20. nóvember - 27. nóvember - Tbl 47
Skilaboð samgönguráðherra
Ragnar Sverrisson.
Á þessum síðustu og verstu tímum veirunnar voðalegu má greina almenna samstöðu meðal landsmanna um að hefja gagnsókn strax og sigur er unninn á vágestinum. Gert er ráð fyrir að í þeirri sókn muni ríki og sveitarfélög hafa frumkvæði að framkvæmdum víða um land og hvetja um leið fjárfesta til að fylgja í kjölfarið og taka þátt í enn frekari uppbyggingu innviða samfélagsins.
Í viðtali við RÚV á dögunum við samgönguráðherra og formann Framsóknarflokksins, Sigurð Inga Jóhannsson, áréttaði hann að ríkisvaldið myndi leggja fram verulega fjármuni í ýmis konar uppbyggingu víða um land. Hann bætti síðan við að nauðsynlegt væri að sveitarfélögin gerðu slíkt hið sama, fjárfestu í uppbyggingu til framtíðar og tækju jafnvel lán ef það þyrfti til að koma hlutunum í framkvæmd. Í orðunum fólst að sveitarfélögin gætu ekki látið nægja að gera kröfur á ríkisvaldið; þau þyrftu líka að leggja sitt fram og sýna að þeim væri alvara.
Meiri kröfur til annarra
Eins og við Akureyringar þekkjum vel er forsvarsfólk í bæjarmálum töluvert iðið við að lemja á "þeim fyrir sunnan" þegar því þykir seint ganga í ýmsu sem ríkisvaldið á að hafa á sinni könnu hér fyrir norðan. Eru þá ekki spöruð stóru orðin um deyfð og jafnvel skilningsleysi valdhafa fyrir sunnan. Allt í góðu með það enda full ástæða til að halda ríkisvaldinu og alþingi við efnið. Hins vegar verður allur þessi ákafi næsta broslegur þegar kemur að þeim verkefnum sem þetta ágæta fólk ber sjálft ábyrgð á að komist til framkvæmda hér hjá okkur. Þá slær það jafnvel sunnanmönnum við með tafaleikjum og sjúklegri frestunaráráttu. Frægasta dæmið er auðvitað miðbæjarskipulagið sem samþykkt var samhljóða í bæjarstjórn árið 2014 eftir tíu ára undirbúning. Frekar en að koma því í framkvæmd hefur bæjarstjórn skipað nefnd á nefnd ofan til að fjalla um einstaka liði skipulagsins eða það í heild. Enn sem komið er hefur nákvæmlega ekkert komið út úr því starfi nema mas og kostnaður fyrir bæjarsjóð. Á meðan gerist ekkert og það sem sorglega er að engin leið er að kenna þeim fyrir sunnan um seinaganginn.
Nýta tækifærið
Með þetta í huga eru þessi ágætu hvatningarorð samgönguráðherra, um frumkvæði heimamanna við uppbyggingu í kjölfar veirunnar, bæði tímabær og skynsöm. Að þessu sögðu tel ég vel viðeigandi að minna á tillögu mína í Vikudegi 26.09.2019 þess efnis að bærinn taki lán til að hefja framkvæmdir samkvæmt miðbæjarskipulaginu og leysi þetta mikilvæga verkefni með því úr læðingi. Þá geta áhugasamir fjárfestar og byggingafyrirtæki loks sótt um þessar dýrmætustu lóðir bæjarins og hafið uppbyggingu í samræmi við gildandi skipulag. Samkvæmt óvísindalegri rannsókn minni bendir flest til þess að öflugir fjárfestar muni þá sjá sér leik á borði og beina umtalsverðu fé til þessarar uppbyggingar. Rís þá nýr og vistvænn miðbær við hlið þess gamla í samræmi við vilja fjölmennasta íbúaþings sem haldið hefur verið á Akureyri og þó víða væri leitað. Vonandi verður hvatning samgönguráðherra til þess að bæjaryfirvöld á Akureyri bregðist loks við og hefji framkvæmdir við uppbyggingu miðbæjar sem mun taka öðrum slíkum fram með fjölskrúðugt og lifandi mannlíf. Þar munu einnig blómstra fjöbreytt þjónustufyrirtæki sem þrífast best í kröftugum og aðlaðandi miðbæ.
