30. október - 6. nóember - Tbl 44
Hjá okkur Grindavíkingum hefur öllum spilum verið kastað upp í loft og framtíðin í uppnámi
Kristín Linda Jónsdóttir sálfræðingur er úr Fnjóskadal, hún bjó lengi á Akureyri og í Miðhvammi í Aðaldal. Hún flutti til Grindavíkur árið 2018, hafði þá kynnst manni sínum Jens Sigurðssyni sem er borinn og barnfæddur Grindvíkingur. Líf þeirra verður héðan í frá ávallt fyrir eða eftir rýmingu.
Dagur 5 eftir rýmingu. Já hér eftir mun líf mitt alltaf verða - fyrir og eftir rýmingu Grindavíkur. Atburðurinn sem stendur yfir verður hluti af örlögum okkar sem þar búum. Áðan fór ég í búð á Selfossi og keypti mjólk, jógúrt og kvöldmat og hugsaði um að flestir af fólkinu sem var þar að snúast, eins og við Jens, er bara sem betur fer í sínu venjulega lífsmunstri. Hjá okkur Grindavíkingum hefur öllum spilum verið kastað upp í loft og öll framtíð er í uppnámi.
Tókum sitt hvorn bollann
Það er gott að heyra af samkennd fólks en það þarf meira en orð. Nokkrir aðilar hafa stigið fram og boðið meira en orð, þannig fékk ég sundbol, handklæði og aðgang í sund ókeypis á Selfossi enda ekki með sturtuaðstöðu eins og er þar sem ég lenti á flóttanum. Í sturtunni fékk ég sjampó í lófann frá ungri stúlku sem var þar um leið og ég. Við höfum komist heim og náðum að taka töluvert af fötum og ég tók myndlistardótið mitt en mín listaverk og önnur listaverk okkar Jens og munir, ættargripir og bókmenntir eru eðlilega á hættusvæðinu. Við tókum sitt hvorn bollann en verðmætt og yndislegt 60 ára safn af borðbúnaði sem við matgæðingarnir eigum saman er á hættusvæðinu, bara svona til dæmis.
Ekki heilsusamlegt fyrir taugakerfið
Það er mjög vafasamt að búseta verði örugg í Grindavík í nánustu framtíð hvað þá að það verði heilsusamlegt fyrir taugakerfi fólks að búa þar. Það geta ekki talist heilsusamlegar aðstæður að fylgjast með því dag og nótt hvort þurfi að taka alla muni niður á gólf vegna skjálftahættu, finna annan stað til að sofa á vegna svefnleysis af skjálftum, skoða af ábyrgð og áhyggjum aftur og aftur hvort stefni í rýmingu eða nýtt sig hafi opnast.
Allir sem búa í Grindavík hafa sárar áhyggjur af sinni framtíð, félagslega og fjárhagslega. Margir líka atvinnulega. Margt þyrfti að gera strax, gefa út yfirlýsingu um að hvert heimili í Grindavík fengið ákveðna upphæð sem munar um í búsetustyrk næstu 3-9 mánuði þar sem fólk hefur ekki heimild til að búa á heimilum sínum. Stöðva gjaldtöku í Grindavík og bæta Grindavíkurbæ tekjutapið upp með öðrum hætti, til dæmis er varðar fasteignagjöld, leikskóla og tómstundir barna. Bara svona til dæmis.
Lifrarpylsa og rautt teppi
Hér í kotinu okkar á Þingvöllum eru komnir tveir lifrarpylsukeppir í pott sem bjargað var en við hjúin vorum nýlega búin að gera lifrarpylsu til ársins. Annars er maturinn okkar eðlilega í frysti heima á hættusvæðinu, þar er enn rafmagn hvað sem verður. Blómin mín 15 og þar með havírósirnar sem ég hef lagt mig fram um að rækta og 16 ára gamla drekatréið sem búið hefur með mér á Akureyri, í Aðaldal, Reykjavík og Grindavík, eru á dauðadeildinni. Mögnuð vinkona á Akureyri er hins vegar búin að pakka ýmsu niður í kassa til að senda mér til að hlúa að mér þegar flest sem ég á er á hættusvæðinu, ég veit að í honum er hlýtt rautt teppi. Lífið er sannarlega dýrmæt gjöf og ótal ævintýri, hvar og hvað verður næst ???
Kristín Linda
Kristín Linda Jónsdóttir ólst upp í Fnjóskadal í Þingeyjarsveit. Hún lauk stúdentsprófi frá Menntaskólanum á Akureyri, starfaði í banka og var blaðamaður á Akureyri um 15 ára skeið. Þá vatt hún sínu kvæði í kross og gerðist kúabóndi í Miðhvammi í Aðaldal. Hún lét mjög til sín taka í félagsmálum kúabænda, sat í stjórn Landssamband kúabænda og var formaður Félags þingeyskra kúabænda. Hún starfaði af lífi og sál við kúabúskapinn í 15 ára, en eftir fertugt lauk hún námi í sálfræði frá Háskólanum á Akureyri og Háskóla Íslands og er nú klínískur sálfræðingur starfar sjálfstætt hjá eigin fyrirtæki, Huglind ehf í Reykjavík. Vorið 2018 kynntist hún Jens Sigurðssyni yfirvélstjóra á Sighvati GK57 sem er Grindvíkingur í húð og hár. Þau keyptu Norðurhóp 44 í Grindavík vorið 2022 og hófu þá sambúð þar. Pistilinn skrifaði Kristín Linda á facebook og gaf góðfúslegt leyfi fyrir birtingu.
