20. nóvember - 27. nóvember - Tbl 47
Jólagleði í Háskólanum á Akureyri
Íslenskur jólamatur á hlaðborði fyrir erlenda skiptinema Myndir UNAK
Það má með sanni segja að Háskólinn á Akureyri sé kominn í jólabúning. Hefð er fyrir því að halda 1. desember, Fullveldisdag Íslands og dag stúdenta hátíðlegan í háskólanum. Að þessu sinni ferðaðist Jólalest HA um háskólasvæðið og gladdi stúdenta og starfsfólk með söng, heitu súkkulaði og smákökum. Fyrir hádegi safnaðist góður hópur saman við Íslandsklukkuna þar sem Elín Díanna Gunnarsdóttir, starfandi rektor, flutti ávarp um mikilvægi stúdenta í sjálfstæðis- og fullveldisbaráttu Íslendinga. Að því loknu hringdi Sólveig Birna Elísabetardóttir, forseti Stúdentafélags Háskólans á Akureyri Íslandsklukkunni 23 sinnum, einu sinni fyrir hvert ár sem klukkan hefur staðið á stallinum við HA.
Nokkrum dögum áður stóð Miðstöð alþjóðasamskipta og Alþjóðanefnd SHA fyrir jólaboði fyrir erlenda skiptinema sem hafa stundað nám við HA á haustmisseri. Um er að ræða árlegt jólaboð sem er alltaf jafn vinsælt. „Við settum upp jólahlaðborð og buðum upp á íslenskan jólamat eins og hangikjöt, jólasíld, laufabrauð, jólasmákökur og drykki. Íslensk jólalög nutu mikilla vinsælda og Alþjóðanefnd SHA stýrði glæsilegri jólagetraun sem vakti mikla lukku,“ segir Rúnar Gunnarsson, forstöðumaður Miðstöðvar alþjóðasamskipta.
„Mér fannst jólaboðið ótrúlega skemmtilegt. Það er búið að hugsa vel um okkur í haust og þessi viðburður er svo sannarlega engin undantekning. Mér fannst maturinn á hlaðborðinu mjög góður en margt er líkt því sem ég þekki í Danmörku svo það má segja að þetta sé jólamatur sem ég þekki en þó með íslensku ívafi. Íslenska laufabrauðið þótti mér best og það er sérstaklega gott með íslensku smjöri,“ segir Signe Marie skiptinemi frá Danmörku sem er ánægð með dvöl sína í HA.
Alls mættu 50 erlendir skiptinemar í jólaboðið og fjöldi skiptinema hefur aldrei verið meiri en þetta haustmisseri. „Flestir skiptinemarnir eru hér eitt misseri en þó eru nokkrir sem verða allt skólaárið. Eftir áramót tökum við á móti 34 nýjum erlendum skiptinemum sem munu stunda nám á vormisseri. Við stefnum að því að halda þorrablót fyrir þá skiptinema þar sem þeim mun gefast tækifæri til að smakka helsta þorramat Íslendinga. Mikil aukning hefur verið á fjölda skiptinema eftir að heimsfaraldrinum lauk og ég geri ráð fyrir svipuðum fjölda áfram næstu ár,“ segir Rúnar Gunnarsson að lokum.
Sólveig Birna Elísabetardóttir til vinstri og Elín Díanna Gunnarsdóttir til hægri.
Jólahlaðborðið var mjög vel sótt.
Nýjast
-
Listasafnið á Akureyri: Opnun, fimmtudagskvöldið 28. nóvember
Fimmtudagskvöldið 28. nóvember kl. 20-22 verða opnaðar tvær sýningar í Listasafninu á Akureyri: Sólveig Baldursdóttir – Augnablik-til baka og Átthagamálverkið: Á ferð um Norðausturland liðinnar aldar. Boðið verður upp á sýningarstjóraspjall með Markúsi Þór Andréssyni, sýningarstjóra Átthagamálverksins, kl. 20.40 og listamannaspjall með Sólveigu kl. 21. -
Íslandsþari með ný áform um þaravinnslu á Húsavík
Íslandsþari óskar eftir að fá úthlutað lóðinni að Búðarfjöru 1 á Húsavík til uppbyggingar húsnæðis til úrvinnslu stórþara. -
Betra veður fyrir íþróttakrakkana okkar!
Á ferð minni um okkar víðfema og fallega kjördæmi hef ég lent í allskyns vandræðum í öllum veðrum nú í nóvember. Ég er sannarlega ekki einn um það enda vegir landsins uppfullir af spennandi frambjóðendum í leit að sem flestum samtölum við fólkið í landinu. Frambjóðendur keppast nú við að birta myndir og myndbönd af skafrenningi, snjókomu, blindbyljum og fleira til. Allt til þess gert að sýna fólki hversu vandasamt það getur verið að ferðast um landið í nóvember. Sem betur fer er bara kosið á fjögurra ára fresti og oftast á vorin. Þess vegna er þetta nú frekar undantekning en hitt að frambjóðendur þurfi að vaða út í þetta veður og þessa færð í atkvæðaleit. -
Nærsamfélagið tekur höndum saman
Jólatónleikar til styrktar Sigrúnu Björgu Aðalgeirsdóttur og fjölskyldu -
Jólamatur fátæka mannsins
Einn af mínum allra uppáhalds fuglum er rjúpan. Rjúpan nam hér land við lok ísaldar fyrir um 10.000 árum og kom upprunalega frá Grænlandi. Hún á sér lengri forsögu hér en við. Mér finnst hún ekki bara falleg, hún er brögðótt, á 3 alklæðnaði og þegar hún ver unga sína, þá sýnir hún vanmetna vitsmuni. -
Hver grípur þig?
„Við vildum að fólk gerði sér grein fyrir hvaða þjónusta er í boði og hvert er hægt að sækja hana þegar aðstoðar er þörf, fólki að kostnaðarlausu. Einnig langar okkur með málþinginu að styrkja samstarfið á milli félaganna, að fulltrúar þeirra séu upplýst um aðra kosti sem eru í boði fyrir fólk og geti bent málum í réttan farveg eða til viðeigandi félagasamtaka,“ segir Erla Lind Friðriksdóttir um málþing sem hún stendur fyrir ásamt frænku sinni Birnu Guðrúnu Árnadóttur. -
Sérútbúinn lögreglubíll til landamæraeftirlits
Embætti Lögreglunnar á Norðurlandi eystra hefur fengið til eignar sérútbúinn lögreglubíl til afnota við landamæraeftirlit. Segja má að þar sé á ferðinni fullbúin landamærastöð á hjólum. Landamæra- og áritunarsjóður Evrópusambandsins greiddi 75% kostnaðar og Dómsmálaráðuneytið 25% og skiptu einnig með sér kostnaði við einn starfsmann í þrjá mánuði síðastliðið sumar. -
Klúbbar styrkja Frú Ragnheiði
Klúbbarnir Ladies Circle 7 og Round Table 15 afhentu Frú Ragnheiði rausnarlegar styrk í vikunni, ómetnalegur styrkur . „Við erum svo innilega þakklát og mun þetta nýtast skjólstæðingum okkar vel segir í tilkynningu, en styrkurinn er að upphæð um 630 þúsund krónur. -
Gjaldfrjáls leikskóli dregur úr álagi og bætir líðan barna
Gjaldfrjáls leikskóli hefur reynst áhrifarík leið til að draga úr álagi í leikskólum, á skólastjórnendur og starfsfólk og hefur jákvæð áhrif á börnin.
