20. nóvember - 27. nóvember - Tbl 47
„Beitum okkur í stað þess að barma okkur“
Hagsmunasamtök barna á Húsavík stóðu fyrir dagskrá fyrir börn í tilefni að Bíllausa deginum á dögunum á Regnbogabraut þar sem komið var upp hjólabraut fyrir börnin. Um 150 manns mættu og virtust allir skemmta sér hið besta. Mynd/ Aðsend.
Þann 1.júlí síðastliðinn kom saman hópur í tilefni af stofnun Hagsmunasamtaka barna á Húsavík. Hvatinn að stofnun samtakanna var að nýta samtakamátt foreldra, forráðamanna og samfélagsins alls til þess að bæta lífskjör barna á svæðinu, hvort sem það snýr að öryggi, menntun, afþreyingu eða tómstundum.
Vel var mætt á fundinn og alls skráðu sig 21 í samtökin. Það var kosið í stjórn samtakanna, auk þess sem samþykktir samtakanna voru skrifaðar. Það eru þau Axel Árnason, Brynja Rún Benediktsdóttir, Elena Martinez, Elva Héðinsdóttir og Svava Hlín Arnarsdóttir sem skipa stjórnina og Benedikt Þorri Sigurjónsson, Guðný Ósk Agnarsdóttir og Sigurborg Ósk Haraldsdóttir sem skipa varastjórn. Stjórn skipti með sér verkum á fyrsta stjórnarfundi eftir stjórnarkjör.
Umferðaröryggi var kveikjan
Axel Árnason í stjórn samtakanna segir í samtali við Vikublaðið að hugmyndina hafi kviknað í kringum öryggismál barna þeirra sem að stofnun samtakanna standa. En þau eiga það sameiginlegt að eiga börn í skýinu svokallaða en það er gámaeiningahús við Borgarhólsskóla sem hýsir 1. bekk skólans. Axel segir að þau hafi viljað beita sér fyrir að bæta öryggi barnanna á skólalóðinni með því að draga úr bílaumferð, en nú hefa verið settar upp lokanir fyrir bílaumferð inn á skólalóðina.
„Við höfðum áhyggjur af öryggi þeirra vegna bílaumferðar. En okkur er mjög annt um það að við séum í stuði og það sé skemmtilegt hjá okkur. Ekki bara einhver leiðindi. Þannig að við ákváðum að skella í þessi samtök til að stinga á einhver kýli en með gleðina og jákvæðnina að vopni,“ segir Axel og bætir við að saman sé hægt að koma miklu í verk í þágu barna.
Vilja nota samatakamáttinn
„Við getum gert svo margt gott ef við stöndum saman og beitum okkur á jákvæðan hátt í þeim málum sem þarf að taka á í nærsamfélaginu hvað varðar börnin okkar. Við sjáum til dæmis fyrir okkur að vinna saman að því að stuðla að fjölbreyttari tómstundum og afþreyingu fyrir þau börn sem ekki finna sig í því sem er í boði nú þegar, veita aðhald i öryggismálum og eiga yfirhöfuð gott samtal við sveitarstjórn og skólayfirvöld, um allt sem þar fer fram. Eins og segir í auglýsingunni; beitum okkur í stað þess að barma okkur í litlum hópum úti í bæ. Það er svona leiðarstef þessara samtaka. Það er mikil stemning og meðbyr hjá okkur.“
Þá sendi fundurinn frá sér ályktun er varðar öryggi barna, þar sem hvatt er til þess að unnin verði stefna og aðgerðaáætlun um umferðaröryggi. Ályktunin er svohljóðandi: „Hagsmunasamtök Barna á Húsavík leggja til að unnin verði stefna um umferðaröryggi barna á Húsavík og í framhaldinu aðgerðaáætlun sem tryggir að allt skipulag, öll hönnun og allar framkvæmdir innan Húsavíkur verði gerðar með hag barna að leiðarljósi. Markvisst verði unnið að því að bæta umferðaröryggi og aðstöðu fyrir öll börn, óháð ferðamáta. Samtökin eru með Facebook-síðuna: Hagsmunasamtök barna á Húsavík, auk þess sem hægt er að senda tölvupóst á hsb.husavik@gmail.com til þess að ganga í samtökin. Skráning í samtökin er gjaldfrjáls og ekki eru innheimt félagsgjöld. Samtökin hvetja foreldra og öll þau sem láta sig hagsmuni barna á svæðinu varða, að skrá sig í samtökin.
