„Þingeyingur í þaula” fékk Íslensku bókmenntaverðlaunin
Hildur Knútsdóttir með verðlaunabókina Vetrarhörkur.
Íslensku bókmenntaverðlaunin voru afhent gær á Bessastöðum sem kunnugt er. Í flokki barna- og ungmennabóka hlaut verðlaunin Hildur Knútsdóttir fyrir hina æsispennandi hrollvekju „Vetrarhörkur.” Hildur er ættuð frá Húsavík og úr Kinn. Og sem Þingeyingur sat hún fyrir svörum í dálkinum „Þingeyingur í þaula” í blaðinu Skarpi í lok síðasta árs.
Í tilefni Íslensku bókmenntaverðlaunanna, endurbirtum við hér dálkinn með Hildi Knútsdóttur. JS
Nafn, aldur og heimilisfang:
Hildur Knútsdóttir, 32ja ára, Holtsgata 25, í hinu alræmda póstnúmeri 101 Reykjavík.
Foreldrar:
Guðrún Sigurjónsdóttir og Knútur Árnason.
Heimilishagir:
Ég er gift Agli Þórarinssyni og saman eigum við tvær stelpur; Rán sem er fjögurra ára og Örk sem verður tveggja ára í janúar.
Starf og fyrri störf:
Ég er búin að vera rithöfundur í nokkur ár. Það er samt svo illa borgað að ég er búin að gera ýmislegt meðfram, t.d. hef ég unnið á auglýsingastofu, bókasafni og síðast hjá Náttúruverndarsamtökum Íslands, þar sem ég var verkefnastjóri í loftslagsmálum. Núna er ég líka í kosningabaráttu, sem er jafnvel enn verr borgað en að vera rithöfundur.
Áhugamál:
Ég er mjög löt. Þannig að í frítíma mínum vil ég helst bara lesa bækur, horfa á bíómyndir og tala við vini mína.
Uppáhaldsjurt:
Arabica-kaffiplantan. Án alls vafa.
Fólk sem þú dáir:
Ég veit ekki hvort ég myndi segja að ég dáði neinn. Því öll erum við mennsk og breysk etc. En ég myndi allavega vera virkilega star-struck ef ég hitti J. K. Rowling. Hún er frábær rithöfundur og svo fallega innréttuð líka.
Hvað skortir Þingeyinga helst:
Ég held að Þingeyingar þurfi að fara að horfast í augu við þá bláköldu staðreynd að það eru ekki allir í heiminum sammála um að aðalbláber séu betri en bláber.
Uppáhalds rithöfundar:
Úff, erfið spurning! Þeir eru auðvitað margir. J. K. Rowling, Jane Austen, Isabel Allende, Marian Keyes, Allie Brosh, Elizabeth Bear, Kristín Svava Tómasdóttir, Þórdís Gísladóttir, Guðrún Helgadóttir ... ég gæti haldið áfram.
Íþróttamenn til eftirbreytni:
Ég fylgist vægast sagt afar illa með íþróttum. En allir sem kvengera andstæðinga sína til að niðurlægja þá (sbr. að tala um að einhverjir „sparki eins og stelpa“ eða „grenji einsog smástelpur“) eru dauðir fyrir mér.
Uppáhalds sjónvarpsefni:
Eiginlega allt sem er með geimveruskrímslum. Og stenst Bechdel-prófið.
Hvað tækirðu helst með þér til langdvalar á eyðieyju:
Harry Potter bálkinn. Og hníf.
Frambærilegustu stjórnmálamenn:
Katrín Jakobsdóttir er mín kona.
Bestu snyrtivörurnar:
Ég nota ekki snyrtivörur.
Fyrirmyndarfatahönnuðir:
Þeir sem passa að fötin þeirra séu ekki einnota og ekki framleidd af fátækum þrælabörnum eru til fyrirmyndar.
Draumabíllinn:
Ég er ekki með bílpróf. En rafmagnsbílar eru framtíðin. Eða nútíðin, reyndar.
Uppáhalds matur:
Þessa stundina eru það núðlur með satay-sósu og tófú.
Draumalandið:
Ísland.
Besti staður/staðir á Íslandi:
Sófinn minn.
Hvað áttu ógert:
Alveg ógeðslega mikið! Ég á eftir að skrifa fullt af bókum og svo ætla ég líka að gera það sem ég get til að minnka loftslagsbreytingar af mannavöldum. Og svo ætla ég að koma börnunum mínum á legg.
Mottó:
Það fer eftir aðstæðum hverju sinni. Stundum er það: „Þetta reddast!“ stundum „Að taka einn dag í einu.“ En alltaf samt að vera ekki hrædd við að segja já við nýjum og spennandi tækifærum. Því það er miklu skemmtilegra að hafa prófað og mistekist en að sjá eftir því að hafa ekki stokkið.
