Fyrsta skóflustunga tekin að nýju Holtahverfi
Í dag var tekin fyrsta skóflustunga að Holtahverfi austan Krossanesbrautar á Akureyri. Í heildina er gert ráð fyrir um 300 íbúðum á svæðinu, en framkvæmdir hefjast nú við fyrri áfanga í gatnagerð og lagnavinnu.
Akureyrarbær ásamt Norðurorku, Mílu og Tengi buðu út verkið í október sl. og var samið við lægstbjóðanda, Nesbræður ehf., fyrir um 315 milljónir króna. Í verkinu felast einkum jarðvegsskipti vegna gatna, gangstétta og stíga, lagnavinna, gerð útivistarstíga og jarðvegsskipti fyrir leiksvæði og áningarstaði.
Verkinu er skipt í tvo hluta og er áætlað að fyrri verði lokið í byrjun maí og seinni um miðjan október nk. Bæjarstjórn Akureyrar samþykkti 16. febrúar 2021 nýtt deiliskipulag sem felur í sér blandaða íbúðabyggð fjölbýlishúsa, raðhúsa, parhúsa og einbýlishúsa norðaustan við Krossanesbraut. Skipulagið hefur einnig í för með sér bætt umferðarskipulag, nýja stíga og útivistarsvæði.
Ungmennaráð bæjarins valdi nöfn á götur hverfisins; Álfaholt, Hulduholt, Dvergaholt og Þursaholt. Fyrstu byggingarlóðum í hverfinu var nýlega úthlutað og var mikill áhugi og umframeftirspurn bæði frá einstaklingum og lögaðilum. Í fyrri áfanga voru 22 lóðir auglýstar þar sem er gert ráð fyrir að lágmarki 140 íbúðum og er reiknað með að flestar verði byggingarhæfar í vor og aðrar næsta haust. Til viðbótar var búið að veita Búfesti, í samvinnu við félag eldri borgara á Akureyri, vilyrði fyrir lóð fyrir allt að 140 íbúðir og er gert ráð fyrir að framkvæmdir við a.m.k. 40 íbúðir hefjist strax á þessu ári. Í heildina er gert ráð fyrir um 300 íbúðum á 30 lóðum.
Helstu einkenni svæðisins eru miklar klappir sem byggt verður í kringum, frábært útsýni til allra átta, nálægð við strandlengju og lifandi smábátahöfn. Við mótun skipulags hefur meðal annars verið lögð áhersla á sjálfbærni, lýðheilsu og umhverfisvænar samgöngur. Vistgötur verða óvenjumargar og er horft til þess að stuðla að góðu umhverfi fyrir hjólandi og gangandi, til dæmis með því að koma fyrir gróðurbeðum og trjám í götunum.
Halla Björk Reynisdóttir, forseti bæjarstjórnar, Guðmundur Baldvin Guðmundsson, formaður bæjarráðs og Þórhallur Jónsson, formaður skipulagsráðs, tóku í dag fyrstu skóflustungurnar að nýja hverfinu við væntanlegt Þursaholt þar sem framkvæmdir hefjast. Skóflustungurnar marka upphaf mikillar íbúðauppbyggingar í Þorpinu, norðan Glerár, enda er einnig unnið að skipulagi fyrir nýtt Móahverfi vestan Borgarbrautar þar sem gert er ráð fyrir hátt í þúsund nýjum íbúðum á allra næstu árum. Mikil uppbygging er í sveitarfélaginu á vegum einstaklinga, fyrirtækja og opinberra aðila, auk þess sem íbúum fjölgar hraðar en oft áður eða um 416 (2,2%) á árinu 2021. Af þessu leiðir mikill og vaxandi áhugi á byggingarlóðum og fasteignum sem Akureyrarbær leggur áherslu á að bregðast við á jákvæðan og markvissan hátt
Nýjast
-
Endurreisnartónleikar Hymnodiu og SCS í Akureyrarkirkju n.k. sunnudag
