Samstaða skilar verkafólki árangri
Eins og kunnugt er, samþykkti formannafundur Alþýðusambands Íslands að segja ekki upp gildandi kjarasamningum. Þetta varð niðurstaðan eftir að formenn aðildarfélaganna höfðu kannað vilja félagsmanna til uppsagnar, hver í sínu baklandi. Undirritaður, sem er formaður Einingar-Iðju, greiddi atkvæði gegn uppsögn samninganna, enda lá fyrir skýr afstaða trúnaðarráðs félagsins til þessa máls. Í raun má segja að með þessari niðurstöðu formannafundarins hafi verið ákveðið að láta núverandi kjarasamning renna sitt skeið, til áramóta.
Skýr afstaða trúnaðarráðs
Samkvæmt lögum Einingar-Iðju ber 100 manna trúnaðarráð félagsins ábyrgð á kjarasamningagerð. Áður en formannafundur ASÍ tók afstöðu til gildandi kjarasamninga, var trúnaðarráðið því kallað saman til fundar, þar sem leynileg atkvæðagreiðsla fór fram eftir ítarlegar umræður.
Skemmst er frá því að segja að mikill meirihluti ráðsins samþykkti að segja ekki upp gildandi kjarasamningum. Fundur trúnaðarráðs var vel sóttur og um 75% fundarmanna greiddu atkvæði á móti því að segja upp samningunum. Niðurstaðan var með öðrum orðum skýr og því féll atkvæði formanns félagsins á fyrrgreindum formannafundi ASÍ eins og fyrr segir.
Rétt er að taka fram að áður en boðað var til trúnaðarráðsfundarins, höfðu kjaramálin verði rædd ítarlega á fundum svæðisráða og öðrum fundum á vegum félagsins.
Hyggilegra að tryggja réttindi
Á almennum félagsfundum og í trúnaðarráði kom berlega í ljós að fullt tilefni væri til uppsagnar kjarasamningsins. Úrskurðir kjararáðs voru harðlega gagnrýndir, svo og hækkanir á launum æðstu stjórnenda banka og ýmissa stofnana.
Á móti var bent á að ekki eru margir mánuðir eftir af gildandi samningum og að tryggð væri 3% almenn launahækkun 1. maí og rúmlega 7% hækkun lágmarkslauna, þannig að þau verði 300 þúsund krónur.
Það væri því hyggilegra að tryggja þessi réttindi og nota tímann til hausts til að móta kröfugerð og undirbúa komandi kjaraviðræður.
Í síðustu kjaraviðræðum lagði Starfsgreinasamband Íslands áherslu á að lágmarkslaunin verði 300 þúsund krónur á mánuði. Það markmið verður að veruleika 1. maí nk.
Brýnt að nýta tímann vel
Aðalfundur Einingar-Iðju verður haldin 22. mars klukkan 19:30 í Hofi á Akureyri. Í kjölfarið verður samninganefnd félagsins kölluð saman, en í henni eru um 50 fulltrúar.
Það segir sig sjálft að samninganefndin þarf að halda vel á spilunum, fyrsta verkið verður að skipuleggja vinnuna við mótun og gerð kröfugerðar félagsins.
Í þeirri vinnu skiptir höfuðmáli að ná til sem flestra félagsmanna. Eining-Iðja hefur alltaf kappkostað að kalla eftir áliti félagsmanna. Boðað verður til funda og ítarlegar skoðanakannanir gerðar.
Þegar kröfugerðin liggur fyrir, verður væntanlega tekin afstaða til þess hvort félagið ákveður að vera í samfloti með öðrum félögum í Starfsgreinasambandi Íslands.
Það er því mikil vinna framundan og brýnt er að nýta tímann vel.
Hörð kjarabarátta í farvatninu
Miðað við svör vinnuveitenda í tengslum við komandi kjaraviðræður, getur farið svo að kjarabaráttan verði harðari en oft áður.
Góður undirbúningur er lykillinn að kröftugri kjarabaráttu. Samstaða skilar árangri, það hefur margsinnis sýnt sig. Ég hvet því félagsmenn til að taka virkan þátt í félagsstarfi Einingar-Iðju.
Það ríkir góðæri í landinu og verkafólk á að njóta þess.
Ekki bara topparnir og sjálftökuliðið í þjóðfélaginu.
