Á vaktinni um jólin
Haraldur Logi Hringsson, lögreglumaður. Mynd: HÞ
Að vera heima í faðmi fjölskyldunnar um jólin er notaleg tilhugsun sem flest okkar tökum sem sjálfsögðum hlut. Ekki eru allir sem fá að njóta þess að halda jólin heima en sumum vinnustöðum er aldrei lokað. Við fórum á stúfana og spjölluðum við fólk sem stendur vaktina yfir hátíðirnar. Greinin birtist fyrst í Jólablaði Vikudags sem var í umsjón nemenda í Háskólanum á Akureyri.
Haraldur Logi Hringsson, lögreglumaður
Hefur þú oft verið á vakt á aðfangadagskvöld?
Já, ég hef verið frekar oft á vaktinni á aðfangadag. Fyrir nokkrum árum hitti það þannig á að mín vakt átti jólin alveg fjögur, fimm ár í röð. Í ár hittir það einmitt þannig á en við erum á vakt á Þorláksmessu, aðfangadag og jóladag. Ég hef verið á vöktum á aðfangadag í Reykjavík og Keflavík líka svo að maður þekkir þetta ágætlega. Konunni og börnunum finnst þetta auðvitað leiðinlegt en þetta venst. Stundum þarf aðeins að hliðra til, fresta matnum aðeins og svona.
Hvernig er að fá ekki frí í vinnunni yfir hátíðirnar?
Það er auðvitað leiðinlegt og sérstaklega þegar maður er með krakka. Jólin 2013 bjuggum við fjölskyldan í Reykjavík og ég vann í Keflavík. Ég átti dagvakt á aðfangadag og jóladag. Þær mæðgur fóru norður fyrir jól því að hér er öll okkar fjölskylda. Ég var kominn heim til Reykjavíkur um sjöleytið en dagvaktin klárast kl. 18:00. Mig minnir að ég hafi endað á því að fá mér skyr í jólamatinn og var svo bara í símasambandi við fjölskylduna allt kvöldið. Það var mjög leiðinlegt.
Af öllum dögum hátíðanna, hvaða dag langar þig helst að vera heima með fjölskyldunni?
Það er alveg pottþétt aðfangadagskvöld. Við höfum reyndar haft þann hátt á að þeir sem eru á næturvakt á aðfangadag, sem er sem sagt frá 18:00-06:00, skiptast á að skreppa heim að borða. Þá förum við bara á lögreglubílunum heim, erum í búningnum og með talstöðina í eyranu. Þeir sem búa nálægt hver öðrum eru þá saman á bíl og hoppa út ef eitthvað gerist. Sem betur fer er þetta kvöld og nóttin yfirleitt róleg. Ef ég næ að borða heima og opna nokkra pakka með krökkunum þá er ég mjög sáttur.
Er reynt að skapa jólalega stemmingu í vinnunni?
Það er skreytt hérna og sett upp jólatré og svo er konfekt, kökur og jólamatur í boði. Um kvöldið og nóttina horfum við svo yfirleitt á einhverjar skemmtilegar myndir eða spilum saman.
Manstu eftir einhverju eftirminnilegu sem gerðist í vinnunni á aðfangadagskvöld?
Ég man eftir einu útkalli sem kom stuttu eftir matinn en þá var tilkynnt um bíla sem höfðu fest sig á Öxnadalsheiðinni. Á leiðinni í útkallið hittum við bónda í Hörgárdalnum sem var úti að djöflast á jeppanum sínum. Hann var á stórum og vel búnum jeppa og slóst í för með okkur og sagðist myndi keyra á undan okkur. Þegar við komum upp á heiðina voru tveir bílar þar pikkfastir og blindbylur. Við þurftum að kalla út björgunarsveitina en þetta fór vel að lokum. Síðan voru það ein jólin að strákurinn minn fékk rosalega mikið af Lego í jólagjöf, þetta var fullt af húsum og dóti sem þurfti að setja saman. Ég hugsaði með mér að ég yrði örugglega vakinn snemma daginn eftir næturvaktina til að koma þessu saman. Síðan fór ég á stöðina og sagði strákunum frá þessu. Þeir sögðu mér bara að koma með Lego-ið og kubba þessu saman um nóttina. Ég fór og sótti Legoið og það endaði með því að öll vaktin var sest við borðið að kubba saman!
