20. nóvember - 27. nóvember - Tbl 47
Akureyri, með hjartað á réttum stað
"Áhyggjurnar reyndust ástæðulausar, ferliþjónustan er til fyrirmyndar, það er vel haldið utanum hlutina, lipurð og jákvæðni ræður ríkjum hjá bílstjórum og öllum starfsmönnum," segir Erla Sigurðardóttir. Mynd/Ármann Hinrik.
Nú eru rúm tvö ár síðan að við fjölskyldan fluttum til Akureyrar. Það er í sjálfu sér ekki í frásögu færandi að fjögurra manna fjölskylda flytji búferlum. Í okkar tilfelli hefðu flutningar getað orðið flóknari en almennt gerist, þeim tengdust miklar væntingar og óvissa. Sonur okkar var nýorðinn 14 ára þegar við fluttum. Hann er fjölfatlaður, fer allra sinna ferða í hjólastól og þarf aðstoð við allar athafnir daglegs lífs.
Á mannamáli þýðir það að hann þarf manninn með sér daginn út og inn. Fötlun hans og flóknar þjónustuþarfir vógu þungt þegar við tókum ákvörðun um að flytja eftir tæplega 20 ára búsetu í sama húsinu. Um árabil hafði hann reyndar notið þjónustu Skammtímavistunar hér á Akureyri og verið í sérdeild Giljaskóla eina viku í mánuði. Við þekktum því til þjónustunnar, vissum af góðu fagfólki með fagmannlegt og ljúft viðmót. Væntingarnar voru því talsverðar um góða þjónustu og skilning á okkar aðstæðum. Það er skemmst frá því að segja að Akureyri stóðst þær væntingar og meira til frá fyrsta degi og raunar fyrr.
Um leið og við létum vita af því að flutningar stæðu til höfðu starfsmenn Fjölskyldudeildar samband við okkur og undirbúningur að flutningi hófst. Frá þeim degi höfum við mætt fagmennsku og skilningi á flóknum þörfum fjölskyldunnar hvar sem við höfum borið niður. Starfsfólk er metnaðarfullt og leggur sig fram um að veita úrvals þjónustu innan þess fjárhagsramma sem því er sniðinn. Við upplifum að vakað sé yfir velferð sonar okkar og þar með okkar allra, hugað að því að draga úr álagi, rjúfa einangrun og á allan hátt gera daglegt líf okkar sem einfaldast og líkast venjulegu fjölskyldulífi.
Erla Sigurðardóttir
Áhyggjurnar reyndust ástæðulausar
Þrátt fyrir miklar væntingar var eitt og annað sem olli áhyggjum. Hvernig væri til dæmis með ferliþjónustuna? Við vorum vön mjög persónulegri þjónustu og samskiptum í tengslum við hana. Það gæti ómögulega verið þannig í stærra samfélagi. Áhyggjurnar reyndust ástæðulausar, ferliþjónustan er til fyrirmyndar, það er vel haldið utanum hlutina, lipurð og jákvæðni ræður ríkjum hjá bílstjórum og öllum starfsmönnum. En það eru fleiri en opinberir starfsmenn í skóla- og fötlunargeiranum sem skipta máli fyrir fjölskyldu eins og okkar. Eðli málsins samkvæmt erum við „góðkunningjar“ og stórviðskiptavinir lyfjaverslana, á því sviði vorum við vön einstakri lipurð og þægindum og nutum nándarinnar. Enn kom Akureyri þægilega á óvart, ljúfur lyfjafræðingur með einstaklega fallega framkomu hefur passað uppá okkur frá fyrsta degi. Það er heldur ekki einfalt að finna sjúkraþjálfara eða heimilislækni að ekki sé talað um tannlækni sem tekst vel á við verkefnið – líka þar átti Akureyri rétta fólkið.
Okkar gæfuspor að flytja til Akureyrar
Síðastliðið vor kvaddi unglingurinn Giljaskóla og það góða fagfólk sem þar starfar. Í haust lá leiðin í VMA, þar tók á móti honum samhentur og faglegur hópur. Starfið er til fyrirmyndar og framhaldsskólaneminn blómstrar. Það er ekki sjálfgefið að mæta ávallt skilningi, virðingu og fagmennsku á öllum vígstöðvum. Það er merki um heilbrigt samfélag þar sem fólki líður vel. Það var okkur gæfuspor að flytja til Akureyrar sem er með hjartað á réttum stað í orðsins fyllstu merkingu.
