Til hamingju með Vaðlaheiðargöng
Það var eftirminnileg og einstaklega ánægjuleg stund þegar Vaðlaheiðargöng voru formlega tekin í notkun á dögunum. Samstaðan og ánægjan á svæðinu endurspeglaðist í mikilli og almennri þátttöku í fjölbreyttum atburðum á opnunardaginn. Forustufólk úr sveitarstjórnum, atvinnulífi og opinberri þjónustu úr Eyjafirði, Þingeyjarsýslum og víðar að fjölmennti og gleðin skein af hverju andliti. Engin heyrðist tuða yfir gjaldtöku í göngunum enda öllum ljóst að án hennar væri þessi gríðarlega samgöngubót ekki orðin að veruleika.
Nú þarf ekki lengur að flytja fram rök fyrir mikilvægi þess að ráðast í gerð ganganna. þau eru orðin að veruleika og komin í gagnið. það verður hér, eins og yfirleitt endranær, reynslan sem mun reynast besti dómarinn. Og kem ég þá að þeim skilaboðum sem mér eru efst í huga til íbúa svæðisins á þessum tímamótum. þau eru reyndar ekki ný úr mínum munni. Svipuð orð hafði ég í ávarpi til Vestfirðinga þegar þeir fengu sína miklu samgöngubót með Vestfjarðagöngum sem leystu af hólmi hinar illvígu Breiðadals- og Botnsheiðar. Skilaboðin eru, „nú eiga heimamenn leik“.
það er nú í höndum þeirra sem byggja þetta svæði, og auðvitað með stuðningi allra sem að þeirra hagsmunamálum vinna, að nýta þau tækifæri og möguleika sem tilkoma ganganna skapar til sóknar.
Til slíkrar öflugrar framfarasóknar hafa nú Eyjafjörður og þingeyjarsýslur, mið Norðurland og Norðausturland, betri forsendur en nokkru sinni fyrr. Vaðlaheiðargöng, atvinnuuppbygging á Húsavík og í Þingeyjarsýslu, Héðinsfjarðargöng og uppbygging Norðausturleiðarinnar, Dettifossvegur þegar hann klárast á næstu tveimur árum, þetta og margt fleira hefur gjörbreytt forsendum til hins betra á stóru svæði. Sjúkrahúsið og Háskólinn á Akureyri, aflið í sameinaðri Heilbrigðisstofnun Norðurlands, framhaldsskólarnir, menningarstofnanir að ógleymdu sterku atvinnulífi þar sem öflugustu fyrirtækin hafa sum hver fjárfest eða eru að fjárfesta fyrir milljarða. þetta og margt fleira leggur sterkan grunn.
Undirritaður, sem hefur hrærst í stjórnmálum í vel 40 ár og þar af á þingi sem fulltrúi svæðisins í tæp 36, hefur ekki í annan tíma verið bjartsýnni fyrir þess hönd. Ekki svo að skilja að áfram séu ekki krefjandi verkefni og brýn hagsmunamál fyrir að berjast. Uppbygging Akureyrarflugvallar sem alvöru millilandaflugvallar og varaflugvallar um leið er í þeim efnum mikið forgangsmál. Með slíkri uppbyggingu rotast margar flugur í einu höggi. Sterkari grunnur verður lagður fyrir heilsárs ferðamennsku, mikilvægasta flugsamgöngumannvirki utan Suð-Vesturhornsins og innanlandsflugið eflist, flugöryggi eykst, álag af ferðamönnum dreifist betur o.s.frv. Það að standa vörð um innlenda landbúnaðarframleiðslu og tengdan matvælaiðnað og þjónustu er einnig gríðarlegt hagsmunamál svæðisins. Vægi þess geira er þungt í atvinnulífi og byggð.
Auðvitað gæti ég lengt listann hér að ofan umtalsvert. Nefnt raforkudreifingu, ónýta tengivegi og brýr o.s.frv., en læt staðar numið. Það er mín bjargföst sannfæring að Eyjafjörður og Þingeyjarsýsla hafi nú allar forsendur til að verða eitt helsta vaxtarsvæði landsins á komandi árum með jákvæðum áhrifum á aðliggjandi byggðarlög og svæði til beggja handa. Látum það verða að veruleika og að því marki sem Vaðlaheiðargöng eiga sinn þátt í því var þá ekki til einskis barist.
-Steingrímur J. Sigfússon, forseti Alþingis
Nýjast
-
Örugg skref um allt land.
