Námið muni nýtast sem hagnýtur grunnur inn í framtíðina
Framhaldsskólinn á Húsavík (FSH) fór af stað með nám í rafíþróttum í fyrsta sinn nú í haust en áhugi á íþróttagreininni hefur farið vaxandi undanfarin ár.
Halldór Jón Gíslason, aðstoðarskólastjóri segir í samtali við Vikublaðið að við undirbúning námsins hafi skólinn verið í samvinnu við Rafíþróttasamtök Íslands. „Við höfum komið á fót fyrsta flokks aðstöðu til kennslu í rafíþróttum í húsnæði skólans og munum halda áfram að bæta hana á næstu árum,“ segir hann.
Nemendur hafa tekið nýju námsleiðinni fagnandi og eru kennslustundir oft mjög líflegar.
Ekki bara tölvuleikjaspilun
Námið samanstendur ekki einungis af hefðbundnum rafíþróttum og tölvuleikjaspilun heldur læra nemendur um markmiðasetningu, viðburðastjórnun, þjálfun, sögu, sálfræði, fjölmiðlafræði, ensku, íslensku og líffræði ásamt öðru sem tengist heimi tölvuleikjanna og einstaklingnum sjálfum.
„Það sem við höfum verið að leggja áherslu á hjá okkur er í rauninni notandinn sem slíkur, íþróttaiðkandinn. Fókusinn hefur verið á að byggja upp iðkandann á sama hátt og við byggjum hann upp í öðrum íþróttagreinum,“ útskýrir Halldór og bætir við að rafíþróttir séu í mikilli sókn þrátt fyrir að vera frekar ný grein hér á landi.
„Við höfum verið í samskiptum við Rafíþróttasamtök Íslands og verið með tengilið þar inni sem hefur verið okkur innan handa. Við höfum borið undir hann hugmyndir og annað slíkt. Svo er þetta að verða sífellt algengara og fleiri skólar verið að taka þetta upp líka,“ segir Halldór.
Tengist öðrum námsgreinum
Halldór segir að námslína FSH sé þannig að nemendur taka 50-60 einingar í kjarna innan ákveðinnar stúdentsbrautar; í rafíþróttum og tengdum fögum eins og getið er hér að ofan. „Þetta tengist allt saman og það er pælingin hjá okkur.“
Þetta er í fyrsta sinn sem skólinn býður upp á slíka námsleið og hefur hún farið vel af stað. „Fyrsti áfanginn okkar í rafíþróttum var keyrður af stað núna í haust í nýjum hópi nemenda og svo verður annar áfangi á næstu önn. Hann verður með fókus á miðlun og streymi. Hljóðupptöku, streymisupptökur en einnig viðburðastjórnun þar sem nemendur fá innsýn inn í það hvernig mót og annað slíkt sem tengjast rafíþróttum eru sett upp. Nemendur þurfa að læra hvernig á að búa til plön varðandi svoleiðis viðburði og hleypa þeim af stokkunum,“ segir Halldór og bætir við að mikið sé um mótahöld innan framhaldsskólanna. „Þetta eykur tækifæri okkar á að vera með og gera okkur gildandi. Það er bara spennandi.“
Framtíð greinarinnar björt
Þá segist Halldór vonast til þess að í framtíðinni verði til sérstök rafíþróttadeild, mögulega innan Völsungs eins og hefur raunar verið í umræðunni. „Framhaldsskólinn á Húsavík er aðili að Rafíþróttasamtökum Íslands og er þar inni sem deild til að byrja með svo er vonandi hægt að útfæra það nánar síðar. Við þurfum bara að koma þessu á aðeins stærra svið hér innan samfélagsins. Þetta er mjög spennandi og mjög skemmtilegt enda snerta tölvuleikir okkur flest á einhvern hátt,“ segir Halldór að lokum.
