20. nóvember - 27. nóvember - Tbl 47
Lesandinn: Óskar Jóhannsson
Óskar Jóhannson er Lesandi vikunnar
Óskar Jóhannsson er Lesandi vikunnar. Hann er upprunalega frá Húsavík en býr nú í sveitasælu Aberdeenskíris í Skotlandi. Þar tekst hann á við framkvæmdastjórn lítils fyrirtækis sem hyggur á heimsyfirráð auk þess að vera virkur í samfélagsmálum, umhverfis- og náttúruvernd.
Bókalestur er fyrirferðamikill á heimili hans og húslestrar fastar uppákomur enda fór ekki svo að leitað yrði ráðgjafar yngsta bókaormsins á heimilin, Eyju Alexöndru, við verkefnið.
Uppáhalds bók eftir erlendan höfund?
Ulysses eftir James Joyes. Ég þurfti að lesa hana 18 ára gamall í bókmenntafræði námi og þá þótti mér hún ólæsilegt torf. Ég gafst upp eftir fáar blaðsíður.
Fyrir 15 árum var ég staddur í safni skáldsins í Dublin. Þar var ég við það að koma mér í stórvandræði fyrir að skemma írskar þjóðargersamar, þegar ég henti fyrir slysni síma skáldsins í gólfið, kominn inn fyrir þar til gerðar „girðingar“ að halda frá stjórnlausum og ábyrgðarlausum safngestum. Þetta rétt slapp fyrir horn en í kjölfarið lofaði ég Joyce að ég myndi gera aðra tilraun við Ulysses. Var auðvitað drullusmeykur um að af öðrum kosti yrði ég hundeltur og ofsóttur af vofu höfundarins fram á grafarbakkann.
Loks las ég hana í smá skömmtum og með „hjálparmeðulum“, kominn á fullorðins aldur. Það var opinberum sem leyddi til þessa að að við höfum átt samleið ítrekað síðan. Það er að segja ég og bókin....ekki vofan.
Uppáhalds bók eftir íslenskan höfund?
Ég hef alltaf haft gaman af Þórbergi. Einungis vegna þess hversu oft í gegnum tíðina ég hef dregið hana út úr bókaskápnum til að grípa niður í henni yfir kaffibolla þá nefni ég Bréf til Láru. Ekki besta bókin og að einhverju leyti hefur tengingin við hana trosnað með tímanum en ennþá kemur hún fyrst upp í hugann.
Fyndnasta bókin?
Ég las bækur Kristínar Helgu Gunnarsdóttur fyrir yngstu dóttur mína og við hlógum eins og hálfvitar. Það var svo gaman að einhvern veginn teygðist úr lestrarstundinni okkar yfir skynsamleg mörk án þess að við tækum eftir því. Stundum bað hún mig um að bakka í textanum og lesa aftur.
Vorum við að lesa Elsku besta Binna mín þegar kátínan var mest eða vorum við komin yfir í eitthvað um hana Fíusól, það munum við feðginin ekki alveg. En alla vega kom Fíasól geysilega sterk inn og hvorugt okkar hefur hlegið jafn mikið yfir nokkrum bókum síðan.
Sorglegasta bókin?
Ég var ungur (kannski full ungur) þegar ég las Saga af sönnum manni eftir rússann Boris Polevoi, í íslenskri þýðingu Jóhannesar úr Kötlum (að mig minnir). Það situr í mér hvað mér fannst hún sorgleg og átakanleg. En hún var líka falleg og áhrifamikil. Alla vega, þá koma óvenju tárvot augu, snörl og vasaklútar upp í hugann.
Besta spennu/hrollvekju bókin?
Eftir að hafa haft fordóma gagnvart Stephen King lét ég tilleiðast fyrir áhrif landsþekkts ljóts hálfvita, Þorgeirs Tryggvasonar og gaf honum séns. King er nú reglulega á leslistanum og The Stand stendur upp úr hingað til.
Besta barnabókin?
Hér ráðfærði ég mig aftur við dóttur mína. Sameiginleg niðurstaða er Sagan af bláa hnettinum eftir Andra Snæ Magnason. Skemmtileg bók með hollan boðskap.
Hvaða bók hefur haft mest áhrif á þig?
Af mörgu að taka en fyrst kemur upp í hugann bókin Silent Spring eftir Rachel Carson. Þarna var sáð fræum ástríðu minnar fyrir umhverfis- og náttúruvernd.
Hvað ertu að lesa núna?
Ég er venjulega með nokkrar ólíkar bækur (skáldskap, ljóð og fróðleik) í gangi einu sem ég stafla á náttborðið. Þessa dagana fer mestur tíminn í einn minn uppáhalds höfund, Iain Banks og bók hans, Whit.
Ef þú myndir skrifa bók, hvernig bók yrði það?