Nýjast
-
Fjármagn í hugmyndavinnu við 50 metra innilaug áætluð árið 2028
Ellert Örn Erlingsson forstöðumaður íþróttamála hjá Akureyrarbæ segir að í framkvæmdaáætlun Akureyrarbæjar sé gert ráð fyrir fjármagni árið 2028 til að fara í formlega vinnu við að skoða möguleika og hugmyndir um 50 metra innisundlaug á Akureyri. „Það verður spennandi og skemmtilegt verkefni,“ segir hann. Um tíðina hafi af og til verið umræður við og innan Akureyrarbæjar um hugmyndir um nýja 50 metra innisundlaug. -
Sálfræðingur með merkan feril í Fantasy Premier League að baki
Vísindafólkið okkar — Árni Gunnar Ásgeirsson Vísindafólkið okkar er mánaðarleg kynning á vísindafólkinu okkar. Árni Gunnar Ásgeirsson, deildarforseti Sálfræðideildar, er vísindamanneskjan í október. -
Gleðilega töfrandi kosningabaráttu
Snörp og spennandi kosningabarátta er að hefjast og eru stjórnmálaflokkar í óðaönn að draga fram helstu stefnur og forgangsmál. Ýmislegt bendir til þess, eins og oft áður, að komandi kosningar muni að þónokkru leyti snúast um efnahagsmál og fjármál heimila og fyrirtækja. Verðbólga og vextir bíta fast og fólk vill svör um framtíðina. Eðlilega. -
Geðverndarfélag Akureyrar fagnar 50 ára afmæli
„Geðverndarfélag Akureyrar hefur ekki verið mjög áberandi undanfarin ár, en á sér engu að síður merka sögu og hefur staðið fyrir mikilvægum framförum í geðheilbrigðismálum í bænum og ýmislegt sem til bóta er í þessum viðkvæma málaflokki,“ segir Valdís Eyja Pálsdóttir formaður Geðverndarfélags Akureyrar. Félagið var stofnað 15. desember árið 1974 og verður því 50 ára gamalt innan tíðar. Haldið verður upp á tímamótin næstkomandi laugardag. -
Verðandi sjávarútvegsfræðingar kynna sér starfsemi Samherja til sjós og lands
Hátt í fjörutíu nemendur í sjávarútvegsfræðum við Háskólann á Akureyri hafa á undanförnum dögum heimsótt skip og landvinnslu Samherja. Nemendur auðlindadeildar skólans hafa um langt árabil átt þess kost að skoða og kynnast starfsemi félagsins, sem hluta námsins. Magnús Víðisson brautarstjóri segir afar mikilvægt að öflug sjávarútvegsfyrirtæki séu starfandi í námunda við skólann, sem geri nemendum kleift að kynnast betur sjávarútvegi og haftengdri starfsemi. -
Aðeins fleira fé slátrað þetta haustið miðað við í fyrra
„Heilt yfir hefur gengið mjög vel, auðvitað hafa rafmagnstruflanir, nettruflanir, veðurtruflanir og ýmislegt af því tagi, stungið sér niður hjá okkur, en sem betur fer gekk allt upp að lokum,“ segir Sigmundur Hreiðarsson framleiðslustjóri Kjarnafæði Norðlenska á sláturhúsinu á Húsavík. -
Að þora að vera hræddur
Nú haustar og í haustmyrkrinu leynast oft myrkraverur og alls konar furðuleg fyrirbæri sem skjóta okkur stundum skelk í bringu. Flest tengjast þau reyndar hrekkjavöku og ýmiskonar skálduðum hryllingi þannig að það er lítið mál að sýna hugrekki og láta sem ekkert sé. Eða hvað, erum við kannski hræddari en við sýnumst, og hvenær erum við annars hugrökk? -
Ferðast landa á milli til að taka þátt í lotu Viðskiptadeildar
Í þarsíðustu viku var lota hjá Viðskiptadeild og þá gafst stúdentum tækifæri á að hitta kennara, samstúdenta og annað starfsfólk Háskólans. Þannig tengjast þeir betur innbyrðis og í lotum er horfið frá hefðbundinni kennslu, til dæmis með því að bjóða gestum úr atvinnulífinu að vera með innlegg í námskeiðum. -
Gefur lífinu aukalit og við hefðum alls ekki viljað missa af honum
„Rúben hefur verið okkur dýrmætur kennari í lífinu og gefið því fallegan auka lit. Við hefðum alls ekki vilja missa af honum,“ segir Arnheiður Gísladóttir móðir Rúbens Þeys, sem fæddist í janúar árið 2020, með Downs heilkenni. Október er mánuður vitundarvakningar um Downs heilkenni á alþjóðavísu. Einstaklingar sem fæðst hafa með heilkennið hafa fylgt mannkyni frá upphafi vega. Þeim fer fækkandi og um tíma hélt Arnheiður að Rúben Þeyr yrði með þeim síðustu hér á landi sem fæddist með heilkennið. Sú hafi þó ekki orðið raunin. Faðir Rúbens er Vífill Már Viktorsson smiður og átti Arnheiður fyrir Karítas Von sem verður 11 ára gömul í nóvember. Fjölskyldan býr á Akureyri.
