30. október - 6. nóember - Tbl 44
Löng saga og stutt
Núverandi og fyrrverandi frá vinstri; Þröstur núverandi, Guðný, Stefán og Jakob sem öll eru fyrrverandi. Mynd grenivik.is
Einörð afstaða sveitarstjórnar og íbúa Grýtubakkahrepps þegar kemur að sameiningarmálum sveitarfélaga, hefur í gegnum tíðina vakið athygli. Kannski er það ekki að undra, þar sem telja má ansi líklegt að Grýtubakkahreppur eigi sér lengsta sögu núverandi sveitarfélaga á Íslandi í óbreyttri mynd. Hann rekur sögu sína meira en eitt þúsund ár til þess tíma er hreppar tóku að myndast á þjóðveldisöld.
Grýtubakkahreppur hefur staðið af sér allar tilraunir til breytinga á hreppamörkum. Þannig stóð til fyrir rúmum 200 árum að færa hreppamörk út fyrir Laufás og nefna ströndina inn úr Laufáshrepp en því var hrundið. Einnig hafa allar sameiningartilraunir seint á síðustu öld og í byrjun þessarar aldar runnið út í sandinn.
Loks náðu ekki fram að ganga áform um lögfestingu íbúalágmarks vorið 2021, en þau hefðu þvingað Grýtubakkahrepp til sameiningar við annað eða önnur sveitarfélög. Í ljósi þessarar löngu sögu væri kannski ekki óeðlilegt að Grýtubakkahreppur sem sveitarfélag yrði friðlýstur!
á dögunum var haldið hátíðlegt 25 ára afmæli Grenilundar hjúkrunarheimils á Grenivík. Það er styttri saga en afar ánægjuleg og hefur aukið við lífsgæði íbúa hér og raunar á stærra svæði.
Í afmælishófi sem haldið var á Grenilundi vildi svo skemmtilega til, að þar voru mættir allir sveitarstjórar Grýtubakkahrepps frá því að sveitarstjóri var fyrst ráðinn í fullt starf árið 1976. Áður höfðu oddvitar séð um reksturinn og 1974 til 1976 sá Sverrir á Lómatjörn um rekstur og fjármál hreppsins í hlutastarfi.
Allir sveitarstjórarnir eru nú búsettir á Grenivík eftir að Stefán Þórðarson flutti heim á Grenilund. Það segir ýmislegt um staðinn og viðhorf til hans. Það má líka kalla enn eitt merkið um íhaldssemi hreppsbúa að þessa tæplega hálfu öld hafa einungis fjórir gengt starfi sveitarstjóra Grýtubakkahrepps:
Jakob Helgi Þórðarson 1976 – 1979
Stefán Þórðarson 1979 – 1987
Guðný Sverrisdóttir 1987 – 2014
Þröstur Friðfinnsson frá 2014.
Myndin var tekin við þetta tækifæri og má að líkindum telja hana nokkuð sögulega.
