20. nóvember - 27. nóvember - Tbl 47
Laun verkafólks er ekki stóra vandamálið
Björn Snæbjörnsson.
Skattkerfið gegnir lykilhlutverki í að draga úr ójöfnuði, þess vegna er ein helsta krafa verkalýðshreyfingarinnar í yfirstandandi kjaraviðræðum að breyta skattkerfinu. Útreikningar Alþýðusambands Íslands sýna svart á hvítu að skattbyrði launafólks hefur á undanförnum árum bitnað harðast á tekjulægri hópum samfélagsins. Könnun sem Gallup gerði fyrir Einingu-Iðju í lok síðasta árs sýnir að 80% félagsmanna telja að launamunur hafi aukist á síðustu fimm árum.
Vissulega er það hlutverk launþegasamtakanna og vinnuveitenda að semja um kaup og kjör, hins vegar hefur aðkoma ríkis og sveitarfélaga iðulega haft verulega þýðingu og jafnvel úrslitaáhrif.
Fjármálaráðherra kynnti um miðjan mánuðinn mögulega aðkomu stjórnvalda. Verkalýðshreyfingin batt miklar vonir við að tillögurnar gætu liðkað til í kjaraviðræðunum. Þær vonir urðu hins vegar að engu.
Eftir stendur, að verkalýðshreyfingin er staðráðin í því að ná fram þeim kjarabótum að launafólk geti lifað af launum sínum. Síðustu árin hafa leikið láglauna- og millitekjufólk grátt.
Útspil ríkisstjórnarinnar mikil vonbrigði
Skattatillögur verkalýðshreyfingarinnar gera ráð fyrir því að staða 95% launafólks batni. Með fjögurra þrepa kerfi verði hægt að hækka skattleysismörk og draga úr jaðarsköttum hinna tekjulægri.
Fjármálaráðherra kynnti hins vegar tillögu um þriggja þrepa skattkerfi og skattalækkun upp allan stigann. Tillögur ríkisstjórnarinnar gera ráð fyrir frystingu persónuafsláttar í nokkur ár.
Verkalýðshreyfingin vill að barnabótakerfið verði eflt til muna, þannig að það styðji við meginþorra barnafjölskyldna en ekki aðeins allra tekjulægstu eins og staðan er í dag. Vaxta- og barnabótakerfin verði efld, enda hafa þau veikst mikið á undanförnum árum, sem hefur eðlilega bitnað harðast á þeim tekjulægstu.
Ríkisstjórnin fellst ekki á þessar eðlilegu og sjálfsögðu tillögur.
Verkalýðshreyfingin vill hátekjuskatt, hækka auðlindagjald og fjármagnstekjuskatt. Ríkisstjórnin fellst heldur ekki á þessar tillögur verkalýðshreyfingarinnar til þess að auka jöfnuð í samfélaginu.
Segja má að skattalækkunin sem ríkisstjórnin leggur til, dugi varla fyrir einni ferð í Bónus, auk þess sem sú lækkun á að koma einhvern tímann á næstu þremur árum.
Tillögur ríkisstjórnarinnar í skattamálum eru því mikil vonbrigði. Vissulega má finna jákvæða punkta í tillögunum, en þær tillögur vega ekki þungt í heildar samhenginu.
Öllum brögðum beitt til að rjúfa samstöðuna
Vinnuveitendur segja alls ekki hægt að fallast á sanngjarna kröfugerð verkalýðshreyfingarinnar. Það er því himinn og haf sem skilur á milli deiluaðila.
Í fyrrgreindri könnun sem Gallup gerði fyrir Einingu-Iðju var meðal annars spurt um mögulegar verkfallsaðgerðir. Skemmst er frá því að segja að mikill meirihluti félagsmanna er tilbúinn til að fara í verkfallsaðgerðir og knýja þannig á um bætt kjör.
Verkafólki er misboðið eftir útspil ríkisstjórnarinnar og róðurinn þyngist því gagnvart vinnuveitendum sem beita öllum tiltækum brögðum til að rjúfa samstöðu verkafólks, rétt eins og í fyrri kjaraviðræðum. Öllu er snúið á hvolf, öllum brögðum verður beitt.
Næstu vikurnar reynir því sannarlega á samstöðuna í ólgusjó kjaraviðræðnanna.
Kröfur okkar eru sanngjarnar, enda erum við ekki að fara fram á sambærilegar hækkanir og bankastjórar og annað sjálftökufólk.
Laun verkafólks er ekki stóra vandamálið í þjóðfélaginu.
Því fer fjarri.
Höfundur er formaður Einingar-Iðju og Starfsgreinasambands Íslands.
Nýjast
-
Örugg skref um allt land.
