Vikudagur kemur út í dag
Vikudagur kemur út í dag, miðvikudaginn 29. maí og er fyrr á ferðinni þessa vikuna vegna Uppstigningardagsins. Í blaði vikunnar er að vanda farið um víðan völl og eru áhugaverðar fréttir, mannlíf, íþróttir og menning.
Meðal efnis í blaðinu:
-Feðgarnir Sigurður Þorri Gunnarsson og Gunnar Jónsson skelltu sér í ferð til London um liðna helgi og sáu sín uppáhalds fótboltalið spila úrslitaleiki á Wembley. Sennilega er það ekki algengt að Íslendingar fari á þjóðarleikvang Englendinga tvo daga í röð en það gerðu þeir Sigurður og Gunnar.
-Íþróttafélagið Þór hefur sent erindi til bæjaryfirvalda á Akureyri þar sem kallað er eftir samráði við framtíðaruppbyggingu á félagssvæði Þórs og þar verði tillit tekið til þarfa félagsins, væntanlegrar íbúaþróunar á félagssvæðinu og eflingar íþróttakjarna í samræmi við stefnu Akureyrarbæjar og ÍBA. Félagið er ósátt við að aðalskipulaginu hafi verið breytt án samráðs við Þór og segja að þær hugmyndir sem nú séu uppi kollvarpi framtíðarhugmynd félagsins.
- Jóna Sigurlaug Friðriksdóttir er ný safnstjóri Iðnaðarsafnsins á Akureyri og tekur við starfinu af Þorsteini Einari Arnórssyni. Jóna þekkir ágætlega til safnsins enda hefur hún starfað þar sem safnvörður undanfarin fimm ár. Vikudagur forvitnaðist um Iðnaðarsafnið og fékk innsýn inn í þetta merkilega safn í bænum.
-Bæjarstjórn Akureyrar samþykkti samhljóða á síðasta bæjarstjórnarfundi að fresta afgreiðslu umsóknar um stækkun lóðar við Rangárvelli 4 og fela sviðsstjóra skipulagssviðs að kalla eftir umsögn Heilbrigðiseftirlits Norðurlands eystra um tillögu skipulagsráðs. Eins og Vikudagur greindi frá sl. vetur er bygging á steypustöð og steypueiningarverksmiðju fyrirhuguð á Rangárvöllum sem yrði í um 100 m fjarlægð frá íbúahverfi. Íbúar í Giljahverfi eru afar ósáttir við væntanlega byggingu.
-Fyrsta ferð hollenska flugfélagsins Transavia með ferðamenn á vegum Voigt Travel kom til Akureyrar á mánudaginn var frá Rotterdam. Þetta er fyrsta flugið af 16 hjá Transavia í sumar til höfuðstaðar Norðurlands. Við þetta tækifæri tilkynnti Cees van den Bosch, framkvæmdastjóri Voigt Travel, að ákveðið hefði verið að fljúga frá flugvellinum á Akureyri til Amsterdam næsta vetur.
- Adólf Svavarsson er með matarhornið þessa vikuna og kemur með nokkra fljótlega og einfalda rétti.
-Í Húsi vikunnar fjallar Arnór Bliki Hallmundsson um Lundargötu 15.
Þetta og meira til í Vikudegi í dag. Áskriftarsíminn er 460-0750 og 860 6751. Einnig er hægt senda póst á askrift@vikudagur.is.
Nýjast
-
Íslandsþari með ný áform um þaravinnslu á Húsavík
Íslandsþari óskar eftir að fá úthlutað lóðinni að Búðarfjöru 1 á Húsavík til uppbyggingar húsnæðis til úrvinnslu stórþara. -
Betra veður fyrir íþróttakrakkana okkar!
Á ferð minni um okkar víðfema og fallega kjördæmi hef ég lent í allskyns vandræðum í öllum veðrum nú í nóvember. Ég er sannarlega ekki einn um það enda vegir landsins uppfullir af spennandi frambjóðendum í leit að sem flestum samtölum við fólkið í landinu. Frambjóðendur keppast nú við að birta myndir og myndbönd af skafrenningi, snjókomu, blindbyljum og fleira til. Allt til þess gert að sýna fólki hversu vandasamt það getur verið að ferðast um landið í nóvember. Sem betur fer er bara kosið á fjögurra ára fresti og oftast á vorin. Þess vegna er þetta nú frekar undantekning en hitt að frambjóðendur þurfi að vaða út í þetta veður og þessa færð í atkvæðaleit. -
Nærsamfélagið tekur höndum saman
Jólatónleikar til styrktar Sigrúnu Björgu Aðalgeirsdóttur og fjölskyldu -
Jólamatur fátæka mannsins
Einn af mínum allra uppáhalds fuglum er rjúpan. Rjúpan nam hér land við lok ísaldar fyrir um 10.000 árum og kom upprunalega frá Grænlandi. Hún á sér lengri forsögu hér en við. Mér finnst hún ekki bara falleg, hún er brögðótt, á 3 alklæðnaði og þegar hún ver unga sína, þá sýnir hún vanmetna vitsmuni. -
Hver grípur þig?
„Við vildum að fólk gerði sér grein fyrir hvaða þjónusta er í boði og hvert er hægt að sækja hana þegar aðstoðar er þörf, fólki að kostnaðarlausu. Einnig langar okkur með málþinginu að styrkja samstarfið á milli félaganna, að fulltrúar þeirra séu upplýst um aðra kosti sem eru í boði fyrir fólk og geti bent málum í réttan farveg eða til viðeigandi félagasamtaka,“ segir Erla Lind Friðriksdóttir um málþing sem hún stendur fyrir ásamt frænku sinni Birnu Guðrúnu Árnadóttur. -
Sérútbúinn lögreglubíll til landamæraeftirlits
Embætti Lögreglunnar á Norðurlandi eystra hefur fengið til eignar sérútbúinn lögreglubíl til afnota við landamæraeftirlit. Segja má að þar sé á ferðinni fullbúin landamærastöð á hjólum. Landamæra- og áritunarsjóður Evrópusambandsins greiddi 75% kostnaðar og Dómsmálaráðuneytið 25% og skiptu einnig með sér kostnaði við einn starfsmann í þrjá mánuði síðastliðið sumar. -
Klúbbar styrkja Frú Ragnheiði
Klúbbarnir Ladies Circle 7 og Round Table 15 afhentu Frú Ragnheiði rausnarlegar styrk í vikunni, ómetnalegur styrkur . „Við erum svo innilega þakklát og mun þetta nýtast skjólstæðingum okkar vel segir í tilkynningu, en styrkurinn er að upphæð um 630 þúsund krónur. -
Gjaldfrjáls leikskóli dregur úr álagi og bætir líðan barna
Gjaldfrjáls leikskóli hefur reynst áhrifarík leið til að draga úr álagi í leikskólum, á skólastjórnendur og starfsfólk og hefur jákvæð áhrif á börnin. -
Grenivík-Vel gert hjá Óla Gunnari
Heimilismenn á Grenilundi hafa að undanförnu tekið þátt í hjólakeppninni Pedal On Road Worlds For Seniors. Keppnin stóð yfir frá 7. október til 1. nóvember.
