30. október - 6. nóember - Tbl 44
Styrkja uppbyggingu á færni- og hermikennslu við HA
Við undirritun samningsins í dag. Mynd/Stjórnarráðið.
Áslaug Arna Sigurbjörnsdóttir, háskóla-, iðnaðar- og nýsköpunarráðherra, Willum Þór Þórsson, heilbrigðisráðherra, undirrituðu í dag samning um styrk til uppbyggingar færni- og hermikennslu í heilbrigðisvísindum við Háskólann á Akureyri, Háskóla Íslands og Háskólann í Reykjavík í samstarfi við Landspítalann og Sjúkrahúsið á Akureyri. Hermikennsla sem þessi felst í að herma með tæknibúnaði eða leiknum sjúklingum eftir raunverulegum aðstæðum, aðgerðum eða inngripum í öruggu umhverfi með leiðbeinanda. Þetta kemur fram í tilkynningu á vef stjórnarráðsins
Innviðauppbygging í heilbrigðis- og menntakerfinu
,,Við verðum að fjölga nemendum í heilbrigðisvísindum á Íslandi. Ein helsta hindrunin í okkar kerfi hefur verið klíníska námið, starfsnámið á sjúkrahúsunum, vegna þess að sjúkrahúsin hafa hvorki aðstöðu né mannskap til að taka á móti fleiri nemendum í heilbrigðisvísindum,” segir Áslaug Arna Sigurbjörnsdóttir, háskóla-, iðnaðar- og nýsköpunarráðherra. ,,Það er því frábært að þrír háskólar sameinist, í samvinnu við Landspítalann og Sjúkrahúsið á Akureyri, um að setja færni- og hermisetur á laggirnar sem er nútímaleg lausn notuð víða um heim til að fjölga nemendum í fjölbreyttum greinum heilbrigðisvísindanna.”
Willum Þór Þórsson, heilbrigðisráðherra, tekur í sama streng. ,,Uppbygging hermisetra og færnibúða er nauðsynlegur hluti innviðauppbyggingar í bæði heilbrigðis- og menntakerfinu. Í takt við forgangsaðgerðir ráðuneytanna um mönnun og menntun heilbrigðisstarfsfólks mun þetta gjörbylta aðstöðu til kennslu, náms og þjálfunar á öllum stigum. Þessi samningur er mikið gleðiefni og sýnir hversu mikilvæg samvinna er, milli ráðuneyta og stofnana, til að ná fram áþreifanlegum umbótum í heilbrigðiskerfinu.”
Bætt samkeppnishæfni náms í heilbrigðisvísindum
Markmið samningsins er að efla menntun í heilbrigðistengdum greinum, stuðla að fjölgun heilbrigðisstarfsfólks og auka samstarf íslenskra háskóla og kennslusjúkrahúsa. Þannig er hægt að bæta samkeppnishæfni þeirra í heilbrigðisvísindum auk þess að efla gæði náms, rannsókna og stoðþjónustu. Markmið samstarfsverkefnisins er í meginatriðum fimmþætt:
- Þróun og samþætting þekkingar á sviði færni- og hermikennslu þeirra háskóla og sjúkrahúsa sem sjá um kennslu í heilbrigðisvísindum.
- Stuðlað að árangursríkri miðlun þekkingar með nýstárlegum og skilvirkum kennsluaðferðum.
- Fjölgun hermileiðbeinenda innan háskólanna og samstarfsstofnana og efling símenntunar reyndra kennara í hermikennslu.
- Undirbúningur til stóreflingar aðstöðu og tækjabúnaðar til færni- og hermikennslu á Akureyri og í Reykjavík. Mikilvægt er að á báðum stöðum sé til staðar grunnbúnaður fyrir færni- og hermikennslu helstu heilbrigðisstétta, en þar að auki sérhæfðari búnaður í Reykjavík fyrir sértækari kennslu og þjálfun.
- Aukning þverfaglegrar samvinnu á sviði heilbrigðisvísinda og stuðningur við kennslu- og rannsóknasamstarf milli þeirra stofnana sem að verkefninu koma.
Verkefnið er eitt af samstarfsverkefnum háskóla sem styrkt er af háskóla-, iðnaðar- og nýsköpunarráðuneytinu og fellur undir forgangsaðgerðir í þágu heilbrigðismenntunar sem háskóla-, iðnaðar- og nýsköpunarráðherra og heilbrigðisráðherra lögðu sameiginlega fram til að mæta aukinni mannaflaþörf í heilbrigðiskerfinu og efla heilbrigðismenntun. Af þeim 25 verkefnum sem styrkt eru í Samstarfi háskóla hlýtur uppbygging færni- og hermisetra stærstu einstöku úthlutunina, alls 165 m.kr. Heilbrigðisráðuneytið veitir sömu upphæð til verkefnisins á samningstímanum og er heildarupphæð samningsins því 330 m.kr.
