13.nóvember - 20.nóvember - Tbl 46
Búið að panta nýjan snjótroðara fyrir Kjarnaskóg
Gamli snjótroðarinn er kominn til ára sinna en Ingólfur segir þann nýja verða byltingu. Mynd/akureyri.is
Vikublaðið hefur áður greint frá því að Skógræktarfélag Eyfirðinga safnar nú fyrir nýjum snjótroðara fyrir Kjarnaskóg. „Skógurinn er risastór lýðheilsumiðstöð, opin almenningi allt árið án endurgjalds. Í venjulegum norðlenskum snjóavetri eru stígar og slóðir ófærar frá hausti til vors og vel búinn snjótroðari því lykiltæki fyrir félagið svo þetta mikilvæga mannvirki nýtist til fulls fyrir samfélagið,“ sagði Ingólfur Jóhannsson framkvæmdastjóri Skógræktarfélagsins við Vikublaðið fyrir skömmu.
Sveitarfélögin á svæðinu, einstaklingar og fyrirtæki hafa lagt söfnuninni lið en búið er að panta snjótroðara sem kostar 35 milljónir. Ingólfur segir söfnunina á lokametrunum.
Frá því í gær hafa fjölmörg fyrirtæki og einstaklingar á Eyjafjarðarsvæðinu lagt söfnuninni lið. Finnur Aðalbjörnsson verktaki á Akureyri reið á vaðið í gær og tilkynnti á Facebook að hann hefði lagt sitt af mörkum og hvatti aðra til að gera slíkt hið sama. „Ég var að styrkja snjótroðarasöfnun Skógræktarfélagsins fyrir Kjarnaskóg, algert rugl að þau sjái um útivist í heilu byggðarlagi og oft í sjálfboðavinnu á 40 ára gömlu handónýtu drasli. Ég væri allavega löngu farinn á hausinn ef mín tæki væru svona. Þau eru á lokasprettinum, búin að fá rífandi stuðning hjá einstaklingum og sveitarfélögunum í firðinum og biðla nú til fyrirtækja að klára dæmið, margt smátt gerir eitt stórt. Fyrirtæki á Akureyri - koma svo, stöndum saman varðandi þessa ómetanlegu paradís sem Kjarnaskógur er,“ ritaði Finnur á fjasbókina. Ekki stóð viðbrögðum en fjölmargir einstaklingar og fyrirtæki hafa farið að fordæmi Finns.
Ingólfur hjá Kjarnaskógi segir í samtali við Vikublaðið að söfnunin sé á lokametrunum. „Bara í gær eftir að Finnur lagði sitt fram þá eru komnar sex milljónir inn á söfnunarreikninginn. Staðan er þannig að það voru komnar 32 milljónir í morgun og ég veit að það er meira í pípunum. Þannig að þetta er alveg að detta yfir,“ segir hann og bætir við að það sé ánægjulegt að sjá hvernig samfélagið hefur tekið við sér.
Búið er að leggja inn pöntun í nýjan snjótroðara sem er væntanlegur á næsta ári. „Ég veit ekki alveg hvenær nákvæmlega, það er talsverður afgreiðslutími á svona tækjum. Það er ekki víst að hann nýtist mikið í vetur en þetta verður þvílík bylting þegar hann kemur,“ segir Ingólfur.
Söfnunarreikningur 0302-26-193000 kt:600269-4299
Fréttin hefur verið uppfærð með eftirfarandi upplýsingum af vefsíðu Samherja:
Samherjasjóðurinn styrkti í dag söfnun Skógræktarfélags Eyfirðinga á nýjum snjótroðara, sem ætlað er að þjónusta útivistarfólk sem heimsækir Kjarnaskóg við Akureyri.
Samherjasjóðurinn leggur til 3.000.000 krónur í söfnunina en auk þess mun sjóðurinn styrkja daglegan rekstur troðarans með 1.000.000 króna fjárframlagi.
