20. nóvember - 27. nóvember - Tbl 47
Séra Bolli kveður Laufás
Séra Bolli Pétur Bollason og séra Sunna Dóra Möller fyrir utan Laufáskirkju.
Séra Bolli Pétur Bollason sóknarprestur í Laufási hefur staðið fyrir föstugöngu á föstudeginum langa undanfarin átta ár og á því verður engin breyting í ár. Þetta verður hins vegar í síðasta sinn sem Bolli sér um gönguna þar sem hann mun senn hætta störfum. Bolli og séra Sunna Dóra Möller eiginkona hans flytjast senn búferlum suður á bóginn þar sem Sunna fékk nýverið stöðu sóknarprests í Kópavogi.
Bolli segir blendnar tilfinningar fylgja því að yfirgefa Laufás en hann er uppalinn á staðnum og hefur verið sóknarprestur í Laufásprestkalli í níu ár.
„Auðvitað er viss söknuður sem fylgir því að fara héðan og ég mun sakna bæði manna og málleysingja. Ég er líka æginlegur vorkarl þar sem ég er með bæði kindur og æðavarp. Það er afskaplega mikið líf hérna í Laufási á vorin og ég kem til með að sakna þessa árstíma mest,“ segir Bolli. „En ég finn líka fyrir þakklæti og horfi meira til þess. Þetta verður sennilega áratugur sem ég hef starfað hér þegar uppi er staðið því ég mun fara í námsleyfi í september í haust og verð í því í eitt ár. Síðan var staðan hér auglýst,“ segir Bolli, sem ætlar að læra bókmenntir í háskólanum.
„Ég ætla finna í mér gamla námstakta,“ segir hann og hlær. Bolli hefur lengst af búið í Laufási eða í samtals 25 ár. Hann þekkir þó ágætlega til í borginni enda starfaði hann sem prestur í Breiðholti um tíma. „Þetta verða spennandi breytingar. Börnin okkar eru senn að fljúga úr hreiðrinu og þá breytast hlutirnir. Þau fara í aðrar áttir. Einnig er Sunna Dóra úr borginni og við eigum fullt af ættingjum og vinum þar. Þannig að ég er fullu tilhlökkunar líka,“ segir Bolli.
Ómissandi um páskana
En aftur að föstugöngunni sem er framundan er í dag, föstudaginn langa. Gengið verður frá þremur stöðum í prestakallinu í Laufás. Lagt verður af stað kl. 11.00 frá Svalbarðskirkju í Laufás, kl. 11.00 frá Végeirsstöðum í Fnjóskadal í Laufás og kl. 12.00 frá Grenivíkurkirkju í Laufás. Bolli segir þetta skemmtilegan sið og dæmi séu um að fólk komi ár eftir ár.
„Þetta er partur af prógramminu um páskana hjá mér og mörgum öðrum. Það hefur alltaf viðrað ágætlega fyrir göngu á þessum degi og ég held að það verði engin breyting á í ár. Viss kjarni hefur sett þetta inn á dagatalið hjá sér og missir ekki úr göngu. Svo bætist alltaf í hópinn,“ segir Bolli. Hann segir að fólk sé vitanlega frjálst að koma inn í göngurnar hvar sem er. Hver ganga hefst á orði og bæn. Mikilvægt er að hafa með sér nóg af vatni og góða skó fyrir gönguna.
Í þjónustuhúsinu í Laufási verður hægt að kaupa sér súpu og aðrar veitingar við komu og verður veitingasala í umsjá veitingastaðarins Kontórsins á Grenivík. Tónleikar verða í Laufáskirkju kl. 14.30. Þeir Gunnar Björn Jónsson og Þorkell Pálsson syngja við undirleik Petru Bjarkar Pálsdóttur og er aðgangur ókeypis.
