Tangarfæðing umferðarmiðstöðvar
Í síðasta Vikudegi er haft eftir Ingibjörgu Ísaksen formanni umhverfis- og mannvirkjasviðs Akureyrarbæjar að illa gangi að finna heppilega staðsetningu fyrir samgöngu- eða umferðarmiðstöð og þrátt fyrir mikla leit hafi staðurinn ekki fundist enn. Þessi vandræðagangur vakti undrun mína og furðu með hliðsjón af þeirri staðreynd að í deiliskipulagi fyrir miðbæinn frá árinu 2014, sem samþykkt var samhljóða í bæjarstjórn, var tekin ákvörðun um staðsetningu umferðarmiðstöðvar með formlegum hætti sem er enn í gildi. Þessa er að engu getið í umfjöllun blaðsins.
Hvar er þá þessi dularfulli staður sem allir í bæjarstjórn voru sammála um við gerð deiliskipulagsins eftir miklar vangaveltur og ítarleg skoðanaskipti? Í niðurlagi kafla 7.6.1 í greinargerð um skipulagið segir: „Í deiliskipulaginu er gert ráð fyrir að umferðarmiðstöð verði staðsett norðan Ráðhúss Akureyrar og verður þar miðstöð almenningssamgangna, hvort heldur er innanbæjar eða landshluta á milli.“ Getur þetta verið öllu skýrar? Ennfremur er þar gert ráð fyrir annarri þjónustu sem almenningur og gestir bæjarins þurfa á að halda á slíkum stað. Eðlilega þarf að útfæra þessa ákvörðun frekar en því miður hefur ekkert verið gert í þá átt síðustu misseri þrátt fyrir að fjármunir hafi verið settir í það á fjárhagsáætlun bæjarins. Þess í stað er hjalað um staðsetningu sem löngu er búið að ákveða með lögmætum hætti.
Í því sambandi hef ég bent á að sjálf umferðarmiðstöðin gæti staðið neðst í Smáragötu. Nauðsynleg bílastæði geta verið þar í kring og moldarvöllurinn fyrir neðan Akureyrarvöll einnig nýttur til þess arna enda gera íþróttafélögin enga kröfur lengur um það svæði og raunar ekki heldur um íþróttasvæðið sjálft. Þarna er því álitlegt að byggja upp góða aðstöðu og móta um leið nauðsynlega þjónustumiðstöð sem sárlega vantar í bæinn. Þangað geta stórir bílar og smáir, sem koma að norðan, rennt til hægri af Glerárgötunni og inn að miðstöðinni og þeir sem koma að sunnan fara um væntanlegt hringtorg við Grænugötu og þaðan á sama áfangastað. Sem sagt: Mjög þægileg nálgun að nýrri umferðarmiðstöð úr öllum áttum en samt miðsvæðis.
Ég leyfi mér ennfremur að minna á þá hugmynd að byggja myndarlegt bílastæðahús á þremur hæðum austan Brekkugötu og ofan við nyrsta hluta Hólabrautar. Með þeirri framkvæmd og byggingu umferðarmiðstöðvar ofurlítið neðar væri búið að leysa mörg aðkallandi vandamál sem hamla nú frekari uppbyggingu miðbæjarins í samræmi við gildandi skipulag. Sjálfur tel ég að tími umræðu um þetta mál sé liðinn enda hefur hún staðið yfir síðustu fjórtán árin. Nú er kominn tími aðgerða og framkvæmda enda ekki eftir neinu að bíða. Grundvallarákvarðanir hafa þegar verið teknar.