Ég er ekki viss um nema að þessu sé að einhverju leyti svarað. Hvort það svar verður einhvern tímann opinberað er svo annað mál.
Nýjast
-
Ferðafrelsið er dýrmætt
Ferðafrelsi er kannski ekki eitthvað sem menn alla jafna velta mikið fyrir sér frá degi til dags. Kannski vegna þess að okkur finnst það svo sjálfsagður hlutur. Að mega ferðast frjálsir um vegi og slóða um fjöll og fyrnindi umvafin náttúrunni við hvert fótmál. Þessir slóðar og fjallvegir urðu ekki til af sjálfu sér heldur mótuðust af höndum og hug þeirra frumkvöðla sem fyrstir fóru af stað á vanbúnum, óbreyttum bifreiðum þess tíma, þekktu á og kunnu að lesa í ár, vötn og land og öfluðu sér dýrmætrar þekkingar sem skilaðist áfram til næstu kynslóða. -
Listasafnið á Akureyri: Opnun, fimmtudagskvöldið 28. nóvember
Fimmtudagskvöldið 28. nóvember kl. 20-22 verða opnaðar tvær sýningar í Listasafninu á Akureyri: Sólveig Baldursdóttir – Augnablik-til baka og Átthagamálverkið: Á ferð um Norðausturland liðinnar aldar. Boðið verður upp á sýningarstjóraspjall með Markúsi Þór Andréssyni, sýningarstjóra Átthagamálverksins, kl. 20.40 og listamannaspjall með Sólveigu kl. 21. -
Íslandsþari með ný áform um þaravinnslu á Húsavík
Íslandsþari óskar eftir að fá úthlutað lóðinni að Búðarfjöru 1 á Húsavík til uppbyggingar húsnæðis til úrvinnslu stórþara. -
Betra veður fyrir íþróttakrakkana okkar!
Á ferð minni um okkar víðfema og fallega kjördæmi hef ég lent í allskyns vandræðum í öllum veðrum nú í nóvember. Ég er sannarlega ekki einn um það enda vegir landsins uppfullir af spennandi frambjóðendum í leit að sem flestum samtölum við fólkið í landinu. Frambjóðendur keppast nú við að birta myndir og myndbönd af skafrenningi, snjókomu, blindbyljum og fleira til. Allt til þess gert að sýna fólki hversu vandasamt það getur verið að ferðast um landið í nóvember. Sem betur fer er bara kosið á fjögurra ára fresti og oftast á vorin. Þess vegna er þetta nú frekar undantekning en hitt að frambjóðendur þurfi að vaða út í þetta veður og þessa færð í atkvæðaleit. -
Nærsamfélagið tekur höndum saman
Jólatónleikar til styrktar Sigrúnu Björgu Aðalgeirsdóttur og fjölskyldu -
Jólamatur fátæka mannsins
Einn af mínum allra uppáhalds fuglum er rjúpan. Rjúpan nam hér land við lok ísaldar fyrir um 10.000 árum og kom upprunalega frá Grænlandi. Hún á sér lengri forsögu hér en við. Mér finnst hún ekki bara falleg, hún er brögðótt, á 3 alklæðnaði og þegar hún ver unga sína, þá sýnir hún vanmetna vitsmuni. -
Hver grípur þig?
„Við vildum að fólk gerði sér grein fyrir hvaða þjónusta er í boði og hvert er hægt að sækja hana þegar aðstoðar er þörf, fólki að kostnaðarlausu. Einnig langar okkur með málþinginu að styrkja samstarfið á milli félaganna, að fulltrúar þeirra séu upplýst um aðra kosti sem eru í boði fyrir fólk og geti bent málum í réttan farveg eða til viðeigandi félagasamtaka,“ segir Erla Lind Friðriksdóttir um málþing sem hún stendur fyrir ásamt frænku sinni Birnu Guðrúnu Árnadóttur. -
Sérútbúinn lögreglubíll til landamæraeftirlits
Embætti Lögreglunnar á Norðurlandi eystra hefur fengið til eignar sérútbúinn lögreglubíl til afnota við landamæraeftirlit. Segja má að þar sé á ferðinni fullbúin landamærastöð á hjólum. Landamæra- og áritunarsjóður Evrópusambandsins greiddi 75% kostnaðar og Dómsmálaráðuneytið 25% og skiptu einnig með sér kostnaði við einn starfsmann í þrjá mánuði síðastliðið sumar. -
Klúbbar styrkja Frú Ragnheiði
Klúbbarnir Ladies Circle 7 og Round Table 15 afhentu Frú Ragnheiði rausnarlegar styrk í vikunni, ómetnalegur styrkur . „Við erum svo innilega þakklát og mun þetta nýtast skjólstæðingum okkar vel segir í tilkynningu, en styrkurinn er að upphæð um 630 þúsund krónur.
