30. október - 6. nóember - Tbl 44
Tæknifræði í staðnámi við Háskólann á Akureyri
Tæknifræði á Akureyri
Raunverkefni tengd atvinnulífinu og hagnýt lokaverkefni
Í haust innrituðust fyrstu stúdentarnir í iðnaðar- og orkutæknifræði við Háskólann á Akureyri en samstarf háskólans við Háskólann í Reykjavík gerir námið mögulegt. Námið er fullgilt tæknifræðinám við HR sem tekur mið af þörfum atvinnulífs á Norðurlandi og gerir stúdentum kleift að stunda námið í heimabyggð. Námið er staðnám við HA og er fjarkennt frá HR á sama tíma og fyrirlestrar í tæknifræði fara þar fram. Þá njóta stúdentarnir þeirrar þjónustu sem HA hefur upp á að bjóða, sækja þangað dæmatíma og fá þar verklega kennslu ásamt því að vera þátttakendur í námssamfélaginu og félagslífinu við HA.
Verkvit, fræðileg þekking og tengsl við atvinnulífið
Þriðjudaginn 19. desember næstkomandi klukkan 17:00 fer fram kynning á náminu í stofu M101 í HA og eru öll áhugasöm sérstaklega hvött til þess að mæta og einnig verður streymt frá kynningunni. Ásthildur Lára Stefánsdóttir er verkefnastjóri tæknifræðikennslu við HA en hún sér um aðstoðarkennslu fyrir stúdenta í tæknifræði auk annarra verkefna. „Tæknifræði er fyrir alla sem hafa áhuga á því að tengja saman verkvit, fræðilega þekkingu og tengsl við atvinnulífið. Námið er náskylt verkfræði og starfa verkfræðingar og tæknifræðingar oft hlið við hlið í hinum ýmsu fyrirtækjum. Ef þú hefur áhuga á endurnýjanlegri orku, framleiðslukerfum, hönnun og teikningu vélhluta, svo eitthvað sé nefnt, að þá er iðnaðar- og orkutæknifræði eitthvað fyrir þig,’’ segir Ásthildur.
Rólegra líf á Akureyri og allt til alls
Ásthildur er fædd á Akureyri og flutti í Breiðholtið árið 2005 þegar hún var 11 ára gömul. Eftir framhaldsskóla lá leið hennar í Háskólann í Reykjavík þar sem hún kláraði bæði BS og MS gráðu í rekstrarverkfræði. „Ég starfaði sem aðstoðarkennari í HR meðfram námi og eftir útskrift hélt ég áfram að starfa í HR, bæði sem verkefnastjóri við Verkfræðideild og einnig sem aðstoðarkennari. Ég sá síðan auglýsta stöðu við HA, sótti um og nú sinni ég því starfi. Áherslan á aðstoðarkennsluna var það sem heillaði mig en mér finnst mjög gaman að kenna og þá sérstaklega stærðfræði. Við eigum fjölskyldu á Akureyri og okkur langaði að prufa að flytja í minni bæ þar sem er minni umferð og rólegra líf. Einnig er mikill kostur að hér er stutt að fara á skíði, svo við ákváðum að slá til og flytja norður,’’ segir Ásthildur sem flutti til Akureyrar í haust til þess að taka þátt í uppbyggingu námsins við HA.
Ásthildur Lára Stefánsdóttir
Lögverndað starfsheiti að námi loknu
Kynningin 19. desember er skipulögð sem almenn kynning í upphafi og svo gefst þátttakendum tækifæri á að spyrja spurninga og eiga samtal við þau sem standa að náminu. Hún er því kjörið tækifæri fyrir þau sem eru forvitin um námið og einnig á góðum tíma, ef áhugasöm gætu þurft að bæta við sig einhverjum einingum úr framhaldsskóla fyrir haustið. „Helstu kostir námsins eru þeir að stúdentar hljóta bæði fræðilega og verklega þekkingu og eru tilbúnir til þess að fara út á vinnumarkaðinn við brautskráningu. Stúdentar fara í starfsnám og kynnast þannig raunverulegum verkefnum á atvinnumarkaðnum auk þess sem þeir gera hagnýt lokaverkefni. Stúdentar ljúka námi á þremur og hálfu ári og fá þá lögverndaða starfsheitið tæknifræðingur. Mikil eftirspurn er eftir tæknifræðingum hvort sem er á verkfræðistofum eða hjá framleiðslu- og orkufyrirtækjum,’’ segir Ásthildur.
Eins og áður sagði fer kynningin fram þriðjudaginn 19. desember klukkan 17:00 í Háskólanum á Akureyri og geta áhugasöm nálgast frekari upplýsingar í gegnum QR kóðann. „Ég vonast til að sjá sem flest í næstu viku, við munum taka vel á móti öllum sem mæta og vonandi gefa betri innsýn inn í námið og lífið í HA. Hér er frábært tækifæri fyrir áhugasamt fólk sem vill stunda nám utan höfuðborgarsvæðisins,’’ segir Ásthildur að lokum.