-Ragnar Sverrisson, kaupmaður
Nýjast
-
Klúbbar styrkja Frú Ragnheiði
Klúbbarnir Ladies Circle 7 og Round Table 15 afhentu Frú Ragnheiði rausnarlegar styrk í vikunni, ómetnalegur styrkur . „Við erum svo innilega þakklát og mun þetta nýtast skjólstæðingum okkar vel segir í tilkynningu, en styrkurinn er að upphæð um 630 þúsund krónur. -
Gjaldfrjáls leikskóli dregur úr álagi og bætir líðan barna
Gjaldfrjáls leikskóli hefur reynst áhrifarík leið til að draga úr álagi í leikskólum, á skólastjórnendur og starfsfólk og hefur jákvæð áhrif á börnin. -
Grenivík-Vel gert hjá Óla Gunnari
Heimilismenn á Grenilundi hafa að undanförnu tekið þátt í hjólakeppninni Pedal On Road Worlds For Seniors. Keppnin stóð yfir frá 7. október til 1. nóvember. -
Jólaljós og lopasokkar í Hofi
Jólatónleikarnir Jólaljós og lopasokkar verður haldnir í Menningarhúsinu Hofi 1. desember næstkomandi og hefjast kl. 17. Þetta er fjölskylduvænir tónleikar, norðlensk framleiðsla og miðaverði stillt í hóf. Alls koma fram fjórir söngvarar, kór, hljómsveit og dansarar. -
Eignarhald bænda á jörðum tryggir hag þeirra best
Umræða um jarðir, jarðaviðskipti og kynslóðaskipti í landbúnaði er og á að vera fyrirferðarmikil í umræðu um stöðu sveitanna. Enda var málefnið eitt helsta umræðuefni á haustfundum Bændasamtaka Íslands. Uppkaup og jarðasöfnun fjárfesta og samkeppnisstöðu landbúnaðar. Um stöðu ungra bænda og eldri bænda sem væru að afhenda bú sín til yngri kynslóða. -
Orkumál
Alþingiskosningar ber brátt að garði. Þar skipar undirrituð 2. sætið á lista VG í norðausturkjördæmi. Ég bý á Björgum í Kinn í Þingeyjarsýslu þar sem systir mín og ég tókum við búi 2017 af foreldrum okkar. Þar er mjólkurframleiðsla, umfangsmikil jarðrækt, kornrækt og örfáar kindur.Meðal starfa minna í félagsmálum má nefna formennsku í Samtökum ungra bænda og þá hef ég setið í sveitarstjórn Þingeyjarsveitar frá árinu 2018 og er nú formaður byggðarráðs -
Þakklæti er varla nægilega sterkt lýsingarorð
„Ég þurfti að gera hlé á máli mínu því tárin bara runnu niður kinnarnar,“ segir Marta Kristín Rósudóttir verkefnastjóri hjá Krabbameinsfélagi Akureyrar og nágrennis. Dekurdagar afhentu félaginu alls 6, 7 milljónir króna og hefur upphæðin aldrei verið hærri en nú. Frá árinu 2012 hafa Dekurdagar safnað 37.850.000 kr. fyrir Krabbameinsfélag Akureyrar -
Fjórtándi jólasveinninn hjá Freyvangsleikhúsinu
Fjórtándi jólasveinninn er frumsamið jólaverk eftir Ásgeir Ólafsson Lie sem segir sögu af hinum hefðbundnu jólasveinunum 13 sem og Grýlu, Leppalúða og jólakettinum. Nema í þessu leikverki eru jólasveinarnir ekki bara þrettán heldur er þarna sá fjórtándi sem enginn átti von á. Leikritið verður frumsýnt hjá Freyvangsleikhúsinu á laugardag, 23. nóvember og verður sýnt á aðventunni. -
Dásamlegt og gefandi að starfa í kvenfélagi
„Það er dásamlegt að starfa í kvenfélagi. Þetta er yndislegur félagsskapur, gefandi á allan hátt. Við skemmtum okkur vel, látum gott af okkur leiða en vinnum okkar verk yfirleitt í hljóði og erum ekki að auglýsa það sérstaklega þó við gerum góðverk,“ segir Auður Thorberg formaður Kvenfélagsins Hjálparinnar í Eyjafjarðarsveit.
