Hús vikunnar: Þingvallastræti 2
Þegar ekið er upp Gilið og haldið áfram upp Kaupvangsstræti er tekin brött og kröpp beygja upp á brúnina og við tekur Þingvallastræti. Blasir þar við á hægri hönd skrautlegt og glæsilegt hús, Þingvallastræti 2. Húsið, sem stendur á horni Þingvallastrætis og Oddeyrargötu, reisti Jakob Frímannsson athafnamaður, síðar kaupfélagsstjóri og heiðursborgari Akureyrar.
Snemma sumars 1929 fékk Jakob hornlóð Þingvallastrætis og Oddeyrargötu að vestan og leyfi til að reisa þar hús. Teikningarnar að húsinu gerði Tryggvi Jónatansson en Jakob mun hafa haft þar hönd í bagga. Þingvallastræti 2 er einlyft steinsteypuhús á háum kjallara og með mansardþaki („brotnu risi“) og með stórum kvisti á vesturgafli. Á vesturgafli er forstofubygging og ofan á henni svalir. Bárujárn er á þaki hússins og veggir múrsléttaðir en grófur múr á kjallara. Á norðaustanverðri lóð er bílskúr sem nú hefur verið innréttaður sem skrifstofurými og snýr hann að Oddeyrargötu. Voldugir steyptir þakkantar með bogadregnum sveigjum og víðir gluggar með margskiptum póstum setja skemmtilegan svip á húsið.
Húsið var lengst af einbýli og munu þau Jakob og eiginkona hans, Borghildur Jónsdóttir hafa búið þarna í um hálfa öld. Húsið er nokkuð sérstætt að gerð, stórskorið og skrautlegt og hefur alla tíð hlotið gott viðhald. Á lóðinni var áður mikill skrúðgarður þeirra Borghildar og Jakobs og enn þann dag í dag er lóðin snyrtileg og vel hirt og m.a. prýdd gróskumiklum trjám. Girðingin umhverfis hana er einnig afar tilkomumikil, járnavirki milli steyptra stöpla og er hún nýlega endurnýjuð líklega í samræmi við upprunalega gerð. Nú er starfrækt í húsinu fasteignasalan Framtíðareign og snjalltækjaverkstæði og auk þess er íbúð í húsinu. Myndin er tekin þann 21. ágúst 2011.
Nýjast
-
Listasafnið á Akureyri: Opnun, fimmtudagskvöldið 28. nóvember
Fimmtudagskvöldið 28. nóvember kl. 20-22 verða opnaðar tvær sýningar í Listasafninu á Akureyri: Sólveig Baldursdóttir – Augnablik-til baka og Átthagamálverkið: Á ferð um Norðausturland liðinnar aldar. Boðið verður upp á sýningarstjóraspjall með Markúsi Þór Andréssyni, sýningarstjóra Átthagamálverksins, kl. 20.40 og listamannaspjall með Sólveigu kl. 21. -
Íslandsþari með ný áform um þaravinnslu á Húsavík
Íslandsþari óskar eftir að fá úthlutað lóðinni að Búðarfjöru 1 á Húsavík til uppbyggingar húsnæðis til úrvinnslu stórþara. -
Betra veður fyrir íþróttakrakkana okkar!
Á ferð minni um okkar víðfema og fallega kjördæmi hef ég lent í allskyns vandræðum í öllum veðrum nú í nóvember. Ég er sannarlega ekki einn um það enda vegir landsins uppfullir af spennandi frambjóðendum í leit að sem flestum samtölum við fólkið í landinu. Frambjóðendur keppast nú við að birta myndir og myndbönd af skafrenningi, snjókomu, blindbyljum og fleira til. Allt til þess gert að sýna fólki hversu vandasamt það getur verið að ferðast um landið í nóvember. Sem betur fer er bara kosið á fjögurra ára fresti og oftast á vorin. Þess vegna er þetta nú frekar undantekning en hitt að frambjóðendur þurfi að vaða út í þetta veður og þessa færð í atkvæðaleit. -
Nærsamfélagið tekur höndum saman
Jólatónleikar til styrktar Sigrúnu Björgu Aðalgeirsdóttur og fjölskyldu -
Jólamatur fátæka mannsins
Einn af mínum allra uppáhalds fuglum er rjúpan. Rjúpan nam hér land við lok ísaldar fyrir um 10.000 árum og kom upprunalega frá Grænlandi. Hún á sér lengri forsögu hér en við. Mér finnst hún ekki bara falleg, hún er brögðótt, á 3 alklæðnaði og þegar hún ver unga sína, þá sýnir hún vanmetna vitsmuni. -
Hver grípur þig?
„Við vildum að fólk gerði sér grein fyrir hvaða þjónusta er í boði og hvert er hægt að sækja hana þegar aðstoðar er þörf, fólki að kostnaðarlausu. Einnig langar okkur með málþinginu að styrkja samstarfið á milli félaganna, að fulltrúar þeirra séu upplýst um aðra kosti sem eru í boði fyrir fólk og geti bent málum í réttan farveg eða til viðeigandi félagasamtaka,“ segir Erla Lind Friðriksdóttir um málþing sem hún stendur fyrir ásamt frænku sinni Birnu Guðrúnu Árnadóttur. -
Sérútbúinn lögreglubíll til landamæraeftirlits
Embætti Lögreglunnar á Norðurlandi eystra hefur fengið til eignar sérútbúinn lögreglubíl til afnota við landamæraeftirlit. Segja má að þar sé á ferðinni fullbúin landamærastöð á hjólum. Landamæra- og áritunarsjóður Evrópusambandsins greiddi 75% kostnaðar og Dómsmálaráðuneytið 25% og skiptu einnig með sér kostnaði við einn starfsmann í þrjá mánuði síðastliðið sumar. -
Klúbbar styrkja Frú Ragnheiði
Klúbbarnir Ladies Circle 7 og Round Table 15 afhentu Frú Ragnheiði rausnarlegar styrk í vikunni, ómetnalegur styrkur . „Við erum svo innilega þakklát og mun þetta nýtast skjólstæðingum okkar vel segir í tilkynningu, en styrkurinn er að upphæð um 630 þúsund krónur. -
Gjaldfrjáls leikskóli dregur úr álagi og bætir líðan barna
Gjaldfrjáls leikskóli hefur reynst áhrifarík leið til að draga úr álagi í leikskólum, á skólastjórnendur og starfsfólk og hefur jákvæð áhrif á börnin.
