13.nóvember - 20.nóvember - Tbl 46
Rekstur Sjúkrahússins á Akureyri gekk vel í fyrra
Mynd úr safni.
Árið 2019 var í heildina farsælt í starfsemi Sjúkrahússins á Akureyri (SAk). Nokkuð hægðist á þeim samfellda vexti sem verið hefur í starfseminni um langt árabil en þó var áframhaldandi vöxtur í dag- og göngudeildarþjónustu. Þróun á þeirri starfsemi sem fyrir var hélt áfram og inn komu nýir þjónustuþættir. Þar má nefna göngudeild endurhæfingar snemma árs og starfsemi Heimahlynningar í lok ársins. Reksturinn gekk almennt vel en fór lítillega fram úr fjárheimildum. Þetta er meðal þess sem kom fram á ársfundi sjúkrahússins, sem haldinn var í gær.
Svipað umfang starfseminnar
Starfsemin var í heildina svipuð að umfangi og fyrra ár. Komum í dag- og göngudeildarþjónustu fjölgaði um 3,5% milli ára en farin voru 40 færri sjúkraflug en árið eða 766. Almennum rannsóknum fækkaði um 3,7%, myndgreiningar voru svipaðar að fjölda en skurðaðgerðum fjölgaði um 3,3%. Í biðlistaátaki heilbrigðisráðuneytisins voru gerðar 257 gerviliðaaðgerðir eða 24 fleiri en árið áður. Fjöldi legudaga var svipaður og árið áður. Árið 2019 fæddust 434 börn í 403 fæðingum, 15 fleiri en árið áður.
Um 1,5% halli á rekstri
Heildarútgjöld vegna reksturs hækkuðu um 5% á milli ára og voru 9.020 milljónir króna. Reksturinn fór fram úr fjárheimildum um 122 milljónir króna, eða um 1,5%. Meginástæðan var hærri launakostnaður en gert var ráð fyrir í áætlunum, meðal annars vegna aukinna orlofsskuldbindinga og afleysinga í veikindum. Sjúkrahúsinu bárust framlög og tækjagjafir frá Hollvinasamtökunum og öðrum velunnurum fyrir um 42 milljónir króna
Merkir áfangar
Á vordögum 2019 fékk sjúkrahúsið vottun á allri starfsemi sinni samkvæmt ISO 9001 staðlinum, fyrst íslenskra heilbrigðisstofnana. Jafnframt var alþjóðleg vottun á gæðakerfi SAk, sem tekur til faglegra þátta starfseminnar, endurnýjuð. Merkir áfangar náðust einnig í þróun á rafrænum kerfum, svo sem lyfjaumsýslu, vaktakerfum á deildum og fræðslukerfi. Þá fékk upplýsingatæknideild ISO 27001-vottun og jafnlaunavottun fyrir sjúkrahúsið var staðfest snemma árs 2020. „Starfsfólk Sjúkrahússins á Akureyri skilaði mjög góðu starfi á öllum sviðum starfseminnar á liðnu ári og það hefur styrkt sjúkrahúsið enn frekar í sessi sem heilbrigðisstofnun í fremstu röð,“ sagði Bjarni Jónasson, forstjóri sjúkrahússins.
Hann sagði jafnframt mjög ánægjulegt að finna það mikla traust sem ríkir í garð sjúkrahússins hjá íbúum á þjónustusvæði þess. Þar vísar hann til könnunar sem Gallup gerði í lok árs 2019 meðal íbúa á Norður- og Austurlandi. Í könnuninni sögðust 85% aðspurðra bera mikið traust til sjúkrahússins og 88% þeirra sem höfðu nýtt sér þjónustuna sl. 12 mánuði voru ánægð með hana. „Sama velvild endurspeglast í Hollvinasamtökum sjúkrahússins og framlögum úr ýmsum áttum í Gjafasjóð SAk. Þessi stuðningur úti í samfélaginu er ómetanlegur okkur öllum sem hér störfum,“ segir Bjarni.
