„Ég vona að Húsavíkingar fjölmenni í Samkomuhúsið því þetta verður einstakt“
Listahátíðin Skjálfandi verður haldin í 10. sinn föstudaginn 19. maí nk. í Samkomuhúsinu á Húsavík. Hátíðin hefur verið árlegur viðburður á Húsavík en fyrstu árin var hún haldin að Kaldbak, rétt sunnan Húsavíkur. Undan farin tvö ár hefur hátíðinni reyndar verið aflýst vegna Covid en snýr nú tvíefld til baka.
Það er Harpa Fönn Sigurjónsdóttir, stundum kennd við Kaldbak sem hefur haldið utan um hátíðina öll þessi ár og gerir það einnig að þessu sinni.
„Hátíðin í ár verður tileinkuð listakonunni Huldu og undurfallega Skjálfandaflóa. Una Stef mun loka hátíðinni með nýju samstarfsverkefni sínu sem ber heitið Huldumál – Ný íslensk sönglög við ljóð Huldu,“ segir Harpa ánægð með að Skjálfandi sé að snúa aftur.
„Við þurftum að aflýsa hátíðinni í tvö ár í röð. Í kjölfarið missti ég svolítið dampinn eins og margir gerðu í Covid. Ég verð að viðurkenna að við lögðumst undir feld og hugsuðum virkilega um hvort við ættum að halda hátíðina aftur. Svo fékk ég bara svo mikla hvatningu að ég gat ekki sagt nei og er svo ótrúlega fegin að hafa tekið þá ákvörðun,“ útskýrir Harpa himinlifandi.
Harpa segir að útslagið hafi verið kórvek Unu Stef sem unnið var upp úr ljóðum Huldu og sýnt var í Fríkirkjunni. „Þá fóru púslin að raðast saman. Hulda náttúrlega var frá Húsavík og þar var komin tenging. Við ákváðum að lokum að flytja þetta verkefni til Húsavíkur á og gera að lokaatriði Skjálfanda.“
Harpa viðurkennir að það kosti mikla vinnu að skipuleggja svona hátíð enda hefur hún verið önnum kafin undan farnar vikur. „Mesta vinnan er fólgin í því að heyra í listafólki og halda því samtali gangandi. Það þarf að hóa mörgum saman og það hefur þurft mikla hvatningu. Árni eiginmaður minn hefur séð um samskiptin við listafólkið og svo er Elísa Þóreyjardóttir með okkur en hún kemur til með sjá um kynningar á listafólkinu á samskiptamiðlum,“ útskýrir Harpa.
Dagskrá hátíðarinnar verður afar fjölbreytt í ár. M.a. annars vinnusmiðja í boði Ocean missions þar sem þemað verður verndun hafsins, nemendur Borgarhólsskóla sýna sjónlistaverk, kvikmyndaverk verða á boðstólnum, Björn Grétar flytur uppistandið Pabbalífið og að sjálfsögðu mun Hóffý Ben flytja barnaþulur eftir Huldu. Rúsínan í pylsuendanum verður svo flutningur Kammerkórsins Aurora á kórverkinu Huldumál eftir Unu Stefánsdóttur við ljóð Huldu. Þetta og margt fleira á Skjálfandi í Samkomuhúsinu.
„Við erum afar spennt yfir því að fara af stað með þetta aftur og ég vona að Húsavíkingar fjölmenni í Samkomuhúsið því þetta verður einstakt,“ segir Harpa að lokum.
