Glatt í Grímsey á góðum degi

Nýja kirkjan fokheld Mynd Anna María Sigvaldadóttir

Það var bjart og fallegt  yfir Grímsey i gær þegar  eyjaskeggjar og gestir þeirra komu saman og  fögnuðu þvi að hin nýja Miðgarðskirkja er fokheld. Í gær var einmitt eitt ár liðið frá því að eldur kom upp í þeirri gömlu en  hún brann eins og fólk man til grunna. 

,,Kvenfélagið Baugur, sem í sitja allar konur í eynni, bauð síðan til veislukaffis í félagsheimilinu Múla. Auk þess buðu forsvarsmenn hinnar nýju Grímseyjarlestar til útsýnis- og skoðunarferðar um eyjuna.

 Samkoman í kirkjunni var einstaklega hugljúf en með léttu yfirbragði. Sr. Oddur Bjarni Þorkelsson sóknarprestur Miðgarðakirkju lét ekki sitt eftir liggja og Friðrik Ómar Hjörleifsson tónlistarmaður var fyrstur til að taka lagið í hinni nýju kirkju. Hún er auk helgihalds hugsuð sem tónlistar- og menningarhús. Sr. Gísli Gunnarsson, nýkjörinn vígslubiskup að Hólum í Hjaltadal, minntist m.a þess að nú eru 800 ár frá því að Guðmundur góði Arason Hólabiskup kom til Grímseyjar á flótta undan Sturlungum. Í þeirri ferð vígði Guðmundur m.a stuðlaberg sem notað verður sem altari kirkjunnar. Þá fluttu fyrrverandi sóknarprestar, þeir sr. Pálmi Matthíasson og sr. Magnús Gunnarsson, hugvekjandi orð og þökkuðu liðna tíma. Jafnframt færði Pálmi Miðgarðakirkju eina milljón króna frá söfnuði Bústaðakirkju. Þá lýsti Hjörleifur Stefánsson, arkitekt kirkjunnar, því hvernig hönnun hennar skírskotar til einstakrar sögu og náttúru Grímseyjar. Alfreð Garðarsson, formaður sóknarnefndar og Arna Björg Bjarnadóttir, verkefnisstjóri kirkjubyggingar komu jafnframt á framfæri þakklæti til allra þeirra, sem stutt hafa við kirkjubygginguna með einum eða öðrum hætti.

Smíði hinnar nýju kirkju hefur gengið vel þrátt fyrir tafir vegna slæmrar veðráttu í sumar. Á móti kemur að vel hefur viðrað í september og verkinu þá miðað afar vel áfram. Á næstu vikum mun Loftkastalinn, sem sér um smíði kirkjunnar, ljúka við að klæða hana að utan og leggja steinskífur úr stuðlabergi á þakið. Það er mál manna að um einstaklega vandaða smíði sé að ræða. 

 Sóknarnefnd Miðgarðakirkju mun á næstunni taka ákvörðun mun hvenær haldið verður áfram með framkvæmdir en framvinda þeirra er háð þeim fjármunum sem safnast til verksins. Vonir standa til að í vetur takist að innrétta kirkjuna og vígja næsta sumar. Söfnun fyrir nýrri Miðgarðakirkju heldur því áfram og margir leggja þar hönd á plóg. Á morgun föstudaginn 23. september kl. 17 verða t.d. söfnunartónleikar í Hallgrímskirkju."

Þetta segir  i tilkynningu  frá verkefnisstjóra  kirkjubyggingarinnar

Hægt er að fylgjast með söfnun til Miðgarðakirkju á styrktarsíðu hennar, grimsey.is/kirkja
Söfnunarreikningur Miðgarðakirkju
Kennitala: 460269-2539
Reikningsnúmer: 565-04-250731