Rúm 90% bæjarbúa ánægð með að búa á Akureyri
Ánægja með þjónustu Akureyrarbæjar eykst á milli ára samkvæmt niðurstöðum nýrrar þjónustukönnunar sem Gallup gerði og kynnt hefur verið fyrir fulltrúum sveitarfélagsins.
Í könnuninni kemur meðal annars fram að 91% bæjarbúa eru ánægð með að búa á Akureyri, 84% eru ánægð með aðstöðu til íþróttaiðkunar í bænum, 79% eru ánægð með nánasta umhverfi við heimili sín, 77% með grunnskólana, 70% með þjónustu leikskóla og 74% með þjónustu sveitarfélagsins á heildina litið.
„Það er alltaf forgangsatriði hjá okkur að þjóna bæjarbúum sem allra best og við viljum allt til þess vinna að fólkið sé ánægt með þá þjónustu sem sveitarfélagið veitir. Þróunin síðustu ár sýnir að við erum á réttri leið," segir Ásthildur Sturludóttir, bæjarstjóri á Akureyri.
„Það gleður mig sérstaklega að sjá aukna ánægju með bæði grunn- og leikskóla í ljósi þeirrar vinnu sem lögð hefur verið í nýja menntastefnu og breytingar á gjaldskrá fyrir leikskóla. Þeim breytingum hefur verið vel tekið. Góðir skólar og góður aðbúnaður fyrir unga fólkið skipta gríðarlega miklu máli fyrir hvert sveitarfélag.
Allir aðrir þættir sem spurt er um koma einnig mjög vel út og mælist aukin ánægja á milli ára. Ánægja með sorphirðu dalar að vísu lítið eitt þótt við séum alltaf töluvert yfir landsmeðaltalinu. Skýring á því er án efa sú að könnunin var gerð á sama tíma og óviðráðanlegar tafir höfðu orðið á innleiðingu fjórflokkunar við heimahús. Ég er ekki í vafa um að ánægja bæjarbúa með þennan þjónustuþátt eykst að nýju þegar nýtt sorphirðukerfi verður komið í fastar skorður og tunnuskiptin um garð gengin en nú sér fyrir endann á því verkefni.
Þótt við getum sannarlega fagnað niðurstöðunum heilt yfir þá er gott að fá áminningu um það hvar við getum gert gott ennþá betra og það ætlum við svo sannarlega að gera,“ segir Ásthildur Sturludóttir, bæjarstjóri á Akureyri.
Smelltu hér til að skoða niðurstöður könnunarinnar.
Það var á vef bæjarins sem þetta kom fyrst fram
Nýjast
-
Sandra María Jessen og Alex Cambray Orrason íþróttafólk Akureyrar 2024
Þau Sandra María Jessen knattspyrnukona í Þór/KA og Alex Cambray Orrason kraftlyftingamaður í KA voru nú síðdegis útnefnd sem íþróttakona og íþróttakarl Akureyrar fyrir nýliðið ár í hófi sem fram fór í Hofi. -
Ágúst með nýtt myndband - Eins og þú
Ágúst Þór Brynjarsson er einn af þátttakendum í Söngvakeppni Sjónvarpsins en þar mun hann flytja lagið Eins og þú (e. Like You). Í dag kom út nýtt myndband við lagið sem hægt er að hlýða á neðst í fréttinni. -
Rúm 90% bæjarbúa ánægð með að búa á Akureyri
Ánægja með þjónustu Akureyrarbæjar eykst á milli ára samkvæmt niðurstöðum nýrrar þjónustukönnunar sem Gallup gerði og kynnt hefur verið fyrir fulltrúum sveitarfélagsins. -
Sundlaugar Akureyrar - Ríflega 400 þúsund gestir á liðnu ári
„Það er líf og fjör hjá okkur alla daga og jafnan mikið um að vera,“ segir Gísli Rúnar Gylfason forstöðumaður Sundlauga Akureyrar. Nýtt útisvæði var tekið í notkun nýverið við Glerárlaug og framkvæmdir standa sem hæst við breytingar í innlauginni við Sundlaug Akureyrar. -
Súlur Björgunarsveit býður á opið hús í tilefni af 25 ára afmæli
Súlur Björgunarsveit á Akureyri fagnaði 25 ára afmæli sínu á liðnu hausti. Sveitin varð til með sameiningu þriggja björgunarsveita; Flugbjörgunarsveitarinnar á Akureyri, Hjálparsveitar skáta á Akureyri og Sjóbjörgunarsveit SVFÍ. Stofndagur var 30. október árið 1999 „Þetta varð mikið gæfuspor og til varð ein öflugasta björgunarsveit landsins sem á sér sterkt bakland meðal íbúa og fyrirtækja á Akureyri,“ segir Halldór Halldórsson formaður Súlna. -
MA-Dagný Reykjalín gefur skólanum mynd af Gamla skóla
Í október sl. fagnaði Gamli skóli 120 ára afmæli, en hann var reistur að sumri 1904. -
VMA-Plast er ekki bara plast
Plast er ekki það sama og plast. Því komust nemendur Jóhannesar Árnasonar að í verklegum tíma í efnafræði. -
Akureyri-Verkefnastjórar sinna stuðningi við nemendur af erlendum uppruna
Í öllum grunnskólum á Akureyri starfa verkefnastjórar sem sinna stuðningi við nemendur af erlendum uppruna. Tilraunaverkefnið hófst árið 2020 í Brekkuskóla og Oddeyrarskóla og haustið 2021 byrjaði Síðuskóli með sitt tilraunaverkefni, þar sem Sigrún Helga Snæbjörnsdóttir var ráðin í stöðu ÍSAT kennara og utanumhald allra fjöltyngda nemenda. Haustið 2022 voru svo verkefnastjórar ráðnir í öll skólahverfi og á sama tíma var aukið í stuðning við fjöltyngda nemendur í grunnskólum bæjarins. -
Shawlee Gaudreault og Jóhann Már Leifsson íþróttafólk SA fyrir árið 2024.
Bæði tvö koma úr íshokkídeild félagsins og eru íþróttakona og íþróttakarl íshokkídeildar. Bæði eru tilnefnd af Skautafélagi Akureyrar til Íþróttafólks Akureyrar fyrir árið 2024.
