30. október - 6. nóember - Tbl 44
Norðurorka Gætið komið til skerðingar hjá stórnotendum verði veturinn harður
Pétur Freyr Jónsson
„Ef við lendum í svipuðu kuldakasti seinna í vetur þá er útlitið á þann veg að við gætum þurft að skerða afhendingu á heitu vatni til stórnotenda, því þegar búið er að vera mjög kalt þá lækkar í svæðunum okkar og við getum ekki dælt eins miklu vatni úr þeim,“ segir Pétur Freyr Jónsson yfirvélfræðingur hjá Norðurorku. Heitavatnsnotkun eykst mjög á köldum dögum líkt og var um og fyrir síðustu helgi og álag á kerfið eykst.
Mögulegur skortur á heitu vatni ef veturinn yrði kaldur hefur verið til umræðu hjá stjórn Norðurorku og viðraðar voru áhyggjur starfsfólk af því að ekki yrði hægt að anna eftirspurn eftir heitu vatni við þær aðstæður.
Mismunandi áskoranir eftir svæðum
Pétur segir áskoranir hitaveitunnar mismunandi á milli svæða. Þannig glími hitaveitan á Akureyri við öflunarvanda en lítinn dreifikerfisvanda. „Ef við náum að afla nógu af heitu vatni úr borholum okkar þá gengur ágætlega að dreifa því til notenda bæjarins,“ segir hann. Sama er uppi á teningunum varðandi Ólafsfjörð þar sem Pétur segir að komið sé að þolmörkum varðandi öflun vatns og til þess gæti komið að skammta þyrfti heitt vatn í bænum verði veturinn harður.
Í sveitunum er annars konar áskorun á ferðinni sem tengist dreifikerfinu. Reykjaveita, Eyjafjarðaveita vestan megin og austan megin, Svalbarðstrandaveita og Hríseyjarveita glíma við þennan vanda. „Það verður mikið þrýstifall á löngum leiðum þegar vatnsþörfin verður mikil eins og hefur verið síðustu daga og notendur verða varir við lækkaðan þrýsting. Sumstaðar erum við að leggja sverari lagnir þar sem við á og annars staðar setjum við upp dælur til að ná upp þrýsting,“ segir Pétur.
Hann nefnir að þegar kalt var í veðri var meira vatn tekið frá Hjalteyri en ákjósanlegt er, en vísbendingar er um að aukið klóríð sé í vatninu þaðan og það eykst við aukna dælingu.
Virkar eins og bankabók
Hitaveitusvæðin á Laugalandi í Eyjafjarðarsveit, Laugalandi á Þelamörk, Botni við Hrafnagil og upp í Glerárdal voru í hámarksafköstum í kuldakastinu, en samt rétt náðist að halda vatnshæð í tönkunum.„Ef við lendum í svipuðu kuldakasti seinna í vetur lítur allt út fyrir að við munum þurfa að skerða afhendingu á heitu vatni til stórnotenda því þá verður lægra í svæðunum okkar heldur en nú er og við getum ekki dælt eins miklu vatni úr þeim,“ segir Pétur, en dæling úr borholum er háð vatnshæð og þegar vatnsborðið í svæðunum lækkar minnkar dælingin frá þeim. „Laugaland í Eyjafjarðarsveit og Laugaland á Þelamörk virka eins og bankabók. Það skiptir ekki bara máli að fara vel með heita vatnið yfir vetrartímann heldur allt árið um kring. Allt það vatn sem við getum sparað yfir t.d. sumarið það eigum við inni fyrir næsta vetur.“
Nýjast
-
Geðverndarfélag Akureyrar fagnar 50 ára afmæli
„Geðverndarfélag Akureyrar hefur ekki verið mjög áberandi undanfarin ár, en á sér engu að síður merka sögu og hefur staðið fyrir mikilvægum framförum í geðheilbrigðismálum í bænum og ýmislegt sem til bóta er í þessum viðkvæma málaflokki,“ segir Valdís Eyja Pálsdóttir formaður Geðverndarfélags Akureyrar. Félagið var stofnað 15. desember árið 1974 og verður því 50 ára gamalt innan tíðar. Haldið verður upp á tímamótin næstkomandi laugardag. -