Nýjast
-
Hið fullkomna stjórnarfar
Mannkynið hefur gert tilraunir með margskonar stjórnarfar. Þetta lærdómsferli hefur því miður kostnað blóð og mannfórnir en það hefur fært okkur vitneskjuna um að lýðræði er besta stjórnarfarið sem mannkynið hefur þekkt. Ekkert stjórnskipulag hefur fært mannkyni jafn miklar framfarir, öryggi, réttlæti og almenna hagsæld en lýðræðið. -
Hættum að slá ryki í augun á fólki !
Greinin er skrifuð í nafni Stangaveiðifélags Akureyrar, Stangaveiðifélagsins Flúða, Veiðifélags Fnjóskár, Veiðifélags Eyjafjarðarár, Veiðifélags Hörgár, Fiskirannsókna ehf, félagsskapar sem kallast Bleikjan - Styðjum stofninn, SUNN - Samtaka um náttúruvernd á Norðurlandi, Landssambands veiðifélaga, NASF – Verndarsjóðs villtra laxastofna og Íslenska náttúruverndarsjóðsins – IWF. -
Eldri borgarar hafa áhyggjur af öryggismálum í Sölku
Fulltrúar í Félagi Eldri borgara á Akureyri hafa lýst yfir áhyggjum sínum af öryggismálum í kjallara félagsmiðstöðvarinnar Sölku í Víðilundi á Akureyri. Þeir hvetja til þess að vinnueftirlit, heilbrigðiseftirlit og eldvarnareftirlit verði fengið til að gera heildarúttekt á húsnæðinu vegna þeirrar starfsemi sem þar fer fram á vegum Akureyrarbæjar. -
Gestir í Lystigarði um 159 þúsund á 10 mánuðum
Alls heimsóttu rúmlega 159 þúsund gestir í Lystigarðinni á Akureyri á 10 mánaða tímabili, frá byrjun janúar til loka október samkvæmt teljurum sem þar eru. Þetta kemur fram í minnisblaði sem fjallað var um á fundi umhverfis- og mannvirkjaráðs. -
Sólveig Lára er Ungskáld Akureyrar 2024
Það var vel við hæfi að í dag, á degi íslenskrar tungu, voru úrslit í ritlistakeppni Ungskálda 2024 kunngjörð á Amtsbókasafninu. Fyrstu veðlaun hlaut Sólveig Lára Skarphéðinsdóttir fyrir verkið Stök. -
Á að vera landbúnaður á Íslandi?
Þetta er grundvallarspurning sem allir íslendingar þurfa að gera upp við sig ásamt þeirri spurningu hvort byggð eigi yfir höfuð að haldast annars staðar en á sv-horninu. Með ríkjandi borgríkisstefnu síðustu ára í boði Sjálfstæðisflokks, Framsóknarflokks og Vinstri grænna hefur það skilað 85% þjóðarinnar á eitt horn landsins. -
50 ára afmælisfagnaður Geðverndarfélags Akureyrar
Geðverndarfélag Akureyrar hélt upp á 50 ára afmæli sitt nýverið, en félagið var stofnað þann 15. desember 1974. Um 50 manns mættu í fagnaðinn, hlýddu á fróðleg erindi, nutu lifandi tónlistar og glæsilegra veitinga. -
Tónkvíslin, söngkeppni Framhaldsskólans á Laugum fer fram í kvöld
Tónkvíslin, söngkeppni Framhaldsskólans á Laugum er meðal stærstu menningarviðburða á Norðausturlandi. Tónkvíslin verður haldin í 18. skipti í kvöld 16. nóvember. Sigurvegari keppninnar keppir fyrir hönd skólans í söngkeppni framhaldsskólanna, þar sem margar stjörnur hafa einmitt stigið sín fyrstu skref. Þar má meðal annars nefna Birgittu Haukdal sem flestum landsmönnum er vel kunn. -
Bakþankar bæjarfulltrúa Því ekki að gera tilraun?
Það snjóaði um daginn. Götur urðu flughálar. Og ég dreif mig með bíl konu minnar í dekkjaskipti. Þú kemst að eftir tíu daga, var svarið sem ég fékk.
