Undirbúningur fyrir lofthreinsiver á Bakka kominn vel á veg
Fyrri hluta undirbúningsvinnu við áform Carbon Iceland um að reisa lofthreinsiver innan grænna iðngarða á Bakka á Húsavík er lokið. Hallgrímur Óskarsson stjórnarformaður félagsins segir í samtali við Vikublaðið að síðari hluti í undirbúningsferlinu sé nú hafinn. „Við erum að undirbúa fyrstu verkliði í hönnun, athugunum og verkfræðivinnu. Siemens Energy vinnur með okkur að þeim verkliðum og einnig fjölmargir aðrir aðilar einnig, eins og Carbon Engineering,“ segir hann.
Risa framkvæmdir
Í október á síðasta ári ritaði Norðurþing undir viljayfirlýsingu með Carbon Iceland ehf. um að framkvæma áreiðanleikakönnun á að staðsetja verkefnið innan iðnaðarsvæðisins á Bakka. Á sama tíma kynnti félagið áform sín um að reisa lofthreinsiver á Bakka sem gæti skapað 300-500 störf.
Áætlanir félagsins gera ráð fyrir að uppbygging lofthreinsiversins muni kosta 140 milljarða króna og eru þá allar þrjár vinnslueiningarnar taldar með: lofthreinsiver, framleiðsla á grænu CO2 (koltvísýringur) og framleiðsla á hreinu, grænu eldsneyti.
Árlegar tekjur, þegar starfsemin nær fullum afköstum, geta numið allt að 50-70 milljörðum króna, að stærstum hluta gjaldeyristekjur.
Mf: Samstarf við tæknirisa
Carbon Iceland og Siemens Energy í Þýskalandi skrifuðu í ágúst sl. undir samkomulag um tæknilegt samstarf við föngun á CO2 og framleiðslu græns eldsneytis fyrir skip, flug og önnur samgöngutæki.
Við það tilefni tilkynnti fyrirtækið áætlanir um að fanga meira en milljón tonn af CO2 þegar starfsemin verður komin með fulla afkastagetu og að auki að framleiða loftlagsvænar vörur, bæði grænt eldsneyti og græna kolsýru til að auka matvælaframleiðslu í landinu.
Áhugi erlendra fjárfesta
Í september sl. greindi Fréttablaðið frá því að viðræður milli Carbon Iceland ehf. og erlendra fjárfesta hafi staðið yfir undanfarið. Haft er eftir Eyjólfi Lárussyni, framkvæmdastjóra félagsins að áhugi útlendinganna hafi kviknað eftir að Simens Energy í Þýskalandi fór í samstarf með Carbon Iceland.
„Erlendir aðilar eru komnir að borðinu með það í huga að fjárfesta í félaginu. Einnig eru viðræður í gangi um kaup á öllu því græna, umhverfisvæna eldsneyti sem framleitt verður hjá Carbon Iceland á Bakka við Húsavík,“ sagði Eyjólfur og bætti við að þörf fyrir umhverfisvænt eldsneyti væri vaxandi
Sem dæmi hafi eitt stærsta skipafélag heims nýlega gert samning um að kaupa skip fyrir 1,4 milljarða Bandaríkjadala. Skipin muni eingöngu nota umhverfisvænt eldsneyti, metanól, eins og framleitt verði hjá Carbon Iceland á Bakka.
Verkefnið gæti stækkað
Hallgrímur segir við Vikublaðið á dögunum að áætlanir Carbon Iceland um að lofthreinsiver verði komið í gagnið árið 2025 séu enn í gildi. Markmið félagsins séu þau sömu. „Í grunninn eru svipuð markmið í gangi. Ef eitthvað er þá hefur verkefnið stækkað með tilkomu nýrra möguleika að fanga CO2 og í meira magni en áður. Tæknin varðandi föngun á CO2 er hratt að þróast og má gera ráð fyrir jákvæðum breytingum í þessa átt á komandi misserum sem styrkja verkefnið enn frekar,“ segir hann.
Aðspurður segir Hallgrímur of snemmt að segja til um hvenær framkvæmdir hefjist. „Við erum enn að vinna samkvæmt upprunalegu tímaáætluninni sem gerir ráð fyrir framkvæmdum og starfsemi í kjölfarið á árunum 2024/2025. Þegar hönnun er komin betur af stað þá getum við lent í verkliðum sem geta haft áhrif á tímaáætlunina þannig að það er enn of snemmt að dagsetja fyrstu skóflustungu,“ segir Hallgrímur að lokum.
