði. Þar skipar undirrituð 2. sætið á lista VG í norðausturkjördæmi. Ég bý á Björgum í Kinn í Þingeyjarsýslu þar sem systir mín og ég tókum við búi 2017 af foreldrum okkar. Þar er mjólkurframleiðsla, umfangsmikil jarðrækt, kornrækt og örfáar kindur.Meðal starfa minna í félagsmálum má nefna formennsku í Samtökum ungra bænda og þá hef ég setið í sveitarstjórn Þingeyjarsveitar frá árinu 2018 og er nú formaður byggðarráðs -
Þakklæti er varla nægilega sterkt lýsingarorð
„Ég þurfti að gera hlé á máli mínu því tárin bara runnu niður kinnarnar,“ segir Marta Kristín Rósudóttir verkefnastjóri hjá Krabbameinsfélagi Akureyrar og nágrennis. Dekurdagar afhentu félaginu alls 6, 7 milljónir króna og hefur upphæðin aldrei verið hærri en nú. Frá árinu 2012 hafa Dekurdagar safnað 37.850.000 kr. fyrir Krabbameinsfélag Akureyrar -
Fjórtándi jólasveinninn hjá Freyvangsleikhúsinu
Fjórtándi jólasveinninn er frumsamið jólaverk eftir Ásgeir Ólafsson Lie sem segir sögu af hinum hefðbundnu jólasveinunum 13 sem og Grýlu, Leppalúða og jólakettinum. Nema í þessu leikverki eru jólasveinarnir ekki bara þrettán heldur er þarna sá fjórtándi sem enginn átti von á. Leikritið verður frumsýnt hjá Freyvangsleikhúsinu á laugardag, 23. nóvember og verður sýnt á aðventunni. -
Dásamlegt og gefandi að starfa í kvenfélagi
„Það er dásamlegt að starfa í kvenfélagi. Þetta er yndislegur félagsskapur, gefandi á allan hátt. Við skemmtum okkur vel, látum gott af okkur leiða en vinnum okkar verk yfirleitt í hljóði og erum ekki að auglýsa það sérstaklega þó við gerum góðverk,“ segir Auður Thorberg formaður Kvenfélagsins Hjálparinnar í Eyjafjarðarsveit. -
Mikil ásókn í íbúðir á vegum Bjargs á Húsavík
Óhætt er að segja að mikill áhugi sé á íbúðum sem Bjarg íbúðafélag er að byggja á Húsavík í samstarfi við Norðurþing, en þetta kemur fram á heimasíðu Framsýnar í dag. -
Litlu jólin á sjó!
Áralöng hefð er fyrir því að áhafnir fiskiskipa Samherja haldi litlu jól í aðdraganda jólanna. Kokkarnir töfra þá fram hverja kræsinguna af annarri. Litlu jól áhafna Kaldbaks og Snæfells voru haldin hátíðleg á dögunum. -
Boðað verkfall lækna mun hafa áhrif á þjónustu SAk.
Félagsmenn í Læknafélagi Íslands hafa samþykkt verkfallsboðun og hafi ekki samist skellur boðað verkfall lækna á eftir nokkra daga eða um miðnætti aðfaranótt mánudagsins 25. nóvember n.k. -
Hvítasunnukirkjan styrkir Hollvinasamtök
Hollvinasamtök Sjúkrahússins á Akureyri fengu afhentan rausnarlegan peningastyrk frá Hvítasunnusöfnuðinum, alls 800 þúsund krónur nýverið.