Nýjast
-
Uppskeruhátíð ferðaþjónustunnar á Norðurlandi
Þrjár viðurkenningar voru veittar á Uppskeruhátíð ferðaþjónustunnar á Norðurlandi sem að þessu sinni var haldin í Eyjafirði, í Eyjafjarðarsveit, Svalbarðsstrandarhreppi og Grýtubakkahreppi. Þær voru fyrirtæki ársins, hvatningarverðlaun ársins og fyrir störf í þágu ferðaþjónustu. Á uppskeruhátíðinni var farið í heimsóknir til ýmissa ferðaþjónustufyrirtækja á svæðinu, sem bjóða bæði afþreyingu, mat og gistingu ásamt ýmsu öðru. Hátíðin tókst afar vel og lauk með hátíðarkvöldverði á Laugaborg í Hrafnagilshverfi, kvöldskemmtun, dansi og mikilli gleði. -
Harðbakur málaður og yfirfarinn í Slippnum á Akureyri
Togarinn Harðbakur EA 3 heldur senn til veiða eftir ýmsar endurbætur og uppfærslur í Slippnum á Akureyri, auk þess sem skipið var heilmálað. Harðbakur er fimm ára gamalt skip, smíðað í Vard-Aukra skipasmíðastöðinni í Noregi. Skipið kom til Akureyrar 9. nóvember 2019 og strax í kjölfarið tók Slippurinn við því, þar sem settur var vinnslubúnaður um borð. Harðbakur er 29 metra langur og 12 metra breiður. Skipið er gott í alla staði, bæði hvað varðar vinnslubúnað og aðbúnað áhafnar. -
Tónlistarskóli Eyjafjarðar sá fyrsti sem fer í Græn skref
Tónlistarskóli Eyjarfjarðar hefur náð þeim einstaka áfanga að vera fyrsti tónlistarskólinn á Íslandi til að fara í Græn skref „og mega þau vera stolt af því,“ segir á vefsíðu Samtaka sveitarfélaga á Norðurlandi eystra, SSNE. -
Atkvæðagreiðsla utan kjörfundar hefst 7 nóvember
Atkvæðagreiðsla utan kjörfundar við embætti sýslumannsins á Norðurlandi eystra hefst 7. nóvember n.k. Alls hafa 31.039 atkvæðarétt í kjördæminu, flestir þeirra og það kemur ekki á óvart frá Akureyri eða 15.057 manns. -
Pólarhestar eru fyrirtæki ársins
Markaðsstofa Norðurlands veitir viðurkenninguna Fyrirtæki ársins til fyrirtækis sem er búið að slíta barnsskónum og hefur skapað sér sterka stöðu á markaði. Fyrirtækið hefur unnið að stöðugri uppbyggingu, vöruþróun og nýsköpun og er með höfuðstöðvar á Norðurlandi. -
Íslenska kerfið framleiðir afbrotamenn
Að refsa einstaklingi fyrir alvarleg afbrot með fangelsisvist, er eitthvað sem flestir geta verið sammála um að sé nauðsynlegt. Fæstir átta sig hins vegar á hve frelsissviptingin ein og sér hefur gríðarleg áhrif á einstakling sem dæmdur hefur verið til vistar í fangelsi og ef betrunarúrræðin eru ekki til staðar er næsta öruggt að sá einstaklingur er lýkur afplánun, kemur út í samfélagið aftur í verra ástandi en hann var í þegar afplánun hófst. Stundum held ég að þessi hópur samfélags okkar sé álitinn hin skítugu börn Evu sem flestir vita af en enginn vill af þeim vita. Eins og að vandamálin hverfi um leið og kveðinn er upp dómur. Allir þeir einstaklingar sem fá á sig dóma eru synir, dætur, bræður, systur og barnabörn einhverra. Að afplána dóm hefur ekki bara gríðarleg áhrif á fangann heldur líka hans nánustu aðstandendur sem ég tel vera algjörlega týndan hóp innan kerfisins. Kerfis sem fyrir löngu er molnað í sundur. Kerfi sem nær ekki að eiga samskipti. Kerfi sem þarf að taka alvarlega til í og snýst hreinlega um líf eða dauða fólksins okkar. -
KOSNINGARÉTTUR
Við vanmetum oft það sem þykir sjálfsagt! Árið 1843 rak kosningaréttur fyrst á fjörur okkar Íslendinga með tilskipun Kristjáns VIII, en eingöngu til karlmanna eldri en 25 ára sem áttu jörð. Það var um 2% íslensku þjóðarinnar. Árið 1857 var ekki lengur þörf á að eiga jörð, nægjanlegt að búa á eigin heimili og borga skatta. Konur virtust ekki vera landsmenn á þessum tíma. -
Afleitt að Sæfari verði í slipp í apríl
Grímseyingar óska eftir aðstoð við að fá aðra tímasetningu en nú er þegar fyrirhugað er að ferjan Sæfari sem siglir milli lands og eyjar fer í slipp, sem er „afleit tímasetning bæði hvað varðar sjávarútveg og sérstaklega slæmt fyrir ferðaþjónustu í eynni,.“ segir í bókun frá íbúafundi sem haldinn var í eyjunni. -
Framkvæmdir að hefjast við innisundlaugina
Framkvæmdir eru hafnar við talsvert umfangsmiklar breytingar á innisundlaugin í Sundlaug Akureyrar. Umhverfis- og mannvirkjaráð hefur samþykkt að taka lægstu tilboðum í lagnir, raflagnir og múrverk en hafnaði aftur á móti tilboðum sem bárust í útboði á verkefnum í húsasmíði og blikksmíði þar sem þau voru hátt yfir kostnaðaráætlun.