Verðandi sjávarútvegsfræðingar kynna sér starfsemi Samherja til sjós og lands
Hátt í fjörutíu nemendur í sjávarútvegsfræðum við Háskólann á Akureyri hafa á undanförnum dögum heimsótt skip og landvinnslu Samherja. Nemendur auðlindadeildar skólans hafa um langt árabil átt þess kost að skoða og kynnast starfsemi félagsins, sem hluta námsins. Magnús Víðisson brautarstjóri segir afar mikilvægt að öflug sjávarútvegsfyrirtæki séu starfandi í námunda við skólann, sem geri nemendum kleift að kynnast betur sjávarútvegi og haftengdri starfsemi. -
Aðeins fleira fé slátrað þetta haustið miðað við í fyrra
„Heilt yfir hefur gengið mjög vel, auðvitað hafa rafmagnstruflanir, nettruflanir, veðurtruflanir og ýmislegt af því tagi, stungið sér niður hjá okkur, en sem betur fer gekk allt upp að lokum,“ segir Sigmundur Hreiðarsson framleiðslustjóri Kjarnafæði Norðlenska á sláturhúsinu á Húsavík. -
Að þora að vera hræddur
Nú haustar og í haustmyrkrinu leynast oft myrkraverur og alls konar furðuleg fyrirbæri sem skjóta okkur stundum skelk í bringu. Flest tengjast þau reyndar hrekkjavöku og ýmiskonar skálduðum hryllingi þannig að það er lítið mál að sýna hugrekki og láta sem ekkert sé. Eða hvað, erum við kannski hræddari en við sýnumst, og hvenær erum við annars hugrökk? -
Ferðast landa á milli til að taka þátt í lotu Viðskiptadeildar
Í þarsíðustu viku var lota hjá Viðskiptadeild og þá gafst stúdentum tækifæri á að hitta kennara, samstúdenta og annað starfsfólk Háskólans. Þannig tengjast þeir betur innbyrðis og í lotum er horfið frá hefðbundinni kennslu, til dæmis með því að bjóða gestum úr atvinnulífinu að vera með innlegg í námskeiðum. -
Gefur lífinu aukalit og við hefðum alls ekki viljað missa af honum
„Rúben hefur verið okkur dýrmætur kennari í lífinu og gefið því fallegan auka lit. Við hefðum alls ekki vilja missa af honum,“ segir Arnheiður Gísladóttir móðir Rúbens Þeys, sem fæddist í janúar árið 2020, með Downs heilkenni. Október er mánuður vitundarvakningar um Downs heilkenni á alþjóðavísu. Einstaklingar sem fæðst hafa með heilkennið hafa fylgt mannkyni frá upphafi vega. Þeim fer fækkandi og um tíma hélt Arnheiður að Rúben Þeyr yrði með þeim síðustu hér á landi sem fæddist með heilkennið. Sú hafi þó ekki orðið raunin. Faðir Rúbens er Vífill Már Viktorsson smiður og átti Arnheiður fyrir Karítas Von sem verður 11 ára gömul í nóvember. Fjölskyldan býr á Akureyri. -
Flokkur fólksins er fyrir þig
Ég er þakklátur fyrir að vera sýnt það traust að fara fyrir frábærum frambjóðendum Flokks fólksins í Norðausturkjördæminu í komandi Alþingiskosningunum. Öll mín orka og þrek mun fara í að standa vörð um kjördæmið okkar. Flokkur fólksins hefur verið einarður málsvari landsbyggðarinnar og talað óhikað fyrir framtíð sjávarbyggðanna og jöfnun búsetuskilyrða. -
Hvaða þjónusta skiptir þig máli?
Maskína er um þessar mundir að gera þjónustukönnun fyrir hönd Byggðastofnunar meðal íbúa um land allt (utan höfuðborgarsvæðis) vegna rannsókna á þjónustusókn og væntingum til breytinga á þjónustu. -
Uppeldi á Íslandi í dagsins önn
Sigurbjörg Anna Þorleifsdóttir, stúdent í meistaranámi við Sálfræðideild, vinnur þessa dagana að meistaraverkefni sínu og rannsókn sem skoðar mismunandi uppeldisaðferðir í tengslum við hegðun barna á Íslandi. Dr. Hilal Sen, lektor við Sálfræðideild, er leiðbeinandi Sigurbjargar.