Heilbrigðiskerfið okkar er hjartað í því velferðarsamfélagi sem tekist hefur að byggja upp á Íslandi. Á yfir 40 fundum sem Samfylkingin bauð til um allt land til að ræða heilbrigðis- og öldrunarmál var ljóst að sinnuleysi og fyrirhyggjuskortur undanfarinna ríkisstjórna er að hola innan öryggistilfinningu fólks. Ekki síst í okkar kjördæmi þar sem vegalengdir eru langar, veður viðsjál og langt til Reykjavíkur. Að heilsugæslan neyðist til að reiða sig á íhlaupalækna til að bjarga vandanum tímabundið stoðar lítt. Það byggir ekki upp það traust og samfellu sem þarf til að fólk njóti þess margháttaða ávinnings sem rannsóknir hafa sýnt að fylgi því að hafa fastan heimilislækni. Enda settum við það sem okkar fyrsta heit í nýju framkvæmdaplani heilbrigðismála til tveggja kjörtímabila. Við erum tilbúin. -
Búsetutengd mismunun í heilbrigðisþjónustu, í boði einkavæðingar og heilbrigðisráðherra Framsóknar.
Búsetutengdur munur á notkun þjónustu sérgreinalækna er mjög mikill. Íbúar dreifbýlis nota þjónustuna mun minna en höfuðborgarbúar og íbúar Vestfjarða og Austfjarða minnst allra, nefnilega þrisvar sinnum minna en höfuðborgarbúar. Lýðheilsuvísar benda ekki til þess að íbúar í dreifbýli séu heilsubetri en höfuðborgarbúar. Nærtæk skýring á þessum mun er að kaupandi þjónustunnar, ríkið, lætur sig engu varða hvar þjónustan er veitt og hún hefur nær öll byggst upp í Reykjavík. Í versta falli er afleiðingin sú að þau sem búa næst þjónustunni nýta hana umfram þörf og hin sem fjær búa minna en æskilegt væri. Hvoru tveggja er hættulegt og brýnt að rýna lög og hvort þeim er fylgt. -
Svik við launafólk: Loforð um samráð brotin með gegndarlausum gjaldskrárhækkunum
Anna Júlíusdóttir formaður Einingar Iðju skrifar bréf til bæjarstjórnar Akureyrar í dag sem birt er að heimasíðu félagsins, það lætur hún í ljós mikla óánægju með boðaðar hækkanir hjá hinum ýmsu fyrirtækjum og stofnunum bæjarins og er óhætt að segja að Önnu sé misboðið. „Við erum tilbúin til uppbyggilegs samtals,“ sögðum við í júlí þegar bæjaryfirvöld á Akureyri boðuðu breytingar á gjaldskrám. Við fögnuðum loforðum um samráð, um víðtækt samtal við hagsmunaaðila og um reglulegt endurmatsferli þar sem allir kæmu að borðinu. Nú aðeins fjórum mánuðum síðar stendur eftir sársaukafullt svik á trausti launafólks. Í stað samtals og samráðs virðast vera að raungerast víðtækar gjaldskrárhækkanir sem eru hrein árás á kaupmátt launafólks. -
Vegamálin liggja þungt á Grímseyingum
Vegamál liggja þungt á heimamönnum í Grímsey. Bundið slitlag var sett á götur þar árið 1994 og aftur árið 2014, en þá var verkið ekki klárað almennilega, „því það mátti bara setja á ákveðið marga kílómetra,“ eins og það er orðað í bókun hverfisnefndar. -
Gripmælar, róbótar og ratleikur á Opnum degi Um 300 framhaldsskólanemendur lögðu leið sína í Háskólann á Akureyri
Stuðið var gífurlegt á dögunum þegar um 300 framhaldsskólanemendur heimsóttu Háskólann á Akureyri á Opnum degi. Skólinn hefur gert þetta í mörg ár í góðu samstarfi við náms- og starfsráðgjafa í framhaldsskólum á norðaustursvæðinu. -
Óska eftir frambjóðendum sem eru tilbúnir í alvöru breytingar!
Ég óska eftir breytingum svo að ég og allir aðrir menntaðir Heilsunuddarar viti hvað við eigum að kjósa í komandi alþingiskosningum. -
Lítið að frétta í lífi án frétta á landsbyggðunum
Af þeim 27 fjölmiðlum sem hlutu rekstrarstuðning til einkarekinna fjölmiðla 2024 voru 13 staðbundnir fjölmiðlar og af þeim 10 staðsettir utan höfuðborgarsvæðisins. Hver og einn af þessum staðbundnu miðlum þjónar gríðarlega mikilvægu hlutverki í sinni heimabyggð og styrkveitingin því sannarlega fagnaðarefni. -
AtNorth stækkar gagnaver sitt á Akureyri Glatvarmi nýttur til matvælaframleiðslu
Fyrirtækið atNorth vinnur að stækkun gagnavers síns á Akureyri. Einnig hefur félagið kynnt nýtt samstarf um endurheimt og nýtingu varma. Stækkun tveggja gagnavera atnorth, á Akureyri og í Reykjanesbæ er þegar hafin. -
easyJet lengir flugtímabil frá London til Akureyrar
Breska flugfélagið easyJet tilkynnti í dag að það muni bæta við flugferðum frá London Gatwick til Akureyrar í apríl 2025, og í október 2025. Áður stóð til að fljúga út mars á næsta ári, og hefja flugin að nýju í nóvember. Flugfélagið verður því mánuði lengur með flug í boði þennan vetur og að auki næsta haust.