-Björn Snæbjörnsson, formaður Einingar-Iðju
Nýjast
-
Klúbbar styrkja Frú Ragnheiði
Klúbbarnir Ladies Circle 7 og Round Table 15 afhentu Frú Ragnheiði rausnarlegar styrk í vikunni, ómetnalegur styrkur . „Við erum svo innilega þakklát og mun þetta nýtast skjólstæðingum okkar vel segir í tilkynningu, en styrkurinn er að upphæð um 630 þúsund krónur. -
Gjaldfrjáls leikskóli dregur úr álagi og bætir líðan barna
Gjaldfrjáls leikskóli hefur reynst áhrifarík leið til að draga úr álagi í leikskólum, á skólastjórnendur og starfsfólk og hefur jákvæð áhrif á börnin. -
Grenivík-Vel gert hjá Óla Gunnari
Heimilismenn á Grenilundi hafa að undanförnu tekið þátt í hjólakeppninni Pedal On Road Worlds For Seniors. Keppnin stóð yfir frá 7. október til 1. nóvember. -
Jólaljós og lopasokkar í Hofi
Jólatónleikarnir Jólaljós og lopasokkar verður haldnir í Menningarhúsinu Hofi 1. desember næstkomandi og hefjast kl. 17. Þetta er fjölskylduvænir tónleikar, norðlensk framleiðsla og miðaverði stillt í hóf. Alls koma fram fjórir söngvarar, kór, hljómsveit og dansarar. -
Eignarhald bænda á jörðum tryggir hag þeirra best
Umræða um jarðir, jarðaviðskipti og kynslóðaskipti í landbúnaði er og á að vera fyrirferðarmikil í umræðu um stöðu sveitanna. Enda var málefnið eitt helsta umræðuefni á haustfundum Bændasamtaka Íslands. Uppkaup og jarðasöfnun fjárfesta og samkeppnisstöðu landbúnaðar. Um stöðu ungra bænda og eldri bænda sem væru að afhenda bú sín til yngri kynslóða. -
Orkumál
Alþingiskosningar ber brátt að garði. Þar skipar undirrituð 2. sætið á lista VG í norðausturkjördæmi. Ég bý á Björgum í Kinn í Þingeyjarsýslu þar sem systir mín og ég tókum við búi 2017 af foreldrum okkar. Þar er mjólkurframleiðsla, umfangsmikil jarðrækt, kornrækt og örfáar kindur.Meðal starfa minna í félagsmálum má nefna formennsku í Samtökum ungra bænda og þá hef ég setið í sveitarstjórn Þingeyjarsveitar frá árinu 2018 og er nú formaður byggðarráðs -
Þakklæti er varla nægilega sterkt lýsingarorð
„Ég þurfti að gera hlé á máli mínu því tárin bara runnu niður kinnarnar,“ segir Marta Kristín Rósudóttir verkefnastjóri hjá Krabbameinsfélagi Akureyrar og nágrennis. Dekurdagar afhentu félaginu alls 6, 7 milljónir króna og hefur upphæðin aldrei verið hærri en nú. Frá árinu 2012 hafa Dekurdagar safnað 37.850.000 kr. fyrir Krabbameinsfélag Akureyrar -
Fjórtándi jólasveinninn hjá Freyvangsleikhúsinu
Fjórtándi jólasveinninn er frumsamið jólaverk eftir Ásgeir Ólafsson Lie sem segir sögu af hinum hefðbundnu jólasveinunum 13 sem og Grýlu, Leppalúða og jólakettinum. Nema í þessu leikverki eru jólasveinarnir ekki bara þrettán heldur er þarna sá fjórtándi sem enginn átti von á. Leikritið verður frumsýnt hjá Freyvangsleikhúsinu á laugardag, 23. nóvember og verður sýnt á aðventunni. -
Dásamlegt og gefandi að starfa í kvenfélagi
„Það er dásamlegt að starfa í kvenfélagi. Þetta er yndislegur félagsskapur, gefandi á allan hátt. Við skemmtum okkur vel, látum gott af okkur leiða en vinnum okkar verk yfirleitt í hljóði og erum ekki að auglýsa það sérstaklega þó við gerum góðverk,“ segir Auður Thorberg formaður Kvenfélagsins Hjálparinnar í Eyjafjarðarsveit.