Nýjast
-
Geðverndarfélag Akureyrar fagnar 50 ára afmæli
„Geðverndarfélag Akureyrar hefur ekki verið mjög áberandi undanfarin ár, en á sér engu að síður merka sögu og hefur staðið fyrir mikilvægum framförum í geðheilbrigðismálum í bænum og ýmislegt sem til bóta er í þessum viðkvæma málaflokki,“ segir Valdís Eyja Pálsdóttir formaður Geðverndarfélags Akureyrar. Félagið var stofnað 15. desember árið 1974 og verður því 50 ára gamalt innan tíðar. Haldið verður upp á tímamótin næstkomandi laugardag. -
Verðandi sjávarútvegsfræðingar kynna sér starfsemi Samherja til sjós og lands
Hátt í fjörutíu nemendur í sjávarútvegsfræðum við Háskólann á Akureyri hafa á undanförnum dögum heimsótt skip og landvinnslu Samherja. Nemendur auðlindadeildar skólans hafa um langt árabil átt þess kost að skoða og kynnast starfsemi félagsins, sem hluta námsins. Magnús Víðisson brautarstjóri segir afar mikilvægt að öflug sjávarútvegsfyrirtæki séu starfandi í námunda við skólann, sem geri nemendum kleift að kynnast betur sjávarútvegi og haftengdri starfsemi. -
Aðeins fleira fé slátrað þetta haustið miðað við í fyrra
„Heilt yfir hefur gengið mjög vel, auðvitað hafa rafmagnstruflanir, nettruflanir, veðurtruflanir og ýmislegt af því tagi, stungið sér niður hjá okkur, en sem betur fer gekk allt upp að lokum,“ segir Sigmundur Hreiðarsson framleiðslustjóri Kjarnafæði Norðlenska á sláturhúsinu á Húsavík. -
Að þora að vera hræddur
Nú haustar og í haustmyrkrinu leynast oft myrkraverur og alls konar furðuleg fyrirbæri sem skjóta okkur stundum skelk í bringu. Flest tengjast þau reyndar hrekkjavöku og ýmiskonar skálduðum hryllingi þannig að það er lítið mál að sýna hugrekki og láta sem ekkert sé. Eða hvað, erum við kannski hræddari en við sýnumst, og hvenær erum við annars hugrökk? -
Ferðast landa á milli til að taka þátt í lotu Viðskiptadeildar
Í þarsíðustu viku var lota hjá Viðskiptadeild og þá gafst stúdentum tækifæri á að hitta kennara, samstúdenta og annað starfsfólk Háskólans. Þannig tengjast þeir betur innbyrðis og í lotum er horfið frá hefðbundinni kennslu, til dæmis með því að bjóða gestum úr atvinnulífinu að vera með innlegg í námskeiðum. -
Gefur lífinu aukalit og við hefðum alls ekki viljað missa af honum
„Rúben hefur verið okkur dýrmætur kennari í lífinu og gefið því fallegan auka lit. Við hefðum alls ekki vilja missa af honum,“ segir Arnheiður Gísladóttir móðir Rúbens Þeys, sem fæddist í janúar árið 2020, með Downs heilkenni. Október er mánuður vitundarvakningar um Downs heilkenni á alþjóðavísu. Einstaklingar sem fæðst hafa með heilkennið hafa fylgt mannkyni frá upphafi vega. Þeim fer fækkandi og um tíma hélt Arnheiður að Rúben Þeyr yrði með þeim síðustu hér á landi sem fæddist með heilkennið. Sú hafi þó ekki orðið raunin. Faðir Rúbens er Vífill Már Viktorsson smiður og átti Arnheiður fyrir Karítas Von sem verður 11 ára gömul í nóvember. Fjölskyldan býr á Akureyri. -
Flokkur fólksins er fyrir þig
Ég er þakklátur fyrir að vera sýnt það traust að fara fyrir frábærum frambjóðendum Flokks fólksins í Norðausturkjördæminu í komandi Alþingiskosningunum. Öll mín orka og þrek mun fara í að standa vörð um kjördæmið okkar. Flokkur fólksins hefur verið einarður málsvari landsbyggðarinnar og talað óhikað fyrir framtíð sjávarbyggðanna og jöfnun búsetuskilyrða. -
Hvaða þjónusta skiptir þig máli?
Maskína er um þessar mundir að gera þjónustukönnun fyrir hönd Byggðastofnunar meðal íbúa um land allt (utan höfuðborgarsvæðis) vegna rannsókna á þjónustusókn og væntingum til breytinga á þjónustu. -
Uppeldi á Íslandi í dagsins önn
Sigurbjörg Anna Þorleifsdóttir, stúdent í meistaranámi við Sálfræðideild, vinnur þessa dagana að meistaraverkefni sínu og rannsókn sem skoðar mismunandi uppeldisaðferðir í tengslum við hegðun barna á Íslandi. Dr. Hilal Sen, lektor við Sálfræðideild, er leiðbeinandi Sigurbjargar.