Heilbrigðiskerfið okkar er hjartað í því velferðarsamfélagi sem tekist hefur að byggja upp á Íslandi. Á yfir 40 fundum sem Samfylkingin bauð til um allt land til að ræða heilbrigðis- og öldrunarmál var ljóst að sinnuleysi og fyrirhyggjuskortur undanfarinna ríkisstjórna er að hola innan öryggistilfinningu fólks. Ekki síst í okkar kjördæmi þar sem vegalengdir eru langar, veður viðsjál og langt til Reykjavíkur. Að heilsugæslan neyðist til að reiða sig á íhlaupalækna til að bjarga vandanum tímabundið stoðar lítt. Það byggir ekki upp það traust og samfellu sem þarf til að fólk njóti þess margháttaða ávinnings sem rannsóknir hafa sýnt að fylgi því að hafa fastan heimilislækni. Enda settum við það sem okkar fyrsta heit í nýju framkvæmdaplani heilbrigðismála til tveggja kjörtímabila. Við erum tilbúin. -
Búsetutengd mismunun í heilbrigðisþjónustu, í boði einkavæðingar og heilbrigðisráðherra Framsóknar.
Búsetutengdur munur á notkun þjónustu sérgreinalækna er mjög mikill. Íbúar dreifbýlis nota þjónustuna mun minna en höfuðborgarbúar og íbúar Vestfjarða og Austfjarða minnst allra, nefnilega þrisvar sinnum minna en höfuðborgarbúar. Lýðheilsuvísar benda ekki til þess að íbúar í dreifbýli séu heilsubetri en höfuðborgarbúar. Nærtæk skýring á þessum mun er að kaupandi þjónustunnar, ríkið, lætur sig engu varða hvar þjónustan er veitt og hún hefur nær öll byggst upp í Reykjavík. Í versta falli er afleiðingin sú að þau sem búa næst þjónustunni nýta hana umfram þörf og hin sem fjær búa minna en æskilegt væri. Hvoru tveggja er hættulegt og brýnt að rýna lög og hvort þeim er fylgt. -
Svik við launafólk: Loforð um samráð brotin með gegndarlausum gjaldskrárhækkunum
Anna Júlíusdóttir formaður Einingar Iðju skrifar bréf til bæjarstjórnar Akureyrar í dag sem birt er að heimasíðu félagsins, það lætur hún í ljós mikla óánægju með boðaðar hækkanir hjá hinum ýmsu fyrirtækjum og stofnunum bæjarins og er óhætt að segja að Önnu sé misboðið. „Við erum tilbúin til uppbyggilegs samtals,“ sögðum við í júlí þegar bæjaryfirvöld á Akureyri boðuðu breytingar á gjaldskrám. Við fögnuðum loforðum um samráð, um víðtækt samtal við hagsmunaaðila og um reglulegt endurmatsferli þar sem allir kæmu að borðinu. Nú aðeins fjórum mánuðum síðar stendur eftir sársaukafullt svik á trausti launafólks. Í stað samtals og samráðs virðast vera að raungerast víðtækar gjaldskrárhækkanir sem eru hrein árás á kaupmátt launafólks. -
Vegamálin liggja þungt á Grímseyingum
Vegamál liggja þungt á heimamönnum í Grímsey. Bundið slitlag var sett á götur þar árið 1994 og aftur árið 2014, en þá var verkið ekki klárað almennilega, „því það mátti bara setja á ákveðið marga kílómetra,“ eins og það er orðað í bókun hverfisnefndar. -
Gripmælar, róbótar og ratleikur á Opnum degi Um 300 framhaldsskólanemendur lögðu leið sína í Háskólann á Akureyri
Stuðið var gífurlegt á dögunum þegar um 300 framhaldsskólanemendur heimsóttu Háskólann á Akureyri á Opnum degi. Skólinn hefur gert þetta í mörg ár í góðu samstarfi við náms- og starfsráðgjafa í framhaldsskólum á norðaustursvæðinu. -
Óska eftir frambjóðendum sem eru tilbúnir í alvöru breytingar!
Ég óska eftir breytingum svo að ég og allir aðrir menntaðir Heilsunuddarar viti hvað við eigum að kjósa í komandi alþingiskosningum. -
Lítið að frétta í lífi án frétta á landsbyggðunum
Af þeim 27 fjölmiðlum sem hlutu rekstrarstuðning til einkarekinna fjölmiðla 2024 voru 13 staðbundnir fjölmiðlar og af þeim 10 staðsettir utan höfuðborgarsvæðisins. Hver og einn af þessum staðbundnu miðlum þjónar gríðarlega mikilvægu hlutverki í sinni heimabyggð og styrkveitingin því sannarlega fagnaðarefni. -
AtNorth stækkar gagnaver sitt á Akureyri Glatvarmi nýttur til matvælaframleiðslu
Fyrirtækið atNorth vinnur að stækkun gagnavers síns á Akureyri. Einnig hefur félagið kynnt nýtt samstarf um endurheimt og nýtingu varma. Stækkun tveggja gagnavera atnorth, á Akureyri og í Reykjanesbæ er þegar hafin. -
easyJet lengir flugtímabil frá London til Akureyrar
Breska flugfélagið easyJet tilkynnti í dag að það muni bæta við flugferðum frá London Gatwick til Akureyrar í apríl 2025, og í október 2025. Áður stóð til að fljúga út mars á næsta ári, og hefja flugin að nýju í nóvember. Flugfélagið verður því mánuði lengur með flug í boði þennan vetur og að auki næsta haust.
