„Bannað að hanga í sturtunum”
Ingólfur Sverrisson skrifar Þanka gamals Eyrarpúka
„Bannað að hanga í sturtunum,” kallaði Ingi sturta þegar við strákarnir dvöldum of lengi undir volgri bununni í íþróttahúsinu fyrir ofan Andapollinn. Í þá daga þurfti að hita upp vatnið með ærnum kostnaði og þess vegna eðlilegt að haft var strangt eftirlit með því að ekki væri bruðlað með svo dýrmætan vökva. Skólasystur okkar sögðu sömu sögu þegar Sigga sturta fylgdi reglunni eftir hinum megin í húsinu með ekki minni festu en Ingi enda ákveðin kona og vildi hafa allt í röð og reglu.
Fyrsta leikfimidaginn hélt Ingi lítið námskeið fyrir okkur strákana áður en við fórum í sturtu eftir tímann. Innihald þess var að kenna okkur að nýta handklæðin rétt. Hann stóð fyrir framan okkur með eitt slíkt og sagði mikilvægt að skipta því í þrjá jafna hluta. Sýndi okkur svo hvar og hvernig væri best að nota hvern part við þurrkunina. Síðan flétti Ingi handklæðinu í sundur og útskýrði hvernig ætti að halda í sinn hvorn endann fyrir aftan bak og draga það síðan fram og til baka. Eftir allar þessar vendingar væri tryggt að við yrðum skraufþurrir. Þetta þótti okkur mjög verklegt þó misjafnlega hafi gengið að nýta þennan ágæta fróðleik okkur til hagsbóta.
Jafnan var mikið fjör í strákaklefanum eftir leikfimitímana. Þetta var á þeim árum þegar við veltum mikið fyrir okkur hver væri sterkastur og þar með mesti kappinn í 43-árganginum. Almælt var að Konráð, sonur Jóa Konn söngvara, væri sá sterkasti enda knár á velli. Svo var það einu hverju sinni að stungið var upp á því í búningsklefanum að fá endanlega úr þessu skorið og lagt til að Konni færi í sjómann við einhvern okkar. En hver átti það að vera? Fyrir einhverja dauðans ólukku bárust böndin að ykkar einlægum og óðar var mér ýtt út í þessa ófæru þrátt fyrir örvæntingarfulla tilraun til að komast undan því.
Við Konni lögðumst endilangir á gólfið, hvor á móti öðrum haus í haus. Strákarnir hópuðust allt í kring og hrópuðu hvatningarorð til okkar þar sem við réttum fram hægri hendur og lúkurnar féllu saman fyrir átökin. Svo hrópaði einhver: „Byrja.” Hægt og hikandi hertum við tökin og fóru hendurnar að skjálfa vegna átaksins. Fyrstu sekúndurnar liðu án tíðinda og allt fast. Sjálfur remdist ég eins og rúpan við staurinn og vildi ekki gefa mig fyrr enn í fulla hnefana; vonaði að mér tækist að þreyta andstæðinginn og hafa hann á þrjóskunni ef styrkinn þryti. En enginn má sköpum renna. Með styrk sínum og atgervi tókst Konna að færa hönd mína í ranga átt og fór nú mjög að halla á áskorandann. Þá tók ég á síðustu kröftunum en ekkert dugði, hönd mín seig virðulega niður á gólfið og ósigur staðfestur. Þar með var ljóst að Konni var sterkastur í árganginum og óþarfi að deila frekar um það. Árin liðu og þegar við urðum svo samstarfsmenn áratugum síðar í Slippstöðinni var vinátta okkar endurnýjuð og endanlega staðfest báðum til ómældrar ánægju. Konni var alla sína tíð mikið heljarmenni sem tekið var eftir en ávallt drengur góður.