Eitthvað að endingu:
Það eru auðvitað krækiberin sem eru best.
Nýjast
-
Ferðafrelsið er dýrmætt
Ferðafrelsi er kannski ekki eitthvað sem menn alla jafna velta mikið fyrir sér frá degi til dags. Kannski vegna þess að okkur finnst það svo sjálfsagður hlutur. Að mega ferðast frjálsir um vegi og slóða um fjöll og fyrnindi umvafin náttúrunni við hvert fótmál. Þessir slóðar og fjallvegir urðu ekki til af sjálfu sér heldur mótuðust af höndum og hug þeirra frumkvöðla sem fyrstir fóru af stað á vanbúnum, óbreyttum bifreiðum þess tíma, þekktu á og kunnu að lesa í ár, vötn og land og öfluðu sér dýrmætrar þekkingar sem skilaðist áfram til næstu kynslóða. -
Listasafnið á Akureyri: Opnun, fimmtudagskvöldið 28. nóvember
Fimmtudagskvöldið 28. nóvember kl. 20-22 verða opnaðar tvær sýningar í Listasafninu á Akureyri: Sólveig Baldursdóttir – Augnablik-til baka og Átthagamálverkið: Á ferð um Norðausturland liðinnar aldar. Boðið verður upp á sýningarstjóraspjall með Markúsi Þór Andréssyni, sýningarstjóra Átthagamálverksins, kl. 20.40 og listamannaspjall með Sólveigu kl. 21. -
Íslandsþari með ný áform um þaravinnslu á Húsavík
Íslandsþari óskar eftir að fá úthlutað lóðinni að Búðarfjöru 1 á Húsavík til uppbyggingar húsnæðis til úrvinnslu stórþara. -
Betra veður fyrir íþróttakrakkana okkar!
Á ferð minni um okkar víðfema og fallega kjördæmi hef ég lent í allskyns vandræðum í öllum veðrum nú í nóvember. Ég er sannarlega ekki einn um það enda vegir landsins uppfullir af spennandi frambjóðendum í leit að sem flestum samtölum við fólkið í landinu. Frambjóðendur keppast nú við að birta myndir og myndbönd af skafrenningi, snjókomu, blindbyljum og fleira til. Allt til þess gert að sýna fólki hversu vandasamt það getur verið að ferðast um landið í nóvember. Sem betur fer er bara kosið á fjögurra ára fresti og oftast á vorin. Þess vegna er þetta nú frekar undantekning en hitt að frambjóðendur þurfi að vaða út í þetta veður og þessa færð í atkvæðaleit. -
Nærsamfélagið tekur höndum saman
Jólatónleikar til styrktar Sigrúnu Björgu Aðalgeirsdóttur og fjölskyldu -
Jólamatur fátæka mannsins
Einn af mínum allra uppáhalds fuglum er rjúpan. Rjúpan nam hér land við lok ísaldar fyrir um 10.000 árum og kom upprunalega frá Grænlandi. Hún á sér lengri forsögu hér en við. Mér finnst hún ekki bara falleg, hún er brögðótt, á 3 alklæðnaði og þegar hún ver unga sína, þá sýnir hún vanmetna vitsmuni. -
Hver grípur þig?
„Við vildum að fólk gerði sér grein fyrir hvaða þjónusta er í boði og hvert er hægt að sækja hana þegar aðstoðar er þörf, fólki að kostnaðarlausu. Einnig langar okkur með málþinginu að styrkja samstarfið á milli félaganna, að fulltrúar þeirra séu upplýst um aðra kosti sem eru í boði fyrir fólk og geti bent málum í réttan farveg eða til viðeigandi félagasamtaka,“ segir Erla Lind Friðriksdóttir um málþing sem hún stendur fyrir ásamt frænku sinni Birnu Guðrúnu Árnadóttur. -
Sérútbúinn lögreglubíll til landamæraeftirlits
Embætti Lögreglunnar á Norðurlandi eystra hefur fengið til eignar sérútbúinn lögreglubíl til afnota við landamæraeftirlit. Segja má að þar sé á ferðinni fullbúin landamærastöð á hjólum. Landamæra- og áritunarsjóður Evrópusambandsins greiddi 75% kostnaðar og Dómsmálaráðuneytið 25% og skiptu einnig með sér kostnaði við einn starfsmann í þrjá mánuði síðastliðið sumar. -
Klúbbar styrkja Frú Ragnheiði
Klúbbarnir Ladies Circle 7 og Round Table 15 afhentu Frú Ragnheiði rausnarlegar styrk í vikunni, ómetnalegur styrkur . „Við erum svo innilega þakklát og mun þetta nýtast skjólstæðingum okkar vel segir í tilkynningu, en styrkurinn er að upphæð um 630 þúsund krónur.