Nýjast
-
Uppskeruhátíð ferðaþjónustunnar á Norðurlandi
Þrjár viðurkenningar voru veittar á Uppskeruhátíð ferðaþjónustunnar á Norðurlandi sem að þessu sinni var haldin í Eyjafirði, í Eyjafjarðarsveit, Svalbarðsstrandarhreppi og Grýtubakkahreppi. Þær voru fyrirtæki ársins, hvatningarverðlaun ársins og fyrir störf í þágu ferðaþjónustu. Á uppskeruhátíðinni var farið í heimsóknir til ýmissa ferðaþjónustufyrirtækja á svæðinu, sem bjóða bæði afþreyingu, mat og gistingu ásamt ýmsu öðru. Hátíðin tókst afar vel og lauk með hátíðarkvöldverði á Laugaborg í Hrafnagilshverfi, kvöldskemmtun, dansi og mikilli gleði. -
Harðbakur málaður og yfirfarinn í Slippnum á Akureyri
Togarinn Harðbakur EA 3 heldur senn til veiða eftir ýmsar endurbætur og uppfærslur í Slippnum á Akureyri, auk þess sem skipið var heilmálað. Harðbakur er fimm ára gamalt skip, smíðað í Vard-Aukra skipasmíðastöðinni í Noregi. Skipið kom til Akureyrar 9. nóvember 2019 og strax í kjölfarið tók Slippurinn við því, þar sem settur var vinnslubúnaður um borð. Harðbakur er 29 metra langur og 12 metra breiður. Skipið er gott í alla staði, bæði hvað varðar vinnslubúnað og aðbúnað áhafnar. -
Tónlistarskóli Eyjafjarðar sá fyrsti sem fer í Græn skref
Tónlistarskóli Eyjarfjarðar hefur náð þeim einstaka áfanga að vera fyrsti tónlistarskólinn á Íslandi til að fara í Græn skref „og mega þau vera stolt af því,“ segir á vefsíðu Samtaka sveitarfélaga á Norðurlandi eystra, SSNE. -
Atkvæðagreiðsla utan kjörfundar hefst 7 nóvember
Atkvæðagreiðsla utan kjörfundar við embætti sýslumannsins á Norðurlandi eystra hefst 7. nóvember n.k. Alls hafa 31.039 atkvæðarétt í kjördæminu, flestir þeirra og það kemur ekki á óvart frá Akureyri eða 15.057 manns. -
Pólarhestar eru fyrirtæki ársins
Markaðsstofa Norðurlands veitir viðurkenninguna Fyrirtæki ársins til fyrirtækis sem er búið að slíta barnsskónum og hefur skapað sér sterka stöðu á markaði. Fyrirtækið hefur unnið að stöðugri uppbyggingu, vöruþróun og nýsköpun og er með höfuðstöðvar á Norðurlandi. -
Íslenska kerfið framleiðir afbrotamenn
Að refsa einstaklingi fyrir alvarleg afbrot með fangelsisvist, er eitthvað sem flestir geta verið sammála um að sé nauðsynlegt. Fæstir átta sig hins vegar á hve frelsissviptingin ein og sér hefur gríðarleg áhrif á einstakling sem dæmdur hefur verið til vistar í fangelsi og ef betrunarúrræðin eru ekki til staðar er næsta öruggt að sá einstaklingur er lýkur afplánun, kemur út í samfélagið aftur í verra ástandi en hann var í þegar afplánun hófst. Stundum held ég að þessi hópur samfélags okkar sé álitinn hin skítugu börn Evu sem flestir vita af en enginn vill af þeim vita. Eins og að vandamálin hverfi um leið og kveðinn er upp dómur. Allir þeir einstaklingar sem fá á sig dóma eru synir, dætur, bræður, systur og barnabörn einhverra. Að afplána dóm hefur ekki bara gríðarleg áhrif á fangann heldur líka hans nánustu aðstandendur sem ég tel vera algjörlega týndan hóp innan kerfisins. Kerfis sem fyrir löngu er molnað í sundur. Kerfi sem nær ekki að eiga samskipti. Kerfi sem þarf að taka alvarlega til í og snýst hreinlega um líf eða dauða fólksins okkar. -
KOSNINGARÉTTUR
Við vanmetum oft það sem þykir sjálfsagt! Árið 1843 rak kosningaréttur fyrst á fjörur okkar Íslendinga með tilskipun Kristjáns VIII, en eingöngu til karlmanna eldri en 25 ára sem áttu jörð. Það var um 2% íslensku þjóðarinnar. Árið 1857 var ekki lengur þörf á að eiga jörð, nægjanlegt að búa á eigin heimili og borga skatta. Konur virtust ekki vera landsmenn á þessum tíma. -
Afleitt að Sæfari verði í slipp í apríl
Grímseyingar óska eftir aðstoð við að fá aðra tímasetningu en nú er þegar fyrirhugað er að ferjan Sæfari sem siglir milli lands og eyjar fer í slipp, sem er „afleit tímasetning bæði hvað varðar sjávarútveg og sérstaklega slæmt fyrir ferðaþjónustu í eynni,.“ segir í bókun frá íbúafundi sem haldinn var í eyjunni. -
Framkvæmdir að hefjast við innisundlaugina
Framkvæmdir eru hafnar við talsvert umfangsmiklar breytingar á innisundlaugin í Sundlaug Akureyrar. Umhverfis- og mannvirkjaráð hefur samþykkt að taka lægstu tilboðum í lagnir, raflagnir og múrverk en hafnaði aftur á móti tilboðum sem bárust í útboði á verkefnum í húsasmíði og blikksmíði þar sem þau voru hátt yfir kostnaðaráætlun.
