20. nóvember - 27. nóvember - Tbl 47
Opið bréf til forseta bæjarstjórnar Akureyrar
Björn Snæbjörnsson
Sæl Halla Björk Reynisdóttir, forseti bæjarstjórnar Akureyrar. Þetta opna bréf er sent ritstjóra Vikudags með ósk um birtingu í fyrsta tölublaði ársins. Bréfið verður birt sama dag á samfélagsmiðlum Einingar-Iðju.
Meirihluti bæjarstjórnar samþykkti á fundi sínum í desember s.l. álagningarprósentu fasteignagjalda fyrir árið 2020. Skemmst er frá því að segja að meirihlutinn ákvað að hafa prósentuhlutfallið óbreytt miðað við nýliðið ár, þ.e.a.s. 0,33% af fasteignamati. Í fyrri umræðu um fjárhagsáætlunina var gert ráð fyrir lækkun í 0,32%.
Þetta hefur það í för með sér að fasteignagjöldin á Akureyri hækka um 8,8% miðað við nýliðið ár, þar sem fasteignamat íbúða hækkaði töluvert á síðasta ári. Ef litið er á álögur á íbúðarhúsnæði, hækka tekjur bæjarins úr 282 milljónum króna árið 2019 í 313 milljónir króna á þessu ári. Hækkunin á íbúðarhúsnæði er því samtals 31 milljón króna.
Tilmæli um að hækka gjaldskrár að hámarki um 2,5% eru hunsuð
Í tengslum við lífskjarasamningana sendi Samband íslenskra sveitarfélaga frá sér yfirlýsingu, þar sem sambandið mæltist til þess við sveitarfélögin að á árinu 2020 muni gjöld á þeirra vegum hækka um 2,5% að hámarki, en minna ef verðbólga er lægri.
Mörg sveitarfélög hafa ákveðið að sýna ábyrgð og halda aftur af hækkunum á öllum þeim gjaldskrám er snerta heimili landsins.
Akureyrarbær er eitt þeirra sveitarfélaga sem ekki fer að tilmælum Sambands íslenskra sveitarfélaga í þessum efnum og dregur þannig úr þeim ávinningi sem lífskjarasamningunum er ætlað að skila.
37% hækkun á nokkrum árum
Fasteignagjöld falla að sjálfsögðu undir gjaldskrár sveitarfélaga sem ákveðnar eru á ári hverju, rétt eins og leikskólagjöld og önnur gjöld.
Fasteignagjöld vega þungt í heimilisbókhaldi flestra og tölur sýna að þessi gjöld hafa hækkað mikið á Akureyri á undanförnum árum, langt umfram vísitölu. Fram kom á bæjarstjórnarfundinum í desember að fasteignagjöld á íbúð í fjölbýlishúsi í Lundahverfi hafi hækkað um 37% frá árinu 2016.
Eftir að hafa hlustað á umræðurnar í bæjarstjórn, er ljóst að rökstuðningur fyrir auknum fasteignagjöldum virðist einungis vera að auka tekjurnar, meðal annars til þess að draga úr hallarekstri á A-hluta bæjarsjóðs.
Hvers vegna, Halla Björk?
Í ljósi þess að bæjarstjórnin virðist ætla að virða tilmæli Sambands íslenskra sveitarfélaga að vettugi, óska ég eftir svörum á þessum vettvangi við eftirfarandi spurningum.
1. Hvers vegna ákvað bæjarstjórn að fara ekki að tilmælum Sambands íslenskra sveitarfélaga um að sveitarfélögin hækki gjaldskrár sínar 2,5% að hámarki?
2. Hvers vegna var ákveðið á milli umræðna um fjárhagsáætlun að hætta við að lækka álagningarprósentuna?
3. Fjölgun íbúa Akureyrar er hægari en á landsvísu, er líklegt að hærri fasteigagjöld laði að sér íbúa og fyrirtæki til bæjarins?
4. Kemur til greina að draga þessa ákvörðun meirihluta bæjarstjórnar til baka og fara að tilmælum Sambands íslenskra sveitarfélaga?
5. Hefur þú orðið vör við óánægju íbúa vegna þessarar ákvörðunar um að hækka tekjur bæjarins af fasteignagjöldum um 8,8%?
6. Hefur þú orðið vör við ánægju vegna þessar ákvörðunar?
Með ósk um skýr svör við þessum tiltölulega einföldu og eðlilegu spurningum um 8,8% hækkun á fasteignagjöldum á Akureyri.
