13.nóvember - 20.nóvember - Tbl 46
Hefur áhyggjur af gönguleiðum niður að hafnarsvæði
Víðir Svansson við sneiðinginn umdeilda. Hann hefur áhyggjur af slysahættu við gönguleiðina. Mynd/epe
Víðir Svansson starfar hjá GPG fiskverkun sem er staðsett á hafnarsvæðinu á Húsavík og ferðast oftar en ekki á tveimur jafnfljótum á leið sinni í og úr vinnu. Hann setti sig í samband við blaðamann og viðraði áhyggjur sínar varðandi gönguleiðir niður á hafnarsvæði, sérstaklega fyrir íbúa suðurbæjar sem sækja vinnu á hafnarsvæðið.
„Ég hef mikið spáð í leið niður fyrir bakkann og þá sérstaklega við brúnna við Lionshúsið. Þar var stigi áður fyrr sem var fjarlægður þegar jarðvinnuframkvæmdir hófust í Búðarárgilinu austan við brú,“ segir Víðir og bætir við að í dag sé þarna snarbrattur sneiðingur sem fólk er að ganga niður með tilheyrandi slysahættu. „Hann er nógu illfær á sumrin en stórhættulegur í slæmri vetrarfærð. Eftir að göngustígurinn á Stangarbakka var tekinn í notkun hefur umferð niður þennan sneiðing stóraukist og ég bíð bara eftir að þarna verði slys á fólki,“ segir Víðir áhyggjufullur.
Þá segir Víðir að leiðin niður Búðarárgilið sé stórhættuleg hvort sem farið er eftir veginum eða sneiðingana niður frá brúnni. „Fólk fer ýmist niður ofan við brú, neðan við brú eða jafnvel norðan við brú við frystiklefann hjá Norðlenska. Sjálfur fer ég veginn ef mikill snjór er þarna en þar er reyndar oft þungfært og/eða stórhættulegt að fara,“ segir hann og bætir við að það hafi ekkert endilega verið betra að fara norðar og ganga niður stigann frá Húsavíkurkirkju því þær verði oft þungfærar að vetri. Nú er líka búið að loka þeim stiga vegna slysahættu enda kominn á viðhald.
Benóný Valur Jakobsson, formaður skipulags og framkvæmdaráðs Norðurþings segir að búið sé að óska eftir tilboðum í nýjan stiga niður á Hafnarstétt frá Húsavíkurkirkju. Málið sé í ferli.
Varðandi gönguleiðina við Búðarárgil segir Benóný að gert sé ráð fyrir því að nýr stigi komi, nokkurn vegin þar sem sneiðingurinn er sem Víðir vísar til. Ekki hafi fundist fé í framkvæmdina við gerð síðustu fjárhagsáætlunar en það yrði skoðað hvort framkvæmdin rúmist innan fjárhagáætlunar næsta árs.
Hér að neðan má sjá myndir sem lýsa ágætlega ástandinu sem Víðir lýsir en hann tók myndirnar sjálfur.
Nýjast
-
Dagur íslenskrar tungu í Nonnahúsi
Barnabókarithöfundurinn Jón Sveinsson, Nonni, fæddist 16. nóvember 1857. Af þessu tilefni er boðið til afmælis á æskuheimili hans, Nonnahúsi, á afmælisdaginn milli 12 og 14. -
Fyrirséð að álag á fráveituna verður mikið
Talsverður viðbúnaður er á Akureyri vegna veðurs sem nú gengur yfir svæðið. Líkur eru á að svipað ástand geti skapast og í september 2022 þegar sjór gekk á land á Eyrinni með umtalsverðum afleiðingum. Margt er líkt með veðrinu sem spáð er í kvöld og þeim aðstæðum sem þá sköpuðust. -
Úrslit í ritlistakeppni Ungskálda 2024
Dómnefnd mun kunngera úrslit í ritlistasamkeppni Ungskálda 2024 við hátíðlega athöfn í Amtsbókasafninu á Akureyri. Athöfnin fer fram á degi íslenskrar tungu, laugardaginn 16. nóvember kl. 14. Léttar veitingar verða í boði að athöfn lokinni og einnig verður tónlistarflutningur frá Elíasi Dýrfjörð sem leikur á kontrabassa. Öll velkomin á athöfnina. -
Þrír konungar frá Skarðaborg
Haustið er að baki og vetur konungur hefur tekið völdin amk. fyrst um sinn Sauðfé hefur haft það gott á beitinni, enda fyrri hluti nóvember óvenju hlýr. Hrútar fara á gjöf í vikunni á flestum bæjum og sumir bændur eru farnir að rýja féð inn. Þessir „konungar“ í Skarðaborg í Reykjahverfi eru vel ullaðir og þó næði kuldaél þá verður þeim ekki kalt í sinni kápu. Vonandi verður veturinn mildur, en bæði bændur og búalið þurfa á því að halda eftir kalt og rigningasamt sumar. -
Um 200 manns kynntu sér starfsemi Pharmarctia á Grenivík
Um 200 manns komu við á opnu húsi hjá fyrirtækinu Pharmarctia á Grenivík um liðna helgi. Þá var formlega tekið í notkun 1500 fermetra viðbótarhúsnæði sem gestum og gangandi bauðst að skoða jafnframt því að kynna sér starfsemi félagins. -
Bókarkynning - Ókei
Út er komin bókin ÓKEI — uppruni og saga þekktasta orðatiltækis í heimi. Höfundur er Sigurður Ægisson og Hólar gefa út. OK eða O.K., ýmist ritað með lág- eða hástöfum, er sagt vera þekktasta útflutningsafurð Bandaríkjanna, fyrr og síðar. Alla vega er þessi stafasamsetning fyrir löngu komin um gjörvalla Jörð og mun í ofanálag vera fyrsta orðið sem heyrðist mælt á Tunglinu. Það er ekki lítið afrek. Hvað með aðrar reikistjörnur verður, á eftir að koma í ljós. -
Mikið um að vera á matvælabraut VMA
Ekki eru mörg ár liðin frá því nemar í starfnámi við matvælabraut Verkmenntaskólans á Akureyri þurftu að halda suður í Menntaskólann í Kópavogi til að ljúka námi sínu. Aukin eftirspurn frá bæði nemendum og atvinnulífinu hefur leitt til þess að VMA jók námsframboð sitt og nemar geta nú lokið námi sínu í heimabyggð. Þjónustusvæðið er einkum Norður- og Austurland. -
16 ára aldurstakmark á samfélagsmiðlum
Er ekki kominn tími til þess að við tökum umræðu um það fyrir alvöru á Íslandi að hækka aldurstakmarkið á samfélagsmiðlum? Hér er um að ræða málefni sem snertir lýðheilsu barna og ungmenna beint og því nauðsynlegt að gefa þessu málefni rými í aðdraganda kosninga. -
Endurreisnartónleikar Hymnodiu og SCS í Akureyrarkirkju n.k. sunnudag Uppfært tónleiknum hefur verið frestað um óákv tíma
Hymnodia, norræna endurreisnarhljómsveitin Scandinavian Cornetts and Sackbuts og Ágúst Ingi Ágústsson, stjórnandi Cantores Islandiae, flytja gullfallega ítalska, spænska og enska endurreisnartónlist á tónleikum í Akureyrarkirkju sunnudaginn 17. nóvember kl. 17.
