Heiðursviðurkenning Fiskidagsins mikla
Fiskidagurinn mikli heiðraði sem fyrr þá sem hafa með jákvæðum hætti haft áhrif á atvinnusögu Dalvíkurbyggðar og íslenskan sjávarútveg. Fleiri voru að þessu sinni heiðraðir en ella í ljósi þess að Fiskidagurinn var ekki hátíðlegur haldinn á árunum 2020, 2021 og 2022. Þetta kemur fram í tilkynningu frá skipuleggjendum hátíðarinnar.
- Fyrir árið 2020 heiðrar Fiskidagurinn mikli Vigfús Jóhannesson fyrir farsælan skipstjórnarferil.
Árið 1970 réðst Vigfús til Útgerðarfélags Dalvíkinga og árið 1974, þegar Björgvin EA 311 kom fyrstur skuttogara til Dalvíkur, varð Vigfús þar fyrsti stýrimaður og síðan skipstjóri árið 1977. Nafn Vigfúsar og togara með nafnið Björgvin varð samtengt lengi því árið 1988 varð hann skipstjóri á nýjum og glæsilegum Björgvin EA 311 og með það skip var hann til 2002. Björgvin er enn gerður út frá Dalvík. Vigfús átti einstaklega farsælan feril og sama áhöfn fylgdi honum í áratugi. Áhöfn Björgvins var heiðruð af hálfu Íslenskra sjávarafurða fyrir uppbyggingu gæðakerfis, góð vinnubrögð og vel unnin störf.
- Fyrir árið 2021 heiðrar Fiskidagurinn mikli Sigurð Tryggva Konráðsson
fyrir fjölbreytt störf í sjávarútvegi.
Fjölskyldufyrirtækið Sólrún á Árskógsströnd var stofnað 1961 og var Sigurður einn af stofnendum þess ásamt föður sínum og elsta bróður. Fyrirtækið hefur síðan í einni eða annarri mynd verið með útgerð frá Árskógssandi frá 1961 og jafnframt fiskverkun til 2006. Síðan 2006 hefur fyrirtækið starfrækt fiskmarkað á Árskógssandi. Frá 1970 til 1986 stunduðu Sólrúnarmenn hrefnuveiðar og má segja að Árskógssandur hafi um árabil verið höfuðstaður hrefnuveiða við Ísland. Þeir urðu einnig frumkvöðlar hér á landi í Japansviðskiptum með hrefnuafurðir. Fyrirtækið Sólrún hefur um árabil verið kjölfesta í atvinnulífi á Árskógssandi og gerir nú út tvo báta þaðan, Sólrúnu EA 151 og Særúnu EA 251. Sigurður hefur lengst af unnið þar ýmist sem sem skipstjóri og/eða stjórnandi í landi.
- Fyrir árið 2022 heiðrar Fiskidagurinn mikli Hartmann Kristjánsson fyrir sjómennsku.
Hartmann Kristjánsson var heiðraður fyrir sjómennsku í áratugi á ýmsum skipum og bátum frá Dalvík. Hann hefur stundað flestan veiðiskap og varið starfsævinni á sjónum. Hartmann var lengi á Lofti Baldvinssyni EA 24 á síld í Norðursjó en fór jafnan að ókyrrast þegar voraði og tók þá frí til að sinna grásleppunni. Hann tók líka þátt í rækjuævintýrinu á Dalborg EA 317 en lengst var hann á Björgvin EA 311. Þar hætti hann upp úr aldamótum 2000, þá kominn hátt á sjötugsaldur. Smábátasjómaðurinn Hartmann hefur líka um árabil róið frá Dalvík á báti sínum, Valþóri EA 313.
- Fyrir árið 2023 heiðrar Fiskidagurinn mikli erlent verkafólk í fiskvinnslu á Dalvík.
Fiskvinnslufólk af erlendum uppruna fór að verða áberandi á Dalvík á fyrstu árum nýrrar aldar. Þá höfðu miklar breytingar átt sér stað í útgerð og fiskvinnslu sem kölluðu á fleiri vinnufúsar hendur. Mörg þeirra er komu til starfa í sjávarútvegi á Dalvík ílengdust, sum komin í önnur störf og láta til sín taka á ýmsum sviðum.
Fiskidagurinn mikli fagnar fjölbreytileikanum og því fólki sem komið hefur um langan veg til að taka þátt í atvinnulífi og samfélagi Dalvíkurbyggðar.
Svanfríður Jónasdóttir, fyrrverandi bæjarstjóri Dalvíkurbyggðar, sá að venju um heiðrun Fiskidagsins mikla og naut að þessu sinni aðstoðar Guðna Th. Jóhannessonar, forseta Íslands.