Það var www.grenivik.is sem sagði þessa frétt fyrst
Nýjast
-
Tónlistarskóli Eyjafjarðar sá fyrsti sem fer í Græn skref
Tónlistarskóli Eyjarfjarðar hefur náð þeim einstaka áfanga að vera fyrsti tónlistarskólinn á Íslandi til að fara í Græn skref „og mega þau vera stolt af því,“ segir á vefsíðu Samtaka sveitarfélaga á Norðurlandi eystra, SSNE. -
Atkvæðagreiðsla utan kjörfundar hefst 7 nóvember
Atkvæðagreiðsla utan kjörfundar við embætti sýslumannsins á Norðurlandi eystra hefst 7. nóvember n.k. Alls hafa 31.039 atkvæðarétt í kjördæminu, flestir þeirra og það kemur ekki á óvart frá Akureyri eða 15.057 manns. -
Pólarhestar eru fyrirtæki ársins
Markaðsstofa Norðurlands veitir viðurkenninguna Fyrirtæki ársins til fyrirtækis sem er búið að slíta barnsskónum og hefur skapað sér sterka stöðu á markaði. Fyrirtækið hefur unnið að stöðugri uppbyggingu, vöruþróun og nýsköpun og er með höfuðstöðvar á Norðurlandi. -
Íslenska kerfið framleiðir afbrotamenn
Að refsa einstaklingi fyrir alvarleg afbrot með fangelsisvist, er eitthvað sem flestir geta verið sammála um að sé nauðsynlegt. Fæstir átta sig hins vegar á hve frelsissviptingin ein og sér hefur gríðarleg áhrif á einstakling sem dæmdur hefur verið til vistar í fangelsi og ef betrunarúrræðin eru ekki til staðar er næsta öruggt að sá einstaklingur er lýkur afplánun, kemur út í samfélagið aftur í verra ástandi en hann var í þegar afplánun hófst. Stundum held ég að þessi hópur samfélags okkar sé álitinn hin skítugu börn Evu sem flestir vita af en enginn vill af þeim vita. Eins og að vandamálin hverfi um leið og kveðinn er upp dómur. Allir þeir einstaklingar sem fá á sig dóma eru synir, dætur, bræður, systur og barnabörn einhverra. Að afplána dóm hefur ekki bara gríðarleg áhrif á fangann heldur líka hans nánustu aðstandendur sem ég tel vera algjörlega týndan hóp innan kerfisins. Kerfis sem fyrir löngu er molnað í sundur. Kerfi sem nær ekki að eiga samskipti. Kerfi sem þarf að taka alvarlega til í og snýst hreinlega um líf eða dauða fólksins okkar. -
KOSNINGARÉTTUR
Við vanmetum oft það sem þykir sjálfsagt! Árið 1843 rak kosningaréttur fyrst á fjörur okkar Íslendinga með tilskipun Kristjáns VIII, en eingöngu til karlmanna eldri en 25 ára sem áttu jörð. Það var um 2% íslensku þjóðarinnar. Árið 1857 var ekki lengur þörf á að eiga jörð, nægjanlegt að búa á eigin heimili og borga skatta. Konur virtust ekki vera landsmenn á þessum tíma. -
Afleitt að Sæfari verði í slipp í apríl
Grímseyingar óska eftir aðstoð við að fá aðra tímasetningu en nú er þegar fyrirhugað er að ferjan Sæfari sem siglir milli lands og eyjar fer í slipp, sem er „afleit tímasetning bæði hvað varðar sjávarútveg og sérstaklega slæmt fyrir ferðaþjónustu í eynni,.“ segir í bókun frá íbúafundi sem haldinn var í eyjunni. -
Framkvæmdir að hefjast við innisundlaugina
Framkvæmdir eru hafnar við talsvert umfangsmiklar breytingar á innisundlaugin í Sundlaug Akureyrar. Umhverfis- og mannvirkjaráð hefur samþykkt að taka lægstu tilboðum í lagnir, raflagnir og múrverk en hafnaði aftur á móti tilboðum sem bárust í útboði á verkefnum í húsasmíði og blikksmíði þar sem þau voru hátt yfir kostnaðaráætlun. -
Nytjamarkaður Norðurhjálpar er eins árs
„Þetta var dásamlegur dagur og við erum þakklátar öllu því góða fólki sem styður við bakið á okkur, við erum eiginlega alveg vissar um að við er með langbesta fólki í kringum okkur,“ segir Sæunn Ísfeld Guðmundsdóttir ein þeirra fjögurra kvenna sem reka nytjamarkaðinn Norðurhjálp. -
Fjármagn í hugmyndavinnu við 50 metra innilaug áætluð árið 2028
Ellert Örn Erlingsson forstöðumaður íþróttamála hjá Akureyrarbæ segir að í framkvæmdaáætlun Akureyrarbæjar sé gert ráð fyrir fjármagni árið 2028 til að fara í formlega vinnu við að skoða möguleika og hugmyndir um 50 metra innisundlaug á Akureyri. „Það verður spennandi og skemmtilegt verkefni,“ segir hann. Um tíðina hafi af og til verið umræður við og innan Akureyrarbæjar um hugmyndir um nýja 50 metra innisundlaug.