-Ragnar Sverrisson, kaupmaður
Nýjast
-
Klúbbar styrkja Frú Ragnheiði
Klúbbarnir Ladies Circle 7 og Round Table 15 afhentu Frú Ragnheiði rausnarlegar styrk í vikunni, ómetnalegur styrkur . „Við erum svo innilega þakklát og mun þetta nýtast skjólstæðingum okkar vel segir í tilkynningu, en styrkurinn er að upphæð um 630 þúsund krónur. -
Gjaldfrjáls leikskóli dregur úr álagi og bætir líðan barna
Gjaldfrjáls leikskóli hefur reynst áhrifarík leið til að draga úr álagi í leikskólum, á skólastjórnendur og starfsfólk og hefur jákvæð áhrif á börnin. -
Grenivík-Vel gert hjá Óla Gunnari
Heimilismenn á Grenilundi hafa að undanförnu tekið þátt í hjólakeppninni Pedal On Road Worlds For Seniors. Keppnin stóð yfir frá 7. október til 1. nóvember. -
Jólaljós og lopasokkar í Hofi
Jólatónleikarnir Jólaljós og lopasokkar verður haldnir í Menningarhúsinu Hofi 1. desember næstkomandi og hefjast kl. 17. Þetta er fjölskylduvænir tónleikar, norðlensk framleiðsla og miðaverði stillt í hóf. Alls koma fram fjórir söngvarar, kór, hljómsveit og dansarar. -
Eignarhald bænda á jörðum tryggir hag þeirra best
Umræða um jarðir, jarðaviðskipti og kynslóðaskipti í landbúnaði er og á að vera fyrirferðarmikil í umræðu um stöðu sveitanna. Enda var málefnið eitt helsta umræðuefni á haustfundum Bændasamtaka Íslands. Uppkaup og jarðasöfnun fjárfesta og samkeppnisstöðu landbúnaðar. Um stöðu ungra bænda og eldri bænda sem væru að afhenda bú sín til yngri kynslóða. -
Orkumál
Alþingiskosningar ber brátt að garði. Þar skipar undirrituð 2. sætið á lista VG í norðausturkjördæmi. Ég bý á Björgum í Kinn í Þingeyjarsýslu þar sem systir mín og ég tókum við búi 2017 af foreldrum okkar. Þar er mjólkurframleiðsla, umfangsmikil jarðrækt, kornrækt og örfáar kindur.Meðal starfa minna í félagsmálum má nefna formennsku í Samtökum ungra bænda og þá hef ég setið í sveitarstjórn Þingeyjarsveitar frá árinu 2018 og er nú formaður byggðarráðs -
Þakklæti er varla nægilega sterkt lýsingarorð
„Ég þurfti að gera hlé á máli mínu því tárin bara runnu niður kinnarnar,“ segir Marta Kristín Rósudóttir verkefnastjóri hjá Krabbameinsfélagi Akureyrar og nágrennis. Dekurdagar afhentu félaginu alls 6, 7 milljónir króna og hefur upphæðin aldrei verið hærri en nú. Frá árinu 2012 hafa Dekurdagar safnað 37.850.000 kr. fyrir Krabbameinsfélag Akureyrar -
Fjórtándi jólasveinninn hjá Freyvangsleikhúsinu
Fjórtándi jólasveinninn er frumsamið jólaverk eftir Ásgeir Ólafsson Lie sem segir sögu af hinum hefðbundnu jólasveinunum 13 sem og Grýlu, Leppalúða og jólakettinum. Nema í þessu leikverki eru jólasveinarnir ekki bara þrettán heldur er þarna sá fjórtándi sem enginn átti von á. Leikritið verður frumsýnt hjá Freyvangsleikhúsinu á laugardag, 23. nóvember og verður sýnt á aðventunni. -
Dásamlegt og gefandi að starfa í kvenfélagi
„Það er dásamlegt að starfa í kvenfélagi. Þetta er yndislegur félagsskapur, gefandi á allan hátt. Við skemmtum okkur vel, látum gott af okkur leiða en vinnum okkar verk yfirleitt í hljóði og erum ekki að auglýsa það sérstaklega þó við gerum góðverk,“ segir Auður Thorberg formaður Kvenfélagsins Hjálparinnar í Eyjafjarðarsveit.