Nýjast
-
Dagur íslenskrar tungu í Nonnahúsi
Barnabókarithöfundurinn Jón Sveinsson, Nonni, fæddist 16. nóvember 1857. Af þessu tilefni er boðið til afmælis á æskuheimili hans, Nonnahúsi, á afmælisdaginn milli 12 og 14. -
Fyrirséð að álag á fráveituna verður mikið
Talsverður viðbúnaður er á Akureyri vegna veðurs sem nú gengur yfir svæðið. Líkur eru á að svipað ástand geti skapast og í september 2022 þegar sjór gekk á land á Eyrinni með umtalsverðum afleiðingum. Margt er líkt með veðrinu sem spáð er í kvöld og þeim aðstæðum sem þá sköpuðust. -
Úrslit í ritlistakeppni Ungskálda 2024
Dómnefnd mun kunngera úrslit í ritlistasamkeppni Ungskálda 2024 við hátíðlega athöfn í Amtsbókasafninu á Akureyri. Athöfnin fer fram á degi íslenskrar tungu, laugardaginn 16. nóvember kl. 14. Léttar veitingar verða í boði að athöfn lokinni og einnig verður tónlistarflutningur frá Elíasi Dýrfjörð sem leikur á kontrabassa. Öll velkomin á athöfnina. -
Þrír konungar frá Skarðaborg
Haustið er að baki og vetur konungur hefur tekið völdin amk. fyrst um sinn Sauðfé hefur haft það gott á beitinni, enda fyrri hluti nóvember óvenju hlýr. Hrútar fara á gjöf í vikunni á flestum bæjum og sumir bændur eru farnir að rýja féð inn. Þessir „konungar“ í Skarðaborg í Reykjahverfi eru vel ullaðir og þó næði kuldaél þá verður þeim ekki kalt í sinni kápu. Vonandi verður veturinn mildur, en bæði bændur og búalið þurfa á því að halda eftir kalt og rigningasamt sumar. -
Um 200 manns kynntu sér starfsemi Pharmarctia á Grenivík
Um 200 manns komu við á opnu húsi hjá fyrirtækinu Pharmarctia á Grenivík um liðna helgi. Þá var formlega tekið í notkun 1500 fermetra viðbótarhúsnæði sem gestum og gangandi bauðst að skoða jafnframt því að kynna sér starfsemi félagins. -
Bókarkynning - Ókei
Út er komin bókin ÓKEI — uppruni og saga þekktasta orðatiltækis í heimi. Höfundur er Sigurður Ægisson og Hólar gefa út. OK eða O.K., ýmist ritað með lág- eða hástöfum, er sagt vera þekktasta útflutningsafurð Bandaríkjanna, fyrr og síðar. Alla vega er þessi stafasamsetning fyrir löngu komin um gjörvalla Jörð og mun í ofanálag vera fyrsta orðið sem heyrðist mælt á Tunglinu. Það er ekki lítið afrek. Hvað með aðrar reikistjörnur verður, á eftir að koma í ljós. -
Mikið um að vera á matvælabraut VMA
Ekki eru mörg ár liðin frá því nemar í starfnámi við matvælabraut Verkmenntaskólans á Akureyri þurftu að halda suður í Menntaskólann í Kópavogi til að ljúka námi sínu. Aukin eftirspurn frá bæði nemendum og atvinnulífinu hefur leitt til þess að VMA jók námsframboð sitt og nemar geta nú lokið námi sínu í heimabyggð. Þjónustusvæðið er einkum Norður- og Austurland. -
16 ára aldurstakmark á samfélagsmiðlum
Er ekki kominn tími til þess að við tökum umræðu um það fyrir alvöru á Íslandi að hækka aldurstakmarkið á samfélagsmiðlum? Hér er um að ræða málefni sem snertir lýðheilsu barna og ungmenna beint og því nauðsynlegt að gefa þessu málefni rými í aðdraganda kosninga. -
Endurreisnartónleikar Hymnodiu og SCS í Akureyrarkirkju n.k. sunnudag Uppfært tónleiknum hefur verið frestað um óákv tíma
Hymnodia, norræna endurreisnarhljómsveitin Scandinavian Cornetts and Sackbuts og Ágúst Ingi Ágústsson, stjórnandi Cantores Islandiae, flytja gullfallega ítalska, spænska og enska endurreisnartónlist á tónleikum í Akureyrarkirkju sunnudaginn 17. nóvember kl. 17.