Hymnodia, norræna endurreisnarhljómsveitin Scandinavian Cornetts and Sackbuts og Ágúst Ingi Ágústsson, stjórnandi Cantores Islandiae, flytja gullfallega ítalska, spænska og enska endurreisnartónlist á tónleikum í Akureyrarkirkju sunnudaginn 17. nóvember kl. 17. -
Frambjóðendur í Norðausturkjördæmi mætast í Hátíðarsal HA á morgun
Stúdentafélag Háskólans á Akureyri (SHA) með aðstoð Landssamtaka íslenskra stúdenta (LÍS) standa fyrir pallborðsumræðum með frambjóðendum í Norðausturkjördæmi á morgun, föstudaginn 15. nóvember kl. 12:00 í Hátíðarsal HA. Einnig verður streymt frá viðburðinum á Vísi og YouTube-rás Háskólans á Akureyri fyrir þau sem hafa ekki tök á að mæta á staðinn. -
Bæjarráð vill aðflugsferla við Akureyrarflugvöll endurbætta hið fyrsta
Segja má að Bæjarráð Akureyrar láti ÍSAVIA heyra það í samþykkt sem ráðið lét frá sér fara eftir fund ráðsins í dag. Óánægja bæjarráðs er vegna tafa við gerð nýrra aðflugsferla fyrir flug úr suðri að Akureyrarflugvelli. -
Vegagerðin tekur kafla Hjalteyrarvegar af þjóðvegaskrá
Vegagerðin hefur tilkynnt Hörgársveit að breyting verði gerð á afmörkun Hjalteyrarvegar – 811 og verður hluti hans þar með felldur úr tölu þjóðvega og af vegaskrá. Allir vegir hér á landi eru skilgreindir eftir vegalögum. -
Matargjafir ganga í endurnýjun lífdaga fyrir jólin
„Þar sem að ég virðist ekki geta slitið mig frá Matargjöfum (held að við séum ein eining) þá hef ég ákveðið að halda áfram í breyttri mynd 11. jólin okkar saman,“ skrifar Sigrún Steinarsdóttir á facebook síðu Matargjafa á Akureyri og nágrenni. Hún opnaði fyrr í vikunni reikning Matargjafa og vonar að þeir sem áður lögðu henni lið með mánaðarlegu framlagi haldi því áfram, „því án ykkar er þetta ekki hægt.“ -
Öruggari samgöngur í Fjallabyggð
Á undanförnum árum hefur Fjallabyggð staðið frammi fyrir krefjandi áskorunum tengdum veðurfari. Foktjón hefur orðið í óvæntum ofsaveðrum og úrkomumynstur virðist vera að breytast með tilheyrandi álagi á innviði. Endurteknir úrkomuviðburðir hafa leitt til flóða, nú síðast síðsumars þegar vatn flæddi inn í fjölmörg hús. Þá var Siglufjarðarvegi um Almenninga lokað í nokkra daga vegna skriðufalla og tjóns sem hlaust ef þessu mikla vatnsveðri og hættu á grjóthruni. Sprungur í veginum vegna viðvarandi jarðsigs opnuðust enn frekar. Þessi atburðarrás hefur undirstrikað mikilvægi þess að styrkja og bæta samgöngur inn í sveitafélagið, sem eru lífæð samfélagsins. -
Afleit veðurspá á morgun sýnum gát
Spáð er afar slæmu veðri seinnipart föstudagsins 15. nóvember. Óttast er að sambærilegar aðstæður gætu skapast á Akureyri og í september 2022, þegar sjór flæddi yfir hluta Oddeyrar og olli miklu tjóni. -
Kvikmynd um Kröflu sigraði á Landkönnunarhátíð á Húsavík
Alls voru níu kvikmyndir sýndar á hátíðinni sem haldin var í 10. sinn -
Oddvitar í Norðausturkjördæmi mætast í beinni útsendingu
Oddvitar framboðanna til Alþingis mætast í kvöld í beinni útsendingu á RÚV og vef Vikublaðsins . Rætt verður um áherslumál framboðanna í kjördæminu.