Með kveðju,
Björn Snæbjörnsson formaður Einingar-Iðju.
Nýjast
-
Klúbbar styrkja Frú Ragnheiði
Klúbbarnir Ladies Circle 7 og Round Table 15 afhentu Frú Ragnheiði rausnarlegar styrk í vikunni, ómetnalegur styrkur . „Við erum svo innilega þakklát og mun þetta nýtast skjólstæðingum okkar vel segir í tilkynningu, en styrkurinn er að upphæð um 630 þúsund krónur. -
Gjaldfrjáls leikskóli dregur úr álagi og bætir líðan barna
Gjaldfrjáls leikskóli hefur reynst áhrifarík leið til að draga úr álagi í leikskólum, á skólastjórnendur og starfsfólk og hefur jákvæð áhrif á börnin. -
Grenivík-Vel gert hjá Óla Gunnari
Heimilismenn á Grenilundi hafa að undanförnu tekið þátt í hjólakeppninni Pedal On Road Worlds For Seniors. Keppnin stóð yfir frá 7. október til 1. nóvember. -
Jólaljós og lopasokkar í Hofi
Jólatónleikarnir Jólaljós og lopasokkar verður haldnir í Menningarhúsinu Hofi 1. desember næstkomandi og hefjast kl. 17. Þetta er fjölskylduvænir tónleikar, norðlensk framleiðsla og miðaverði stillt í hóf. Alls koma fram fjórir söngvarar, kór, hljómsveit og dansarar. -
Eignarhald bænda á jörðum tryggir hag þeirra best
Umræða um jarðir, jarðaviðskipti og kynslóðaskipti í landbúnaði er og á að vera fyrirferðarmikil í umræðu um stöðu sveitanna. Enda var málefnið eitt helsta umræðuefni á haustfundum Bændasamtaka Íslands. Uppkaup og jarðasöfnun fjárfesta og samkeppnisstöðu landbúnaðar. Um stöðu ungra bænda og eldri bænda sem væru að afhenda bú sín til yngri kynslóða. -
Orkumál
Alþingiskosningar ber brátt að garði. Þar skipar undirrituð 2. sætið á lista VG í norðausturkjördæmi. Ég bý á Björgum í Kinn í Þingeyjarsýslu þar sem systir mín og ég tókum við búi 2017 af foreldrum okkar. Þar er mjólkurframleiðsla, umfangsmikil jarðrækt, kornrækt og örfáar kindur.Meðal starfa minna í félagsmálum má nefna formennsku í Samtökum ungra bænda og þá hef ég setið í sveitarstjórn Þingeyjarsveitar frá árinu 2018 og er nú formaður byggðarráðs -
Þakklæti er varla nægilega sterkt lýsingarorð
„Ég þurfti að gera hlé á máli mínu því tárin bara runnu niður kinnarnar,“ segir Marta Kristín Rósudóttir verkefnastjóri hjá Krabbameinsfélagi Akureyrar og nágrennis. Dekurdagar afhentu félaginu alls 6, 7 milljónir króna og hefur upphæðin aldrei verið hærri en nú. Frá árinu 2012 hafa Dekurdagar safnað 37.850.000 kr. fyrir Krabbameinsfélag Akureyrar -
Fjórtándi jólasveinninn hjá Freyvangsleikhúsinu
Fjórtándi jólasveinninn er frumsamið jólaverk eftir Ásgeir Ólafsson Lie sem segir sögu af hinum hefðbundnu jólasveinunum 13 sem og Grýlu, Leppalúða og jólakettinum. Nema í þessu leikverki eru jólasveinarnir ekki bara þrettán heldur er þarna sá fjórtándi sem enginn átti von á. Leikritið verður frumsýnt hjá Freyvangsleikhúsinu á laugardag, 23. nóvember og verður sýnt á aðventunni. -
Dásamlegt og gefandi að starfa í kvenfélagi
„Það er dásamlegt að starfa í kvenfélagi. Þetta er yndislegur félagsskapur, gefandi á allan hátt. Við skemmtum okkur vel, látum gott af okkur leiða en vinnum okkar verk yfirleitt í hljóði og erum ekki að auglýsa það sérstaklega þó við gerum góðverk,“ segir Auður Thorberg formaður Kvenfélagsins Hjálparinnar í Eyjafjarðarsveit.
