4. sept - 11. sept - Tbl 36
Stærstur hluti starfsemi HSN flytur í Sunnuhlíð um næstu áramót
![Framkvæmdir standa yfir við Sunnuhlíð en gert er ráð fyrir að starfsemi HSN flytji þangað um næstu á…](/static/news/lg/sunnuhlid-hsn.jpg)
Stærstur hluti af starfsemi Heilbrigðisstofnunar Norðurlands flytur í Sunnuhlíð um næstu áramót, heimahjúkrun verður áfram í núverandi húsnæði við Skarðshlíð og sálfélagsleg þjónusta og geðheilsuteymi flytja í Hvannavelli 14. Unnið er að því að finna húsnæði fyrir þann hluta yfirstjórnar sem er á Akureyri.
Lengi hefur verið vitað að húsnæði heilsugæslunnar í Hafnarstræti 99 henti ekki undir þá starfsemi sem þar fer fram. Um þverbak keyrði í vetur með loftgæði í húsakynnum þar þegar skiptust á hlákur og mikið frost segir í tilkynningu á vef HSN. Verkfræðistofan EFLA var fengin til að taka húsnæðið út og mæla mögulega myglu. Skemmst er frá því að segja að mygla fannst í nokkrum rýmum.
Brugðið var á það ráða að leigja húsnæði á Hvannavöllum 14 þar sem N4 voru til húsa undir sálfélagslega þjónustu og geðheilsuteymi. Þannig er hægt að flytja starfsmenn úr þeim rýmum sem eru verst í húsnæði sem var nýtt undir sálfélagslegur þjónustuna. Það húsnæði hýsti áður Læknastofur Akureyrar.
Kostnaður við endurbætur of mikill
Markmiðið var að kljúfa starfsemina upp í tvær einingar þegar heilsugæslustöðin í Sunnuhlíð yrði tilbúin í desember 2023. Greining á kostnaði við að gera við Hafnarstræti 99 leiddi hins vegar í ljós að kostnaður við endurbætur yrði mjög mikill. „Ekkert vit er í því að leggja í slíkan kostnað þegar ætlunin er að flytja úr húsnæðinu í lok ársins 2025 þegar heilsugæslustöð við Þórunnarstræti verður tilbúin. Eðlilegt er að þegar það húsnæði er lagfært liggi fyrir framtíðar notkun á húsnæðinu,“ segir í tilkynningu.
Tekin hefur því verið sú ákvörðun um að fresta því að kljúfa upp starfsemina og flytja stærsta hlutann af klínískri starfsemi í Sunnuhlíð um áramót. Þannig verður öll læknisþjónusta, hjúkrunarmóttaka, mæðravernd, ungbarnavernd og önnur þjónusta í Sunnuhlíð. Heimahjúkrun verður áfram í húsnæði Hvítasunnukirkjunnar, sálfélagsleg þjónusta og geðheilsuteymi á Hvannavöllum 14, 3. hæð. Stefnt er á að sá hluti yfirstjórnar sem er á Akureyri flytji einnig þó enn sé óljóst hvert.
Athugasemdir