Ingólfur Sverrisson
Nýjast
-
Eignarhald bænda á jörðum tryggir hag þeirra best
Umræða um jarðir, jarðaviðskipti og kynslóðaskipti í landbúnaði er og á að vera fyrirferðarmikil í umræðu um stöðu sveitanna. Enda var málefnið eitt helsta umræðuefni á haustfundum Bændasamtaka Íslands. Uppkaup og jarðasöfnun fjárfesta og samkeppnisstöðu landbúnaðar. Um stöðu ungra bænda og eldri bænda sem væru að afhenda bú sín til yngri kynslóða. -
Orkumál
Alþingiskosningar ber brátt að garði. Þar skipar undirrituð 2. sætið á lista VG í norðausturkjördæmi. Ég bý á Björgum í Kinn í Þingeyjarsýslu þar sem systir mín og ég tókum við búi 2017 af foreldrum okkar. Þar er mjólkurframleiðsla, umfangsmikil jarðrækt, kornrækt og örfáar kindur.Meðal starfa minna í félagsmálum má nefna formennsku í Samtökum ungra bænda og þá hef ég setið í sveitarstjórn Þingeyjarsveitar frá árinu 2018 og er nú formaður byggðarráðs -
Þakklæti er varla nægilega sterkt lýsingarorð
„Ég þurfti að gera hlé á máli mínu því tárin bara runnu niður kinnarnar,“ segir Marta Kristín Rósudóttir verkefnastjóri hjá Krabbameinsfélagi Akureyrar og nágrennis. Dekurdagar afhentu félaginu alls 6, 7 milljónir króna og hefur upphæðin aldrei verið hærri en nú. Frá árinu 2012 hafa Dekurdagar safnað 37.850.000 kr. fyrir Krabbameinsfélag Akureyrar -
Fjórtándi jólasveinninn hjá Freyvangsleikhúsinu
Fjórtándi jólasveinninn er frumsamið jólaverk eftir Ásgeir Ólafsson Lie sem segir sögu af hinum hefðbundnu jólasveinunum 13 sem og Grýlu, Leppalúða og jólakettinum. Nema í þessu leikverki eru jólasveinarnir ekki bara þrettán heldur er þarna sá fjórtándi sem enginn átti von á. Leikritið verður frumsýnt hjá Freyvangsleikhúsinu á laugardag, 23. nóvember og verður sýnt á aðventunni. -
Dásamlegt og gefandi að starfa í kvenfélagi
„Það er dásamlegt að starfa í kvenfélagi. Þetta er yndislegur félagsskapur, gefandi á allan hátt. Við skemmtum okkur vel, látum gott af okkur leiða en vinnum okkar verk yfirleitt í hljóði og erum ekki að auglýsa það sérstaklega þó við gerum góðverk,“ segir Auður Thorberg formaður Kvenfélagsins Hjálparinnar í Eyjafjarðarsveit. -
Mikil ásókn í íbúðir á vegum Bjargs á Húsavík
Óhætt er að segja að mikill áhugi sé á íbúðum sem Bjarg íbúðafélag er að byggja á Húsavík í samstarfi við Norðurþing, en þetta kemur fram á heimasíðu Framsýnar í dag. -
Litlu jólin á sjó!
Áralöng hefð er fyrir því að áhafnir fiskiskipa Samherja haldi litlu jól í aðdraganda jólanna. Kokkarnir töfra þá fram hverja kræsinguna af annarri. Litlu jól áhafna Kaldbaks og Snæfells voru haldin hátíðleg á dögunum. -
Boðað verkfall lækna mun hafa áhrif á þjónustu SAk.
Félagsmenn í Læknafélagi Íslands hafa samþykkt verkfallsboðun og hafi ekki samist skellur boðað verkfall lækna á eftir nokkra daga eða um miðnætti aðfaranótt mánudagsins 25. nóvember n.k. -
Hvítasunnukirkjan styrkir Hollvinasamtök
Hollvinasamtök Sjúkrahússins á Akureyri fengu afhentan rausnarlegan peningastyrk frá Hvítasunnusöfnuðinum, alls 800 þúsund krónur nýverið.