Nýjast
-
Eignarhald bænda á jörðum tryggir hag þeirra best
Umræða um jarðir, jarðaviðskipti og kynslóðaskipti í landbúnaði er og á að vera fyrirferðarmikil í umræðu um stöðu sveitanna. Enda var málefnið eitt helsta umræðuefni á haustfundum Bændasamtaka Íslands. Uppkaup og jarðasöfnun fjárfesta og samkeppnisstöðu landbúnaðar. Um stöðu ungra bænda og eldri bænda sem væru að afhenda bú sín til yngri kynslóða. -
Orkumál
Alþingiskosningar ber brátt að garði. Þar skipar undirrituð 2. sætið á lista VG í norðausturkjördæmi. Ég bý á Björgum í Kinn í Þingeyjarsýslu þar sem systir mín og ég tókum við búi 2017 af foreldrum okkar. Þar er mjólkurframleiðsla, umfangsmikil jarðrækt, kornrækt og örfáar kindur.Meðal starfa minna í félagsmálum má nefna formennsku í Samtökum ungra bænda og þá hef ég setið í sveitarstjórn Þingeyjarsveitar frá árinu 2018 og er nú formaður byggðarráðs -
Þakklæti er varla nægilega sterkt lýsingarorð
„Ég þurfti að gera hlé á máli mínu því tárin bara runnu niður kinnarnar,“ segir Marta Kristín Rósudóttir verkefnastjóri hjá Krabbameinsfélagi Akureyrar og nágrennis. Dekurdagar afhentu félaginu alls 6, 7 milljónir króna og hefur upphæðin aldrei verið hærri en nú. Frá árinu 2012 hafa Dekurdagar safnað 37.850.000 kr. fyrir Krabbameinsfélag Akureyrar -
Fjórtándi jólasveinninn hjá Freyvangsleikhúsinu
Fjórtándi jólasveinninn er frumsamið jólaverk eftir Ásgeir Ólafsson Lie sem segir sögu af hinum hefðbundnu jólasveinunum 13 sem og Grýlu, Leppalúða og jólakettinum. Nema í þessu leikverki eru jólasveinarnir ekki bara þrettán heldur er þarna sá fjórtándi sem enginn átti von á. Leikritið verður frumsýnt hjá Freyvangsleikhúsinu á laugardag, 23. nóvember og verður sýnt á aðventunni. -
Dásamlegt og gefandi að starfa í kvenfélagi
„Það er dásamlegt að starfa í kvenfélagi. Þetta er yndislegur félagsskapur, gefandi á allan hátt. Við skemmtum okkur vel, látum gott af okkur leiða en vinnum okkar verk yfirleitt í hljóði og erum ekki að auglýsa það sérstaklega þó við gerum góðverk,“ segir Auður Thorberg formaður Kvenfélagsins Hjálparinnar í Eyjafjarðarsveit. -
Mikil ásókn í íbúðir á vegum Bjargs á Húsavík
Óhætt er að segja að mikill áhugi sé á íbúðum sem Bjarg íbúðafélag er að byggja á Húsavík í samstarfi við Norðurþing, en þetta kemur fram á heimasíðu Framsýnar í dag. -
Litlu jólin á sjó!
Áralöng hefð er fyrir því að áhafnir fiskiskipa Samherja haldi litlu jól í aðdraganda jólanna. Kokkarnir töfra þá fram hverja kræsinguna af annarri. Litlu jól áhafna Kaldbaks og Snæfells voru haldin hátíðleg á dögunum. -
Boðað verkfall lækna mun hafa áhrif á þjónustu SAk.
Félagsmenn í Læknafélagi Íslands hafa samþykkt verkfallsboðun og hafi ekki samist skellur boðað verkfall lækna á eftir nokkra daga eða um miðnætti aðfaranótt mánudagsins 25. nóvember n.k. -
Hvítasunnukirkjan styrkir Hollvinasamtök
Hollvinasamtök Sjúkrahússins á Akureyri fengu afhentan rausnarlegan peningastyrk frá Hvítasunnusöfnuðinum, alls 800 þúsund krónur nýverið.