-Erla Sigurðardóttir
Nýjast
-
Klúbbar styrkja Frú Ragnheiði
Klúbbarnir Ladies Circle 7 og Round Table 15 afhentu Frú Ragnheiði rausnarlegar styrk í vikunni, ómetnalegur styrkur . „Við erum svo innilega þakklát og mun þetta nýtast skjólstæðingum okkar vel segir í tilkynningu, en styrkurinn er að upphæð um 630 þúsund krónur. -
Gjaldfrjáls leikskóli dregur úr álagi og bætir líðan barna
Gjaldfrjáls leikskóli hefur reynst áhrifarík leið til að draga úr álagi í leikskólum, á skólastjórnendur og starfsfólk og hefur jákvæð áhrif á börnin. -
Grenivík-Vel gert hjá Óla Gunnari
Heimilismenn á Grenilundi hafa að undanförnu tekið þátt í hjólakeppninni Pedal On Road Worlds For Seniors. Keppnin stóð yfir frá 7. október til 1. nóvember. -
Jólaljós og lopasokkar í Hofi
Jólatónleikarnir Jólaljós og lopasokkar verður haldnir í Menningarhúsinu Hofi 1. desember næstkomandi og hefjast kl. 17. Þetta er fjölskylduvænir tónleikar, norðlensk framleiðsla og miðaverði stillt í hóf. Alls koma fram fjórir söngvarar, kór, hljómsveit og dansarar. -
Eignarhald bænda á jörðum tryggir hag þeirra best
Umræða um jarðir, jarðaviðskipti og kynslóðaskipti í landbúnaði er og á að vera fyrirferðarmikil í umræðu um stöðu sveitanna. Enda var málefnið eitt helsta umræðuefni á haustfundum Bændasamtaka Íslands. Uppkaup og jarðasöfnun fjárfesta og samkeppnisstöðu landbúnaðar. Um stöðu ungra bænda og eldri bænda sem væru að afhenda bú sín til yngri kynslóða. -
Orkumál
Alþingiskosningar ber brátt að garði. Þar skipar undirrituð 2. sætið á lista VG í norðausturkjördæmi. Ég bý á Björgum í Kinn í Þingeyjarsýslu þar sem systir mín og ég tókum við búi 2017 af foreldrum okkar. Þar er mjólkurframleiðsla, umfangsmikil jarðrækt, kornrækt og örfáar kindur.Meðal starfa minna í félagsmálum má nefna formennsku í Samtökum ungra bænda og þá hef ég setið í sveitarstjórn Þingeyjarsveitar frá árinu 2018 og er nú formaður byggðarráðs -
Þakklæti er varla nægilega sterkt lýsingarorð
„Ég þurfti að gera hlé á máli mínu því tárin bara runnu niður kinnarnar,“ segir Marta Kristín Rósudóttir verkefnastjóri hjá Krabbameinsfélagi Akureyrar og nágrennis. Dekurdagar afhentu félaginu alls 6, 7 milljónir króna og hefur upphæðin aldrei verið hærri en nú. Frá árinu 2012 hafa Dekurdagar safnað 37.850.000 kr. fyrir Krabbameinsfélag Akureyrar -
Fjórtándi jólasveinninn hjá Freyvangsleikhúsinu
Fjórtándi jólasveinninn er frumsamið jólaverk eftir Ásgeir Ólafsson Lie sem segir sögu af hinum hefðbundnu jólasveinunum 13 sem og Grýlu, Leppalúða og jólakettinum. Nema í þessu leikverki eru jólasveinarnir ekki bara þrettán heldur er þarna sá fjórtándi sem enginn átti von á. Leikritið verður frumsýnt hjá Freyvangsleikhúsinu á laugardag, 23. nóvember og verður sýnt á aðventunni. -
Dásamlegt og gefandi að starfa í kvenfélagi
„Það er dásamlegt að starfa í kvenfélagi. Þetta er yndislegur félagsskapur, gefandi á allan hátt. Við skemmtum okkur vel, látum gott af okkur leiða en vinnum okkar verk yfirleitt í hljóði og erum ekki að auglýsa það sérstaklega þó við gerum góðverk,“ segir Auður Thorberg formaður Kvenfélagsins Hjálparinnar í Eyjafjarðarsveit.
