Að kafna úr frekju.
Eitt sinn gekk ég fram á leiði ókunnugs manns. Á steininum hans stóð „menn eiga að hafa vit á því að vera í góðu skapi.” Mér fannst þetta svo gott að ég lagði það á minnið og rifja það gjarnan upp með sjálfri mér þegar ég er ljót í hugsun, sjálfhverf og leiðinleg. Það gerist því miður of oft. Ef auðmýkt er fyrir hendi er hægt að rækta með sér gleði og háttprýði og verða skárri manneskja í dag en í gær. Það er ef til vill ágætis áskorun til okkar allra nú um stundir.
Á þessu landi eru áberandi margir sjálfhverfir, þrasgjarnir, fullir af heift og dónalegir. Öfgafull samskipti fólks bera þess óræk merki. Einkennilega margt harðfullorðið fólk vílar ekki fyrir sér að níða niður æðstu stofnanir og embættismenn þjóðarinnar, lögregluna, vísindamenn og jafnvel björgunarsveitir. Svo ekki sé talað um þegar veist er að líkamlegum einkennum fólks. Allt þetta stuðlar að sundrung og hatri. Fólk er ýmist rautt af bræði eða ætlar að vera ofboðslega fyndið, blindað af sjálfhverfu.
Ungmennin okkar læra svo það sem fyrir þeim er haft. Börn eru alltaf góð og hreinar sálir og unglingar gáfaðir og gott fólk sem er að þroskast og breytast í falleg fiðrildi. Þau eru eins og svampur og drekka í sig það sem þau sjá, heyra og upplifa og verða síðan spegilmyndir þess umhverfis sem þau alast upp í. Það er hegðun okkar fullorðna fólksins sem skapar fyrirmyndina. Niðrandi orð, óvirðing, yfirgangur og reiði. Svo erum við hissa, belgjum okkur út og leitum að sökudólgum sem oftast er að finna undir okkar eigin kodda.
Við getum gert milljón greiningar og mokað lyfjum í börnin. Stofnað stýrihópa, rýnihópa, faghópa, byggt meðferðarheimili og fangelsi og ausið fé í dæmið. Útkoman verður samt sú sama, ef við hvert og eitt okkar tökum okkur ekki alvarlega á í hegðun. Enginn er það góður að hann geti ekki orðið betri. Við þurfum að skipta um mold í okkar eigin potti, þá mun fíflunum í kringum okkur fækka. Blásnauðir forfeður okkar sem sköpuðu handa okkur eitt ríkasta samfélag veraldar sem og erfingjar framtíðarinnar, sjálf börnin, eiga skilið að við högum okkur betur.
Látum ekki grafskrift okkar verða „kynslóðin sem átti allt en kafnaði úr frekju.“
Nýjast
-
,,Bráðum kemur ekki betri tíð, því betri getur tíðin ekki orðið”
Það er mun oftar sem sagðar eru fréttir af ófærð og allskonar veseni veðri tengdu á þessum árstíma. Staðan er hinsvegar sú núna að það er óhætt að vitna í Stuðmenn og segja ,,Bráðum kemur ekki betri tíð, þvi betri getur tíðin ekki orðið” -
Fagnað í Grímsey í dag
Fiske-afmælinu er fagnað í Grímsey í dag. Þessi dagur er ávallt stór hátíðarstund og mikilvægur í huga íbúa eyjarinnar. Að vanda munu íbúar fagna deginum með samkomu í félagsheimilinu Múla. Boðið verður upp á girnilegt kvöldverðarhlaðborð kl. 18.00 og skemmtun í framhaldinu. Búist er við að um 30 gestum. -
Auto bregst ekki við tilmælum um tiltekt á lóð
Ekki var brugðist við kröfum Heilbrigðisnefndar Norðurlands eystra um að tekið yrði til á lóð Auto ehf á Svalbarðsströnd og er hún enn lýti á umhverfinu. Samþykkti nefndin að leggja dagsektir á fyrirtækið Auto ehf. að upphæð 50 þúsund krónur á dag frá og með 28.október síðastliðinn. -
Merkilegt póstkort fannst í MA
Merkilegt póstkort kom í leitirnar við tiltekt í skólanum. May Morris, listakona og skartgripahönnuður með meiru og dóttir hins kunna Íslandsvinar William Morris, skrifaði á kortið og sendi til Íslands jólin 1934 -
Það er ekki allt að fara til fjandans!