Helga Þóra Helgadóttir –
Nýjast
-
Ferðafrelsið er dýrmætt
Ferðafrelsi er kannski ekki eitthvað sem menn alla jafna velta mikið fyrir sér frá degi til dags. Kannski vegna þess að okkur finnst það svo sjálfsagður hlutur. Að mega ferðast frjálsir um vegi og slóða um fjöll og fyrnindi umvafin náttúrunni við hvert fótmál. Þessir slóðar og fjallvegir urðu ekki til af sjálfu sér heldur mótuðust af höndum og hug þeirra frumkvöðla sem fyrstir fóru af stað á vanbúnum, óbreyttum bifreiðum þess tíma, þekktu á og kunnu að lesa í ár, vötn og land og öfluðu sér dýrmætrar þekkingar sem skilaðist áfram til næstu kynslóða. -
Listasafnið á Akureyri: Opnun, fimmtudagskvöldið 28. nóvember
Fimmtudagskvöldið 28. nóvember kl. 20-22 verða opnaðar tvær sýningar í Listasafninu á Akureyri: Sólveig Baldursdóttir – Augnablik-til baka og Átthagamálverkið: Á ferð um Norðausturland liðinnar aldar. Boðið verður upp á sýningarstjóraspjall með Markúsi Þór Andréssyni, sýningarstjóra Átthagamálverksins, kl. 20.40 og listamannaspjall með Sólveigu kl. 21. -
Íslandsþari með ný áform um þaravinnslu á Húsavík
Íslandsþari óskar eftir að fá úthlutað lóðinni að Búðarfjöru 1 á Húsavík til uppbyggingar húsnæðis til úrvinnslu stórþara. -
Betra veður fyrir íþróttakrakkana okkar!
Á ferð minni um okkar víðfema og fallega kjördæmi hef ég lent í allskyns vandræðum í öllum veðrum nú í nóvember. Ég er sannarlega ekki einn um það enda vegir landsins uppfullir af spennandi frambjóðendum í leit að sem flestum samtölum við fólkið í landinu. Frambjóðendur keppast nú við að birta myndir og myndbönd af skafrenningi, snjókomu, blindbyljum og fleira til. Allt til þess gert að sýna fólki hversu vandasamt það getur verið að ferðast um landið í nóvember. Sem betur fer er bara kosið á fjögurra ára fresti og oftast á vorin. Þess vegna er þetta nú frekar undantekning en hitt að frambjóðendur þurfi að vaða út í þetta veður og þessa færð í atkvæðaleit. -
Nærsamfélagið tekur höndum saman
Jólatónleikar til styrktar Sigrúnu Björgu Aðalgeirsdóttur og fjölskyldu -
Jólamatur fátæka mannsins
Einn af mínum allra uppáhalds fuglum er rjúpan. Rjúpan nam hér land við lok ísaldar fyrir um 10.000 árum og kom upprunalega frá Grænlandi. Hún á sér lengri forsögu hér en við. Mér finnst hún ekki bara falleg, hún er brögðótt, á 3 alklæðnaði og þegar hún ver unga sína, þá sýnir hún vanmetna vitsmuni. -
Hver grípur þig?
„Við vildum að fólk gerði sér grein fyrir hvaða þjónusta er í boði og hvert er hægt að sækja hana þegar aðstoðar er þörf, fólki að kostnaðarlausu. Einnig langar okkur með málþinginu að styrkja samstarfið á milli félaganna, að fulltrúar þeirra séu upplýst um aðra kosti sem eru í boði fyrir fólk og geti bent málum í réttan farveg eða til viðeigandi félagasamtaka,“ segir Erla Lind Friðriksdóttir um málþing sem hún stendur fyrir ásamt frænku sinni Birnu Guðrúnu Árnadóttur. -
Sérútbúinn lögreglubíll til landamæraeftirlits
Embætti Lögreglunnar á Norðurlandi eystra hefur fengið til eignar sérútbúinn lögreglubíl til afnota við landamæraeftirlit. Segja má að þar sé á ferðinni fullbúin landamærastöð á hjólum. Landamæra- og áritunarsjóður Evrópusambandsins greiddi 75% kostnaðar og Dómsmálaráðuneytið 25% og skiptu einnig með sér kostnaði við einn starfsmann í þrjá mánuði síðastliðið sumar. -
Klúbbar styrkja Frú Ragnheiði
Klúbbarnir Ladies Circle 7 og Round Table 15 afhentu Frú Ragnheiði rausnarlegar styrk í vikunni, ómetnalegur styrkur . „Við erum svo innilega þakklát og mun þetta nýtast skjólstæðingum okkar vel segir í tilkynningu, en styrkurinn er að upphæð um 630 þúsund krónur.