Nýjast
-
Ferðafrelsið er dýrmætt
Ferðafrelsi er kannski ekki eitthvað sem menn alla jafna velta mikið fyrir sér frá degi til dags. Kannski vegna þess að okkur finnst það svo sjálfsagður hlutur. Að mega ferðast frjálsir um vegi og slóða um fjöll og fyrnindi umvafin náttúrunni við hvert fótmál. Þessir slóðar og fjallvegir urðu ekki til af sjálfu sér heldur mótuðust af höndum og hug þeirra frumkvöðla sem fyrstir fóru af stað á vanbúnum, óbreyttum bifreiðum þess tíma, þekktu á og kunnu að lesa í ár, vötn og land og öfluðu sér dýrmætrar þekkingar sem skilaðist áfram til næstu kynslóða. -
Listasafnið á Akureyri: Opnun, fimmtudagskvöldið 28. nóvember
Fimmtudagskvöldið 28. nóvember kl. 20-22 verða opnaðar tvær sýningar í Listasafninu á Akureyri: Sólveig Baldursdóttir – Augnablik-til baka og Átthagamálverkið: Á ferð um Norðausturland liðinnar aldar. Boðið verður upp á sýningarstjóraspjall með Markúsi Þór Andréssyni, sýningarstjóra Átthagamálverksins, kl. 20.40 og listamannaspjall með Sólveigu kl. 21. -
Íslandsþari með ný áform um þaravinnslu á Húsavík
Íslandsþari óskar eftir að fá úthlutað lóðinni að Búðarfjöru 1 á Húsavík til uppbyggingar húsnæðis til úrvinnslu stórþara. -
Betra veður fyrir íþróttakrakkana okkar!
Á ferð minni um okkar víðfema og fallega kjördæmi hef ég lent í allskyns vandræðum í öllum veðrum nú í nóvember. Ég er sannarlega ekki einn um það enda vegir landsins uppfullir af spennandi frambjóðendum í leit að sem flestum samtölum við fólkið í landinu. Frambjóðendur keppast nú við að birta myndir og myndbönd af skafrenningi, snjókomu, blindbyljum og fleira til. Allt til þess gert að sýna fólki hversu vandasamt það getur verið að ferðast um landið í nóvember. Sem betur fer er bara kosið á fjögurra ára fresti og oftast á vorin. Þess vegna er þetta nú frekar undantekning en hitt að frambjóðendur þurfi að vaða út í þetta veður og þessa færð í atkvæðaleit. -
Nærsamfélagið tekur höndum saman
Jólatónleikar til styrktar Sigrúnu Björgu Aðalgeirsdóttur og fjölskyldu -
Jólamatur fátæka mannsins
Einn af mínum allra uppáhalds fuglum er rjúpan. Rjúpan nam hér land við lok ísaldar fyrir um 10.000 árum og kom upprunalega frá Grænlandi. Hún á sér lengri forsögu hér en við. Mér finnst hún ekki bara falleg, hún er brögðótt, á 3 alklæðnaði og þegar hún ver unga sína, þá sýnir hún vanmetna vitsmuni. -
Hver grípur þig?
„Við vildum að fólk gerði sér grein fyrir hvaða þjónusta er í boði og hvert er hægt að sækja hana þegar aðstoðar er þörf, fólki að kostnaðarlausu. Einnig langar okkur með málþinginu að styrkja samstarfið á milli félaganna, að fulltrúar þeirra séu upplýst um aðra kosti sem eru í boði fyrir fólk og geti bent málum í réttan farveg eða til viðeigandi félagasamtaka,“ segir Erla Lind Friðriksdóttir um málþing sem hún stendur fyrir ásamt frænku sinni Birnu Guðrúnu Árnadóttur. -
Sérútbúinn lögreglubíll til landamæraeftirlits
Embætti Lögreglunnar á Norðurlandi eystra hefur fengið til eignar sérútbúinn lögreglubíl til afnota við landamæraeftirlit. Segja má að þar sé á ferðinni fullbúin landamærastöð á hjólum. Landamæra- og áritunarsjóður Evrópusambandsins greiddi 75% kostnaðar og Dómsmálaráðuneytið 25% og skiptu einnig með sér kostnaði við einn starfsmann í þrjá mánuði síðastliðið sumar. -
Klúbbar styrkja Frú Ragnheiði
Klúbbarnir Ladies Circle 7 og Round Table 15 afhentu Frú Ragnheiði rausnarlegar styrk í vikunni, ómetnalegur styrkur . „Við erum svo innilega þakklát og mun þetta nýtast skjólstæðingum okkar vel segir í tilkynningu, en styrkurinn er að upphæð um 630 þúsund krónur.
