20. nóvember - 27. nóvember - Tbl 47
Framhaldið er í höndum kjósenda
Ingibjörg Isaksen þingflokksformaður Fraamsóknarflokksins
Ingibjörg Ólöf Isaksen sækist eftir að skipa áfram fyrsta sætið á lista Framsóknarflokksins í Norðausturkjördæmi. Hún segir stjórnarslitin síðasta sunnudag hafa komið á óvart því til þessa hafi ríkt trú á að hægt væri að ná lengra í mikilvægum málum.
Ingibjörg varð oddviti flokksins fyrir kosningarnar 2021 og í kjölfar þeirra fyrsti þingmaður Norðausturkjördæmis. Hún hefur verið þingflokksformaður á kjörtímabilinu.
Líneik Anna Sævarsdóttir frá Fáskrúðsfirði var þá í öðru sætinu. Líneik Anna tilkynnti í gær að hún sæktist ekki eftir endurkjöri. „Það verður eftirsjá af Líneik því hún hefur verið virkilega góður og traustur samstarfsmaður. Hún er alls staðar vel liðin: vinnusöm, dugleg og traust. Ég veit hún mun áfram fylgja flokknum og við vinkonurnar munum halda áfram sambandi.“
Taldi hægt að ná lengra
Aðspurð segir Ingibjörg að ákvörðun Sjálfstæðisflokksins um að slíta ríkisstjórnarsamstarfinu við Framsóknarflokk og Vinstrihreyfinguna – grænt framboð hafi komið á óvart.
„Við töldum á þessum tímapunkti að það væru tækifæri til að klára mikilvæg verkefni í til dæmis samgöngumálum og sem varða börn- og ungmenni. Það eru líka öll merki um að við séum að ná tökum á verðbólgunni sem í fyrsta sinn í þrjú ár er á leið niður.
Við töldum þess vegna möguleika á að komast á enn betri stað en það þýðir ekki að horfa um öxl heldur fram á veginn og takast á við verkefnið sem fram undan er,“ segir Ingibjörg.
Kosið verður 30. nóvember. Kannanir hafa til þessa ekki verið hliðhollar Framsóknarflokknum á landsvísu þótt staða hans í kjördæminu sé heldur betri en víða annars staðar.
„Það á margt eftir að breytast næstu daga og vikur. Við getum verið stolt af verkum okkar þetta kjörtímabil. Við höfum verið í góðu samtali við fólk og fyrirtæki í kjördæminu. Nú er að segja frá þeim verkefnum sem við höfum unnið á kjörtímabilinu, fyrir hvað við stöndum og hvaða verkefni við sjáum framundan. Við setjum hausinn undir okkur og göngum full tilhlökkunar til samtals við kjósendur.“
Segir mikið um formanninn
Óvænt tíðindi bárust úr flokknum í dag um að formaðurinn Sigurður Ingi Jóhannsson, fjármála- og efnahagsráðherra, hafi ákveðið að taka annað sætið í Suðurkjördæmi en í því fyrsta verði Halla Hrund Logadóttir, fyrrum forsetaframbjóðandi og orkumálastjóri.
„Þetta er mjög ánægjulegt. Þetta segir mikið um hugsun, karakter og styrk formanns okkar sem leiðtoga. Hann hefur alltaf trú á okkur í flokknum og er til í að víkja fyrir hagsmunum annarra og flokksins.“
Ingibjörg lætur ekkert uppi um ósk sína um næstu ríkisstjórn. „Nú er þetta í höndum kjósenda og við tökum næstu skref út frá því.“
Nýjast
-
Eignarhald bænda á jörðum tryggir hag þeirra best
Umræða um jarðir, jarðaviðskipti og kynslóðaskipti í landbúnaði er og á að vera fyrirferðarmikil í umræðu um stöðu sveitanna. Enda var málefnið eitt helsta umræðuefni á haustfundum Bændasamtaka Íslands. Uppkaup og jarðasöfnun fjárfesta og samkeppnisstöðu landbúnaðar. Um stöðu ungra bænda og eldri bænda sem væru að afhenda bú sín til yngri kynslóða. -
Orkumál
Alþingiskosningar ber brátt að garði. Þar skipar undirrituð 2. sætið á lista VG í norðausturkjördæmi. Ég bý á Björgum í Kinn í Þingeyjarsýslu þar sem systir mín og ég tókum við búi 2017 af foreldrum okkar. Þar er mjólkurframleiðsla, umfangsmikil jarðrækt, kornrækt og örfáar kindur.Meðal starfa minna í félagsmálum má nefna formennsku í Samtökum ungra bænda og þá hef ég setið í sveitarstjórn Þingeyjarsveitar frá árinu 2018 og er nú formaður byggðarráðs -
Þakklæti er varla nægilega sterkt lýsingarorð
„Ég þurfti að gera hlé á máli mínu því tárin bara runnu niður kinnarnar,“ segir Marta Kristín Rósudóttir verkefnastjóri hjá Krabbameinsfélagi Akureyrar og nágrennis. Dekurdagar afhentu félaginu alls 6, 7 milljónir króna og hefur upphæðin aldrei verið hærri en nú. Frá árinu 2012 hafa Dekurdagar safnað 37.850.000 kr. fyrir Krabbameinsfélag Akureyrar -
Fjórtándi jólasveinninn hjá Freyvangsleikhúsinu
Fjórtándi jólasveinninn er frumsamið jólaverk eftir Ásgeir Ólafsson Lie sem segir sögu af hinum hefðbundnu jólasveinunum 13 sem og Grýlu, Leppalúða og jólakettinum. Nema í þessu leikverki eru jólasveinarnir ekki bara þrettán heldur er þarna sá fjórtándi sem enginn átti von á. Leikritið verður frumsýnt hjá Freyvangsleikhúsinu á laugardag, 23. nóvember og verður sýnt á aðventunni. -
Dásamlegt og gefandi að starfa í kvenfélagi
„Það er dásamlegt að starfa í kvenfélagi. Þetta er yndislegur félagsskapur, gefandi á allan hátt. Við skemmtum okkur vel, látum gott af okkur leiða en vinnum okkar verk yfirleitt í hljóði og erum ekki að auglýsa það sérstaklega þó við gerum góðverk,“ segir Auður Thorberg formaður Kvenfélagsins Hjálparinnar í Eyjafjarðarsveit. -
Mikil ásókn í íbúðir á vegum Bjargs á Húsavík
Óhætt er að segja að mikill áhugi sé á íbúðum sem Bjarg íbúðafélag er að byggja á Húsavík í samstarfi við Norðurþing, en þetta kemur fram á heimasíðu Framsýnar í dag. -
Litlu jólin á sjó!
Áralöng hefð er fyrir því að áhafnir fiskiskipa Samherja haldi litlu jól í aðdraganda jólanna. Kokkarnir töfra þá fram hverja kræsinguna af annarri. Litlu jól áhafna Kaldbaks og Snæfells voru haldin hátíðleg á dögunum. -
Boðað verkfall lækna mun hafa áhrif á þjónustu SAk.
Félagsmenn í Læknafélagi Íslands hafa samþykkt verkfallsboðun og hafi ekki samist skellur boðað verkfall lækna á eftir nokkra daga eða um miðnætti aðfaranótt mánudagsins 25. nóvember n.k. -
Hvítasunnukirkjan styrkir Hollvinasamtök
Hollvinasamtök Sjúkrahússins á Akureyri fengu afhentan rausnarlegan peningastyrk frá Hvítasunnusöfnuðinum, alls 800 þúsund krónur nýverið.