Nýjast
-
Úrslit í ritlistakeppni Ungskálda 2024
Dómnefnd mun kunngera úrslit í ritlistasamkeppni Ungskálda 2024 við hátíðlega athöfn í Amtsbókasafninu á Akureyri. Athöfnin fer fram á degi íslenskrar tungu, laugardaginn 16. nóvember kl. 14. Léttar veitingar verða í boði að athöfn lokinni og einnig verður tónlistarflutningur frá Elíasi Dýrfjörð sem leikur á kontrabassa. Öll velkomin á athöfnina. -
Þrír konungar frá Skarðaborg
Haustið er að baki og vetur konungur hefur tekið völdin amk. fyrst um sinn Sauðfé hefur haft það gott á beitinni, enda fyrri hluti nóvember óvenju hlýr. Hrútar fara á gjöf í vikunni á flestum bæjum og sumir bændur eru farnir að rýja féð inn. Þessir „konungar“ í Skarðaborg í Reykjahverfi eru vel ullaðir og þó næði kuldaél þá verður þeim ekki kalt í sinni kápu. Vonandi verður veturinn mildur, en bæði bændur og búalið þurfa á því að halda eftir kalt og rigningasamt sumar. -
Um 200 manns kynntu sér starfsemi Pharmarctia á Grenivík
Um 200 manns komu við á opnu húsi hjá fyrirtækinu Pharmarctia á Grenivík um liðna helgi. Þá var formlega tekið í notkun 1500 fermetra viðbótarhúsnæði sem gestum og gangandi bauðst að skoða jafnframt því að kynna sér starfsemi félagins. -
Bókarkynning - Ókei
Út er komin bókin ÓKEI — uppruni og saga þekktasta orðatiltækis í heimi. Höfundur er Sigurður Ægisson og Hólar gefa út. OK eða O.K., ýmist ritað með lág- eða hástöfum, er sagt vera þekktasta útflutningsafurð Bandaríkjanna, fyrr og síðar. Alla vega er þessi stafasamsetning fyrir löngu komin um gjörvalla Jörð og mun í ofanálag vera fyrsta orðið sem heyrðist mælt á Tunglinu. Það er ekki lítið afrek. Hvað með aðrar reikistjörnur verður, á eftir að koma í ljós. -
Mikið um að vera á matvælabraut VMA
Ekki eru mörg ár liðin frá því nemar í starfnámi við matvælabraut Verkmenntaskólans á Akureyri þurftu að halda suður í Menntaskólann í Kópavogi til að ljúka námi sínu. Aukin eftirspurn frá bæði nemendum og atvinnulífinu hefur leitt til þess að VMA jók námsframboð sitt og nemar geta nú lokið námi sínu í heimabyggð. Þjónustusvæðið er einkum Norður- og Austurland. -
16 ára aldurstakmark á samfélagsmiðlum
Er ekki kominn tími til þess að við tökum umræðu um það fyrir alvöru á Íslandi að hækka aldurstakmarkið á samfélagsmiðlum? Hér er um að ræða málefni sem snertir lýðheilsu barna og ungmenna beint og því nauðsynlegt að gefa þessu málefni rými í aðdraganda kosninga. -
Endurreisnartónleikar Hymnodiu og SCS í Akureyrarkirkju n.k. sunnudag Uppfært tónleiknum hefur verið frestað um óákv tíma
Hymnodia, norræna endurreisnarhljómsveitin Scandinavian Cornetts and Sackbuts og Ágúst Ingi Ágústsson, stjórnandi Cantores Islandiae, flytja gullfallega ítalska, spænska og enska endurreisnartónlist á tónleikum í Akureyrarkirkju sunnudaginn 17. nóvember kl. 17. -
Frambjóðendur í Norðausturkjördæmi mætast í Hátíðarsal HA á morgun
Stúdentafélag Háskólans á Akureyri (SHA) með aðstoð Landssamtaka íslenskra stúdenta (LÍS) standa fyrir pallborðsumræðum með frambjóðendum í Norðausturkjördæmi á morgun, föstudaginn 15. nóvember kl. 12:00 í Hátíðarsal HA. Einnig verður streymt frá viðburðinum á Vísi og YouTube-rás Háskólans á Akureyri fyrir þau sem hafa ekki tök á að mæta á staðinn. -
Bæjarráð vill aðflugsferla við Akureyrarflugvöll endurbætta hið fyrsta
Segja má að Bæjarráð Akureyrar láti ÍSAVIA heyra það í samþykkt sem ráðið lét frá sér fara eftir fund ráðsins í dag. Óánægja bæjarráðs er vegna tafa við gerð nýrra aðflugsferla fyrir flug úr suðri að Akureyrarflugvelli.