Nýjast
-
Listasafnið á Akureyri: Opnun, fimmtudagskvöldið 28. nóvember
Fimmtudagskvöldið 28. nóvember kl. 20-22 verða opnaðar tvær sýningar í Listasafninu á Akureyri: Sólveig Baldursdóttir – Augnablik-til baka og Átthagamálverkið: Á ferð um Norðausturland liðinnar aldar. Boðið verður upp á sýningarstjóraspjall með Markúsi Þór Andréssyni, sýningarstjóra Átthagamálverksins, kl. 20.40 og listamannaspjall með Sólveigu kl. 21. -
Íslandsþari með ný áform um þaravinnslu á Húsavík
Íslandsþari óskar eftir að fá úthlutað lóðinni að Búðarfjöru 1 á Húsavík til uppbyggingar húsnæðis til úrvinnslu stórþara. -
Betra veður fyrir íþróttakrakkana okkar!
Á ferð minni um okkar víðfema og fallega kjördæmi hef ég lent í allskyns vandræðum í öllum veðrum nú í nóvember. Ég er sannarlega ekki einn um það enda vegir landsins uppfullir af spennandi frambjóðendum í leit að sem flestum samtölum við fólkið í landinu. Frambjóðendur keppast nú við að birta myndir og myndbönd af skafrenningi, snjókomu, blindbyljum og fleira til. Allt til þess gert að sýna fólki hversu vandasamt það getur verið að ferðast um landið í nóvember. Sem betur fer er bara kosið á fjögurra ára fresti og oftast á vorin. Þess vegna er þetta nú frekar undantekning en hitt að frambjóðendur þurfi að vaða út í þetta veður og þessa færð í atkvæðaleit. -
Nærsamfélagið tekur höndum saman
Jólatónleikar til styrktar Sigrúnu Björgu Aðalgeirsdóttur og fjölskyldu -
Jólamatur fátæka mannsins
Einn af mínum allra uppáhalds fuglum er rjúpan. Rjúpan nam hér land við lok ísaldar fyrir um 10.000 árum og kom upprunalega frá Grænlandi. Hún á sér lengri forsögu hér en við. Mér finnst hún ekki bara falleg, hún er brögðótt, á 3 alklæðnaði og þegar hún ver unga sína, þá sýnir hún vanmetna vitsmuni. -
Hver grípur þig?
„Við vildum að fólk gerði sér grein fyrir hvaða þjónusta er í boði og hvert er hægt að sækja hana þegar aðstoðar er þörf, fólki að kostnaðarlausu. Einnig langar okkur með málþinginu að styrkja samstarfið á milli félaganna, að fulltrúar þeirra séu upplýst um aðra kosti sem eru í boði fyrir fólk og geti bent málum í réttan farveg eða til viðeigandi félagasamtaka,“ segir Erla Lind Friðriksdóttir um málþing sem hún stendur fyrir ásamt frænku sinni Birnu Guðrúnu Árnadóttur. -
Sérútbúinn lögreglubíll til landamæraeftirlits
Embætti Lögreglunnar á Norðurlandi eystra hefur fengið til eignar sérútbúinn lögreglubíl til afnota við landamæraeftirlit. Segja má að þar sé á ferðinni fullbúin landamærastöð á hjólum. Landamæra- og áritunarsjóður Evrópusambandsins greiddi 75% kostnaðar og Dómsmálaráðuneytið 25% og skiptu einnig með sér kostnaði við einn starfsmann í þrjá mánuði síðastliðið sumar. -
Klúbbar styrkja Frú Ragnheiði
Klúbbarnir Ladies Circle 7 og Round Table 15 afhentu Frú Ragnheiði rausnarlegar styrk í vikunni, ómetnalegur styrkur . „Við erum svo innilega þakklát og mun þetta nýtast skjólstæðingum okkar vel segir í tilkynningu, en styrkurinn er að upphæð um 630 þúsund krónur. -
Gjaldfrjáls leikskóli dregur úr álagi og bætir líðan barna
Gjaldfrjáls leikskóli hefur reynst áhrifarík leið til að draga úr álagi í leikskólum, á skólastjórnendur og starfsfólk og hefur jákvæð áhrif á börnin.