Nýjast
-
Dagur íslenskrar tungu í Nonnahúsi
Barnabókarithöfundurinn Jón Sveinsson, Nonni, fæddist 16. nóvember 1857. Af þessu tilefni er boðið til afmælis á æskuheimili hans, Nonnahúsi, á afmælisdaginn milli 12 og 14. -
Fyrirséð að álag á fráveituna verður mikið
Talsverður viðbúnaður er á Akureyri vegna veðurs sem nú gengur yfir svæðið. Líkur eru á að svipað ástand geti skapast og í september 2022 þegar sjór gekk á land á Eyrinni með umtalsverðum afleiðingum. Margt er líkt með veðrinu sem spáð er í kvöld og þeim aðstæðum sem þá sköpuðust. -
Úrslit í ritlistakeppni Ungskálda 2024
Dómnefnd mun kunngera úrslit í ritlistasamkeppni Ungskálda 2024 við hátíðlega athöfn í Amtsbókasafninu á Akureyri. Athöfnin fer fram á degi íslenskrar tungu, laugardaginn 16. nóvember kl. 14. Léttar veitingar verða í boði að athöfn lokinni og einnig verður tónlistarflutningur frá Elíasi Dýrfjörð sem leikur á kontrabassa. Öll velkomin á athöfnina. -
Þrír konungar frá Skarðaborg
Haustið er að baki og vetur konungur hefur tekið völdin amk. fyrst um sinn Sauðfé hefur haft það gott á beitinni, enda fyrri hluti nóvember óvenju hlýr. Hrútar fara á gjöf í vikunni á flestum bæjum og sumir bændur eru farnir að rýja féð inn. Þessir „konungar“ í Skarðaborg í Reykjahverfi eru vel ullaðir og þó næði kuldaél þá verður þeim ekki kalt í sinni kápu. Vonandi verður veturinn mildur, en bæði bændur og búalið þurfa á því að halda eftir kalt og rigningasamt sumar. -
Um 200 manns kynntu sér starfsemi Pharmarctia á Grenivík
Um 200 manns komu við á opnu húsi hjá fyrirtækinu Pharmarctia á Grenivík um liðna helgi. Þá var formlega tekið í notkun 1500 fermetra viðbótarhúsnæði sem gestum og gangandi bauðst að skoða jafnframt því að kynna sér starfsemi félagins. -
Bókarkynning - Ókei
Út er komin bókin ÓKEI — uppruni og saga þekktasta orðatiltækis í heimi. Höfundur er Sigurður Ægisson og Hólar gefa út. OK eða O.K., ýmist ritað með lág- eða hástöfum, er sagt vera þekktasta útflutningsafurð Bandaríkjanna, fyrr og síðar. Alla vega er þessi stafasamsetning fyrir löngu komin um gjörvalla Jörð og mun í ofanálag vera fyrsta orðið sem heyrðist mælt á Tunglinu. Það er ekki lítið afrek. Hvað með aðrar reikistjörnur verður, á eftir að koma í ljós. -
Mikið um að vera á matvælabraut VMA
Ekki eru mörg ár liðin frá því nemar í starfnámi við matvælabraut Verkmenntaskólans á Akureyri þurftu að halda suður í Menntaskólann í Kópavogi til að ljúka námi sínu. Aukin eftirspurn frá bæði nemendum og atvinnulífinu hefur leitt til þess að VMA jók námsframboð sitt og nemar geta nú lokið námi sínu í heimabyggð. Þjónustusvæðið er einkum Norður- og Austurland. -
16 ára aldurstakmark á samfélagsmiðlum
Er ekki kominn tími til þess að við tökum umræðu um það fyrir alvöru á Íslandi að hækka aldurstakmarkið á samfélagsmiðlum? Hér er um að ræða málefni sem snertir lýðheilsu barna og ungmenna beint og því nauðsynlegt að gefa þessu málefni rými í aðdraganda kosninga. -
Endurreisnartónleikar Hymnodiu og SCS í Akureyrarkirkju n.k. sunnudag Uppfært tónleiknum hefur verið frestað um óákv tíma
Hymnodia, norræna endurreisnarhljómsveitin Scandinavian Cornetts and Sackbuts og Ágúst Ingi Ágústsson, stjórnandi Cantores Islandiae, flytja gullfallega ítalska, spænska og enska endurreisnartónlist á tónleikum í Akureyrarkirkju sunnudaginn 17. nóvember kl. 17.