Af hverju tölum við niður kennara og annað starfsfólk sem vinnur með börnunum okkar? Hvers vegna köllum við ábyrga foreldra leiðinlega og tökum umræðu um börn og ungmenni stöðugt útfrá neikvæðustu rannsóknargögnum sem völ er á? Það tapa allir þegar að við tölum niður framtíð landsins. -
Slippurinn DNG kynnti sjálfvirknilausnir á Sjávarútvegsráðstefnunni
Nýsköpunarframlag í íslenskum sjávarútvegi. Íslenskur sjávarútvegur hefur átt stóran þátt í tækniþróun á heimsvísu, þar sem fyrirtæki í greininni hafa náð góðum árangri í þróun sjálfvirkra og afkastamikilla lausna fyrir fiskvinnslu bæði til sjós og lands. Slippurinn DNG hefur lagt mikla áherslu á að mæta sívaxandi kröfum greinarinnar um aukna skilvirkni og gæði, þar sem notkun sjálfvirkra lausna stuðlar að bættri nýtingu afurða og hagkvæmni í ferlum. Lausnir Slippsins DNG eru einnig sérlega notendavænar, sem eykur notkunarmöguleika þeirra í fjölbreyttum aðstæðum og einfaldar verkferla til muna. -
Að skamma rétt.
Afa Kristinn þekkti ég ekki enda dó hann áratugum áður en ég fæddist. Hann var glaðsinna og ör maður, eljusamur og mannblendinn, tók snöggar ákvarðanir og flýtti sér aldrei hægt. Honum lá hátt rómur og var fljótur að hlaupa, sigraði t.a.m. hlaupakeppni á ungmennafélagshátíð á Laugum árið 1915, hefði trúlega talist heimsmet ef klukkan hefði ekki bilað (að eigin sögn). -
Hringborð norðurslóða þéttsetið fulltrúum Háskólans á Akureyri
Háskólinn tók þátt í Arctic Circle Assembly eða Hringborði norðurslóða dagana 17.-19. október síðastliðinn. HA var með glæsilegan hóp fulltrúa sem tók þátt í pallborðum, málstofum, umræðum og fundum ásamt því að kynna HA á bás í Hörpu þar sem ráðstefnan fór fram. Skólinn tekur mikinn þátt í samstarfi þeirra stofnana hérlendis sem sinna norðurslóðamálum enda eru þær staðsettar að stærstum hluta á háskólasvæðinu. Þá mun HA sameinast Stofnun Vilhjálms Stefánssonar um áramótin, en sú stofnun hefur verið öflug á sviði norðurslóðarannsókna allt frá stofnun. -
Forgangsverkefni að byggja upp lífsgæðakjarna á Akureyri
Það er forgangsverkefni að mati bæjarráðs Akureyrar að lífsgæðakjarni fyrir eldri borgara verði að veruleika. Greining vegna uppbyggingar lífsgæðakjarna voru til umræðu á fundi ráðsins sem og tillögur frá starfshópi sem falið var að vinna málið. Tvö svæði þykja fýsilegust fyrir lífsgæðakjarna, Þursaholt í Holtahverfi norður og svæði milli Naustaborga og Hagahverfis. Uppbygging lífsgæðakjarna verður sett á starfsáætlun skipulagsráð fyrir árið 2025 og hyggst bæjarráð taka málið til umræðu á ný í janúar á næsta ári. Þá verður metið með hvaða hætti best sé að fylgja málinu eftir þannig að sem mestar líkur séu á að lífsgæðakjarni verði að veruleika eins fljótt og auðið er.
