Viðurkenningar veittar á Uppskeruhátíð ferðaþjónustunnar á Norðurlandi Geo Travel í Mývatnssveit er fyrirtæki ársins, Skógarböðin – Forest Lagoon Sproti ársins

Frá afhendingu viðurkenninga. Mynd Markaðsstofan

Uppskeruhátíð ferðaþjónustunnar á Norðurlandi var haldin í Austur-Húnavatnssýslum í fyrradag. Farið var í heimsóknir til fyrirtækja á svæðinu, í Vatnsdal, á Skagaströnd og á Blönduósi. Auk þess voru áhugaverðir staðir skoðaðir, til dæmis nýr útsýnisstaður í Vatnsdalshólum og Þrístapar þar sem Magnús Ólafsson frá  Sveinsstöðum sagði eftirminnilega frá síðustu aftökunni á Íslandi. 

Um kvöldið var hátíðarkvöldverður og skemmtidagskrá, sem lauk með dansi og mikilli gleði. Venju samkvæmt voru viðurkenningar veittar, að þessu sinni voru þær þrjár; Fyrirtæki ársins, Sproti ársins og Hvatningarverðlaun ársins.

Viðurkenningin Fyrirtæki ársins er veitt fyrirtæki sem er búið að slíta barnsskónum og hefur skapað sér sterka stöðu á markaði. Fyrirtækið hefur unnið að stöðugri uppbyggingu, vöruþróun og nýsköpun og er með höfuðstöðvar á Norðurlandi.

Að þessu sinni hlýtur Geo Travel í Mývatnssveit viðurkenninguna fyrirtæki ársins. Geo Travel er lítið fjölskyldufyrirtæki sem hefur undanfarin ár smám saman verið að styrkja sína starfsemi og auka vöruframboð og umsvif. Stefna fyrirtækisins er að bjóða gestum upp á einstakar upplifanir, en jafnframt hafa ætíð náttúrvernd og sjálfbærni að leiðarljósi. Fyrirtækið var stofnað af heimafólki og fyrstu árin bauð fyrirtækið aðallega upp á ferðir inn á hálendið yfir sumarið. Slíkar ferðir eru enn stór hluti starfseminnar, en á síðari árum hefur fjölbreytnin aukist. Geo Travel hefur lagt sérstaka áhersla á að auka framboð á vetrarafþreyingu og er í dag með eitt fjölbreyttasta úrval af vetrarafþreyingu á Norðurlandi. Sú áhersla, ásamt markvissri markaðssetningu, hefur skilað sér í því að umsvifin yfir veturinn hafa aukist verulega og er fyrirtækið að skapa fleiri störf en áður. Fyrirtækið leggur einnig mikið upp úr góðu samstarfi við önnur ferðaþjónustufyrirtæki og hefur barist ötullega fyrir framgangi og uppbyggingu ferðaþjónustu í Mývatnssveit, og raunar á Norðurlandi öllu. Þetta framlag Geo Travel til ferðaþjónustunnar hefur reynst ómetanlegt og er til fyrirmyndar. Anton Freyr Birgisson eigandi Geo Travel tók við viðurkenningunni.

Viðurkenningin Sproti ársins er veitt ungu fyrirtæki sem hefur skapað eftirtektarverða nýjung í ferðaþjónustu á Norðurlandi.

Baðmenning Íslendinga vekur jafnan mikla athygli erlendra ferðamanna og það þykir einstök upplifun að baða sig upp úr vatni sem kemur heitt upp úr jörðinni. Það er þó ekki nóg að benda bara á vatnið því upplifunin snýst um svo margt meira. Norðurland hefur þá sérstöðu að hér er gott úrval baðstaða og mikil fjölbreytni einkennir þá. . Fyrirtækið kom eins og stormsveipur inn á þennan markað með upplifun sem hefur vakið mikla athygli, bæði innanlands og erlendis. Það er ekki síst vegna fagmennsku í þjónustu við gesti, sem upplifa það frá fyrstu sekúndu að hugað sé að öllum smáatriðum. Umhverfi baðanna er enda einstakt og gjörólíkt því sem boðið er upp á annarsstaðar. Þannig hefur tekist að skapa vöru sem er bæði eftirtektarverð og eftirsótt og það hefur sýnt sig að eigendur fyrirtækisins náðu að nýta tækifærið sem gafst til að bjóða upp á nýja afþreyingu í svo mikilli nálægð við Akureyri. Áform eru um frekari uppbyggingu á svæðinu og ef jafn vel tekst til og með böðin má fólk í ferðaþjónustu og gestir eiga von á góðu. Sigríður María Hammer, einn af eigendum Skógarbaðanna tók við viðurkenningunni.

Hvatningarverðlaun ársins eru veitt til fyrirtækis eða sveitarfélags sem býður upp á þjónustu sem byggir vel undir ímynd Norðurlands og er orðið þekkt meðal innlendra og erlendra ferðamanna fyrir einstaka upplifun.

Hvatningarverðlaun fær að þessu sinni sveitarfélagið Húnabyggð. Þetta er í fyrsta skipti sem viðurkenning á Uppskeruhátíð ferðaþjónustunnar er afhent til sveitarfélags en nú er rík ástæða til þar sem Húnabyggð, áður Húnavatnshreppur hefur staðið að miklum metnaði að uppbyggingu á sögustaðnum Þrístöpum. Verkefnið var sett í fyrstu áfangastaðaáætlun Norðurlands og þróað í góðu samstarfi við Markaðsstofuna. Með þessari uppbyggingu er komið nýtt aðdráttarafl á Norðurlandi, byggt á menningu og sögu, á svæði þar sem nauðsynlegt var að byggja upp nýjan segul sem væri aðgengilegur bæði einstaklingum og hópum. Uppbyggingunni er ekki lokið en nú þegar er þessi segull að verða þekktur meðal bæði innlendra og erlendra ferðamanna og býr til ástæðu til að staldra við, kynna sér sögu og náttúru svæðisins auk þess sem Þrístapar skapa tækifæri fyrir nálæga aðila á uppbyggingu ferðaþjónustu. Verkefni sem þetta er til fyrirmyndar og vonandi að fleiri sveitarfélög fylgi á eftir með kraftmikilli uppbyggingu í ferðaþjónustunni. Pétur Arason, sveitarstjóri Húnabyggðar tók við viðurkenningunni.